Вери-вери умой. Кыӵе ужпумъёсты быдэстэ Егитъёслэн но студентъёслэн фестивальзы

Удмурт Дунне
By Удмурт Дунне Октябрь 18, 2017 13:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та нуналъёсы быдэс дуннеысь устоосыз егитъёс люкаськемын Сочие — отын ортче Егитъёслэн но студентъёслэн 19-тӥез фестивальзы. Нош Ижкарын толон йылпумъяськиз со фестивальлэн улосвыл программаез.

Брангуртысь песянайёсын ӵош.

Пельнянь кутон, крезен шудон…

4 нунал шаерамы кунояськизы кунгож сьӧрысь 47 егитъёс. Ваньзы соос пӧртэм удысъёсын тунсыкъясько, пӧртэм арлыдоесь, пӧртэм кунъёсысь, куоссы пӧртэм буёло… Нош та нуналъёс ӵоже куспазы эшъяськизы, ог-огзылэн культураосынызы но кылъёсынызы тодматскизы.

Куноос понна туж тунсыко программа дасямын вал, егитъёс вуылӥзы шаермылэн пӧртэм сэрегъёсаз: Брангуртэ песянайёс доры, Сарапулэ, Воткинскысь П. Чайковскийлэн музеяз, Ижысь автозаводэ, К. Герд нимо но М. Калашников нимо музейёсы, «Эктоника» дискотекае. Асьме культураен, сям-йылолъёсын тодматон вылысь куноослы ортчытъязы мастер-классъёс. Кылсярысь, ваньзы шумпотыса дышетскизы перепеч лэсьтыны но пельнянь кутыны. Со сяна, учкизы кӧня ке концерт. Нырысетӥзэ дасязы Брангуртысь песянайёс. Ох, шумпотӥзы ук кунсьӧръёс соосын туспуксьыны! Кыкетӥез концерт усьтӥз дунневыл фестивальлэсь улосвыл программазэ. Таяз ваньзэсты паймытӥз Богдан Анфиногенов, со кырӟаку, быдэс зал сылыса чабиз. Куинетӥзэ концертэз возьматӥзы Воткинскысь быгатӥсь нылпиос но крезьчиослэн «Сайкан» ансамбльзы.

— Ми тӥледын ӵош мыномы Сочие, — шуиз «Сайканлэн» кивалтӥсез Сергей Трофимов кунсьӧр куноослы. — Нош отысен ми ог-огмес мед тодмалом, мед шедьтом шуыса, ойдолэ дышетомы удмурт гурез.

Сергей Семёнович ӧтиз сцена вылэ мылкыд карисьёсты. Кунгож сьӧрысь егитъёс, «сайканъёс» юрттэмен, дышетскизы крезен удмурт гуръёсты шудыны.

Улосвыл программае пыриськем куноос Ижысь лобӟизы Сочие — фестивальлэн валтӥсь люкетаз. Тросэз соос пусйизы: улосвыл программае пыриськымтэ эшъёссы туж троссэ тодытэк кылизы. Ушъяськыны луэ: таӵе программаос радъяськизы Россиысь 15 регионъёсын гинэ, соос пӧлы сюрыны шуд усиз Удмуртилы но.

Крезен шудыны дышетско.

— Мон ачим мылкыдме верай Иже мыныны, малы ке шуоно та индустриальной, 3 дауръем историен город, — шуэ Болгариысь Борислав. — Россиын мон нырысьсэ, но табере выльысь вуылэме потоз, дыр, мукет интыосы но.

Вери-вери хорошо!

Кунсьӧрысь куноосын ӵош ялан вал Удмуртиысь егитъёс. Соос мадизы элькунмы, сям-йылолъёсмы, тунсыко интыосмы сярысь. Котькудӥзлэн та программалэсь аслыз мар ке выльзэ, пайдаёзэ басьтэмез потэ вал. Мон, кылсярысь, пыриськи англи кылэз тодэ ваён понна: программа быдэсак ортчиз ӟуч но англи кылъёсын. Татын ини шӧдӥськиз: асьме егитъёс кунсьӧр кылъёсты ляб тодо, нош палэнысь лыктэмъёс соин лад-лад вераськыны быгато. Соосъя ми но тыршимы англи кылмес волятыны, онлайн-переводчикъёсын сьӧразы ветлӥмы. 4 нунал ӵоже кылъёсмы сураськыны кутскизы. Серемес вал «вери-вери хорошо» (туж-туж умой) выллем предложениосты кылыны.

Кырӟа — Богдан Анфиногенов.

Тросэз куноосмы ӟуч кылын но ӟеч верасько яке дышето вылэм.

Кун сьӧрысь котькуд куноен вераськыса, мар ке выльзэ, тунсыкозэ тодылӥмы. Кылсярысь, Пакистанысь Сана шуиз, солы, пе, чик умой ӧз поты музейёсысь дуно выж лёгетъёс вылтӥ ветлыны — соосты утёно ук, музейысь мукет арбериосты сямен! Египетысь Хуссейн одӥг нылашмылэсь юаз: «Нош малы тон мыняськод, тон ӟуч ук?» (соос кожало, россиын кунэрес мылкыдын уло шуыса). Египетысь ик Ахмед олокӧня пол вераз, Удмуртиын туж кезьыт, табере со тодэ, кыӵе со — ӟуч тол шуыса (ми серекъям гинэ: та тол ӧвӧл ай…)

— Мон малпасько, Сочие фестивале ӧм мынэ ке но, фестиваль ачиз дорамы лыктћз, — шуэ Дэриысь Олеся Климова. — Сочиын 20 сюрс егитъёс пӧлын кинэн гинэ вераськыны вуттод меда? Нош татын милям котькудӥныз иностранецен тодматскыны, культуразы, проектъёссы сярысь юаськыны тырмыт дырмы вал.

Кытын удмуртъёс?

4 нунал ӵоже куноос тодматскыны кулэ вал кӧня ке ӟуч кылъёсын, соос пӧлын «спасибо», «любовь», «песня» но мукет. Но программаямы удмурт культураен но тодматсконлы трос дыр висъяськиз бере, амалтэк удмуртъёссэ но кылъёсты тодӥзы. Кылсярысь, Ганаысь Марк «спасибо» кылэз нокызьы йыраз ӧз поны, соин котькытын «тау» шуылӥз.

Но удмуртъёс программаын чиньыен лыдъямон вал, соин тросэз понна асьмеос музейысь калык выллем кылим кадь.

Егитъёс перепеч куто.

Мон доры кӧня ке пол вайылӥзы кунгожсьӧр куноосмес но, чиньыен возьматъяса, шуылӥзы: учкы, со зэмос удмурт. Шорам музейысь шер пумиськись арбери шоры кадь учкылӥзы, туспуксьылӥзы. Нош Казахстанысь Фарида паймиз:

— Вераллязы, удмуртъёс, пе, гордэсь. Мон гордъёстэс туж ӧжыт адӟи, соин малпай, удмуртъёс кӧня ке гинэ татын…

Но удмуртъёс сярысь туж ӧжыт тодо вылэм вӧзамы улӥсь мукет калыкъёс но. Автобусъёсын ветлыкумы, милемлы возьматъязы удмуртъёс, сям-йылолъёсмы, тунсыко интыосмы сярысь киноосты. Ӟуч эшъёсмы соосты туж паймыса учкизы, сыӵе троссэ, пе, ӧм тодылэ. Куке милемлы ивортӥзы, «Эктоника» дискотекае мыном шуыса, Удмуртиысь егитъёс йыръёссэс ошылӥзы: уг тырмы вал милемлы арган шудэм улсын удмурт эктонъёсты быдэстыны… Но огез нылаш вазиз: «Тӥ мар, со арганъя дискотека ӧвӧл, отын Богдан Анфиногенов кырӟа!» О, малпасько, Богданэз ке но тодо…

Эктонэн но П. Чайковскийлэн крезьгуръёсыныз пумитало Воткинскын.

Кунсьӧр егитъёс, удмуртъёс сярысь гинэ ӧвӧл, Удмуртия сярысь но тросэз нырысьсэ кылӥллям. Польшаысь Йоанна шуиз:

— Тӥляд сыӵе чебер шаерды, сыӵе тунсыко культурады, сям-йылолъёсты! Тӥледлы ӵемгес дунневыл ужрадъёсы пыриськоно, асьтэ сярысь тросгес фильмъёс, роликъёс лэсьяно, туристъёс мед вуылозы шуыса. Яке, милемыз сямен, ӧтчалэ куноосты асьтэ доры кыӵе ке бадӟым ужрадъёсы — со туж юрттоз шаердэс адӟиськымон карыны. Та ветлэме сярысь мон одно ик верало университетын ӵош дышетскись эшъёсылы, малпасько, соос но шумпотыса вуылозы Удмуртие.

Елена Рябина

Удмурт Дунне
By Удмурт Дунне Октябрь 18, 2017 13:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<