«Удмурт дунне» газет Пичи Пурга ёросысь Куреггуртын визьсынан шудон ортчытӥз

Удмурт Дунне
By Удмурт Дунне 30 октября, 2017 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арня вискын Пичи Пурга ёросысь Куреггуртын «Удмурт дунне» газет ортчытӥз ёросысь лыдӟисьёс пӧлын визьсынан. Сое радъяны юрттӥзы С.Самсонов нимо ёрос библиотекаын ужасьёс. Вожвылъяськонэ 6 гуртысь командаос пыриськизы. Вормизы Гожня гуртысь визь погъёс.

Йырзэс тӥяло юриос.

 

Куреггуртысь «Азвесь нюжаос» ансамбльын кырӟась нылкышноос, кин гинэ доразы уг лыкты, ваньзэ клуб азбаразы, буко вамен поттыса но кырӟаса, пӧсь зыретэн табанен пумитало. Гуртысь кышноослы таӵе ӟеч мылкыд сётэ гуртысь староста Олег Дыгаев.

Сьӧр гуртъёс вуэм бере ваньмы кыстӥським культура юртэ. Чаклам ужрад ӧраз пыриз. Командаосын тодматскон ортчиз — Куреггуртысь «Шумприч песянайёс», Гожняысь «Песьтэръёс», Баграш-Биграысь «Мылкыд», Эграысь «Ӟеч мылкыд», тужгес кыдёкысьёсыз — Кечолысь «Уллапал кенакъёс» но Улын Юриысь «Ошмесъёс». Эсьмаса, нылкышноос тур-тур ик удмурт дэремъёссэс но туго кышетъёссэс керттылӥллям.

— Асьмеос ӵемысь пумиськылӥськом, но тазьы нырысьсэ люкаським, нош мугез — «Удмурт дунне» газет сярысь тодэммес но лыдӟеммес возьматом, соос туннэ асьмелэсь визьмес сыналозы, — шуэ ёрос библиотекаын ужась Елена Абдрахманова.

Шудонын вормон но ӟеч мылкыд сӥзизы Пичи Пурга ёросысь культурая, спортъя но туризмъя отделэн кивалтӥсь Марина Орлова но гурт кузё Олег Дыгаев.

Газетлэн ортчем сюресэныз но туннэ нуналэныз тодматӥз валтӥсь редактор Зинаида Рябинина. Со пусйиз: газет возиське тӥ кадь мыло-кыдо лыдӟисьёслы луыса. Со сяна, тӥ, пургаос, сое лэсьтӥськоды но шуыны луоз: «Советской Удмуртиен» 20 ар кивалтӥз Василий Михайлов. Туннэ но газетэз поттонын 9 кузя пургаос тыршо.

Бӧрсьысь бӧрсе юанъёс — кин соослы ӝоггес но шонер валэктон сётоз, со ик нырысетӥ интые потоз. Юанъёс тунсыкоесь: тодоно газетлэсь кылдэм аръёссэ, соин герӟаськем лыдпусъёсты, отын ужам адямиослэсь нимтулъёссэс, газет бамысь гожъямъёсты, калыклэсь визь кылъёссэ но мукет.

Тунсыко учыр пӧрмиз: куинез — Баграш-Бигра, Гожня но Куреггурт — командаос одӥг кадь — 12 но ӝыны балл — люказы. Ужрадэ пыриськисьёс рос-прос дасяськыса лыктӥллям, лыдӟиськыны яратэмзы соку ик шӧдӥське: шонер валэктонъёссэс, тысез куадам кадь, сётъязы. Но куиньзэ ик командаез вормисьёс радэ уд пырты ук, выльысь вожвылъяськон пуромиз. Таяз радэ ини юанъёс эшшо но шугесьгес вал, «Удмурт дунне» газетлэн кузь но яркыт улон сюресэз сярысь пыр-поч валэктыны быгатӥзы Гожня гуртысь «Песьтэръёс». Соос ик вормисьёс луизы. Шудонэ мыло-кыдо пыриськизы удмурт кылъя но литературая дышетӥсьёс Раиса Павлиновна но Владимир Александрович Герасимов кузпалъёс, Гожня школаысь библиотекарь Зинаида Елизарова, «Зангари» нылпи садысь воспитательёс Ирина Зайцева но Галина Шилова.

Гожня командалэн азьветлӥсез — библиотекарь З. Елизарова.

 

Гожняослы удалтӥз — соос 10 сюрс манет тыр сертификат но ческыт кузьымъёс утӥзы. Мукет командаос но кузьымтэк ӧз кошке — «Удмурт дунне» энциклопедиез басьтӥзы.

Эсьмаса, учкисьёс но ӝытбыт, вень йылын кадь, куалекъяса пукизы — гуртысьтызы лыктэм командазы понна висизы.

— Та шудонын пукыса, мылкыд ӝутӥськиз но бурдъяськиз, ачид но командаын йырвизьдэ бергатӥськод кадь. Нош кӧня выльзэ, «Удмурт дунне» газетлэсь историзэ эшшо но мур тодӥмы. Такем тунсыко шудон-визьсынанъёсты џемысь ортчытъяно вылэм, гурт калыкез интыысьтыз вырӟытъяно, — шуэ Улын Юри гуртысь Яшагай (Яков Петров).

Калыкез чебересь кырӟанъёсын шулдыртӥзы Кечолысь «Уллапал кенакъёс», Эграысь «Мылкыд», Улын Юриысь «Ошмес» ансамбльёс.

 

Любовь Тихонова

Туспуктӥз А. Горбунов

Удмурт Дунне
By Удмурт Дунне 30 октября, 2017 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<