Дано крезьгурчилы Пантелей Кузнецовлы 80 арес тырме

Удмурт Дунне
By Удмурт Дунне Ноябрь 24, 2017 11:14

Туннэ, 24-тӥ ноябре 80 арес тырме Россиысь но Удмуртиысь культура удысысь дано ужасьлы, крезьгурчилы Пантелей Кузнецовлы. Со Ува каргуртысь крезьгуръя нылпи школаен 42 ар кивалтӥз, 25 ар талэсь азьло кылдытӥз «Купанча» ансамблез.

П. Кузнецов Уваысь крезьгуръя школаен кивалтон вакытаз

Хоре кузь сюрес

Алнаш ёросысь Сизьгуртын вордӥськем пияш гурт удысъя институтэ пырон сярысь малпаськылӥз. 1955-тӥ арын Ижкаре вуиз. Пантелей нырысетӥ экзамензэ «5»-лы сётӥз. Но 2-тӥ экзаменэз химия вал, та предметэз Пантелей сокем ик ӧз яратылы. Соин, экзаменэ мынытэк, Удмурт радиолэн хораз вамыштӥз. Отчы кырӟасьёсты кутон сярысь ялон ӵапак ки улаз сюриз. Пантелеез кылзӥзы, чебер куараезлы синмаськизы ке но, дышетскемез ӧвӧл шуыса, хоре ӧз басьтэ, китӥз кутыса, Ижысь крезьгуръя училищее вуттӥзы. Та учырлы луыса солэн улон сюресэз чутрак воштӥськиз.

Пантелей Кузнецов тодон-валан люказ вокалъя ёзын. Нырысетӥ дышетскон арез пияшлы капчиен ӧз сётӥськы, угось музыкалы пичи но дышетскемез ӧй вал. Ас ёзъёссэ сутон понна крезьгур грамотаез валаны, фортепианоен, баянэн шудыны дышетсконо луиз. 3-тӥ араз сое армие басьтӥзы. Отын со солдатъёсты, строен ветлыкузы, кырӟаны дышетӥз, пӧртэм концертъёсы солист сямен пыриськылӥз. Крезьгурез валамзэ санэ басьтыса, сое духовой оркестрлы кивалтӥсе юнматӥзы, военной парадъёсы но пыриськылӥз.

Армиысь берыктӥське-мез бере училищеын дышетсконзэ азинтӥз. Зэм, вокалъя ёзысь дирижёрско-хоровой ёзэ выжоно луиз, угось армиын зол кынмыны шедиз, куараез пуксиз.

Училищеын берпуметӥ аръёссэ дышетскыкуз ини, удмурт пияшез Удмурт радиолэн хораз кутӥзы. Озьы Пантелей быдэсак творчество дуннее выйиз. Нырысетӥ гурез Степанида Ивановалэн «Эн пуксьы ни тон мон вӧзы» кылбурезъя кылдӥз. Кырӟанзэ оркестрлы тупатыны солы юрттӥз Удмурт радиоысь оркестрен кивалтӥсь Виктор Егоров.

Хорын ужамзэ крезьгурчи шунытэн тодаз вае:

— Мыным шуд усиз кырӟаны Герман Корепановлэн удмурт но ӟуч кылъёсын пуктэм «Наталь» операяз. Хормы быдэсак отчы пыриськиз уго. Соку тодматски Казаньысь консерваториез соку гинэ йылпумъям Анатолий Мамонтовен («Италмас» ансамблен кивалтӥсь), со, операез пуктыку, милемын ужаз. Озьы ми юн эшъяським.

А. Мамонтовен тодматскон ӟеч емышен берытскиз. Пантелей Кузнецовлэн ог 50-лэсь ятыр кырӟанъёсыз «Италмас» ансамбльлэн репертуараз пыртэмын вал.

1 ар интые 55

Дышетсконзэ йылпумъяса, Пантелей Николаевич Удмурт радиолэн хораз ужаны кылиз. Нош 1962-тӥ арын культурая министр Аркадий Завойских егит пиез дораз ӧтиз но шуиз: Уваысь крезьгуръя школаын одӥг арзэ директор луыса ужалод, вуоно арын ик берен хоре берыктӥськод.

Уваын 1961-тӥ арын усьтӥськиз нылпиослы крезьгуръя школа, соку, татын но Алнашын сяна, Удмуртиын мукет крезьгуръя нылпи школаос ӧй на вал. Ува соку нюлэс пушкы быдэсак выемын вал. Татчы ыстэм директорзы пегӟем.

Увае одӥг арлы лыктэмезлы табере 55 ар тырме ини. Пантелей Кузнецов 42 ар ӵоже крезьгуръя школаен кивалтӥз. Туннэ та школа элькунамы одӥгез устоез луэ. Али отын пӧртэм удысъёсъя 500-лэсь ятыр нылпиос тодон-валан басьто. Школаез быдтэм тросэз пиналъёс улон сюрессэс лулчеберет удысэн герӟало.

1991-тӥ арын Пантелей Николаевич Ува ёросын «Удмурт Кенешлэсь» ёззэ кылдытӥз. Нош ар ортчыса, Уваысь культурая юртын кырӟанъя но эктонъя «Купанча» удмурт ансамбль люказ но соин 15 ар пала кивалтӥз. Та вакытэ отчы ог 20 кырӟась кышномуртъёс ветло. Туэ коллектив 25 ар тырмонзэ пусйиз. Ансамбль быдэс шаермылы тодмо луиз, солэсь адӟем карыса, асьсэлэсь «Купанчаоссэс» кылдытъязы мукет ёросъёс но. Туэ соос Удмуртилэн пӧртэм сэрегъёсысьтыз уваосты сӥлы карыны вуылӥзы. Дано куноос пӧлын вал Пантелей Николаевич но. «Купанчалэн» репертуарысьтыз ваньмыз кырӟанъёс П. Кузнецовен гожтэмын.

Пантелей Николаевичлэн 1 сюрслэсь ятыр кырӟанъёсыз пќлысь ог 100-эз ас кылбуръёсызъя гожтэмын. Сюлэмез зол бугырто Ашальчи Окилэн кылбуръёсызъя гожтэм кырӟанъёсыз. Нырысетӥ удмурт нылкышно кылбурчиен пумиськемзэ Пантелей Николаевич тазьы тодаз вае:

— 5-тӥ классын дышетскыкум, эшъёсыным нюлэскын, ожгарчи кариськыса, шудӥськомы вал, кускылиен лэзяськылӥмы. Одӥг пол ӵыжин мынам синмам туж зол сюриз, синмы вирӟектӥз. Соку эшеным Алнаш больницае син эмъясь доры мынӥм. Тӧдьы халатэн, кымесаз синучконэн арлыдо кышномурт нырысь тышкаськиз, синъёстэс уд утиське шуыса, собере валэктӥз, кызьы эмъяськоно. Арня ӵоже нуналлы быдэ дораз эскериськылӥ. Берло гинэ тодӥ, Акулина Григорьевна Векшина врач Ашальчи Оки кылбурчи вылэм шуыса.

Пантелей Николаевичлы улоназ трос тодмо адямиосын тодматскыны-ужаны удалтӥз. Тани Пётр Чернов писателен соос пичи дырысенызы люконтэм эшъёс вал. П. Чернов 1998-тӥ арын потэм «Егит дыр кырӟанъёс» книгаяз Пантелей Кузнецов сярысь шуныт тодэ ваёнъёссэ пыртӥз.

Ачиз но Пантелей Николаевич кырӟанъёсыныз 5 книга поттӥз. Аспал адямизэс уваос туж данъяло но гажало, гуръёссэ яратыса быдэсъяло. Кырӟанъёссэ «Шулдыр ӝыт», «Италмас» ансамбльёс кырӟало, ӵемысь солэсь гуръёссэ кылыны луэ «Мынам Удмуртие» радиоысь.

Выль крезьгур вордыны мылкыд солы яратоно кузпалыз Римма Максимовна но сётылӥз, луоз.  Увае лыктэмез бере лякыт, каньыл сямо нылмуртэн тодматскыса, соос 55 ар ӵош улӥзы, жаляса верано, 3 ар талэсь азьло со улонысь кошкиз. Матысь адямиезлы П. Кузнецов «Котькинлэсь дуно» кырӟанзэ сӥзиз.

Евгений Эжбаев

Туспуктэм «Удмурт дуннелэн» архивысьтыз

Удмурт Дунне
By Удмурт Дунне Ноябрь 24, 2017 11:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<