Танкъёслэн биатлоназы Россилы вормыны юрттӥз удмурт пиосмурт

Удмурт Дунне
By Удмурт Дунне 16 октября, 2017 16:07

Пичи Пургалась Л. Петров танкъёслэн биатлоназы 1-тӥ инты басьтӥз.

Леонид Петровлы араз 1 пол гинэ вордӥськем палъёсаз, Пичи Пурга черкогуртэ, бертылыны кылдэ. Со Абхазиысь Лымшор военной округысь (ЮВО) танк роталэн командирез луэ. Туэ август толэзе нимыз быдэс Россия тыр чузъяськиз — танкъёслэн биатлоназы Петровлэн экипажез 1-тӥ инты басьтӥз!

Юн кариськытэ форма

Леонидлэсь Удмуртие бертэмзэ семьяез гинэ ӧз витьы. Соин пумиськыны черод кылдӥз: ӵыжы-выжыосыз, гуртоос, пиналъёс, дышетӥсьёс, журналистъёс… Отпускез 2 арня кыстӥськиз. Котькуд нуналэз ужрадъёсын тымиськемын вал. Кошкон азяз ожгарчиен кенешыны мыным но шуд усиз. Ӝужыт, сӥлё-виро Петровез адӟыса, пайми: кызьы та быдӟа мугорын ӟоскыт танк пушкы шаплы пырыны-потыны луэ, кенӟали кадь?

— Ӝуждалае 1 метр но 80 сантиметр, — серектэ Леонид. — Но мугорыд пичи яке быдӟым — пӧртэмез ӧвӧл. Ӝоглык аръёсын кыда. Казаньысь вылӥ военной училищеын дышетскыкум, мынэсьтым но ӝужытъёсыз, тазаосыз вал. Соос но танке капчиен пыраллязы-поталлязы.

Пичи дыръяз Петров ожгарчи луон сярысь ӧз ик малпаськылы. Ма, адӟем карыны но нокинлэсь вал — ӵыжы-выжыосыз пӧлын одӥг военнойзы но ӧвӧл. 11-тӥ классэ вуыса, пияш йырзэ тӥяны кутскиз: кудзэ быръёно — гражданской яке военной дышетскон учреждениез. Сюлэмыз — визьмыз-а шуод — бырйиз кыкетӥзэ: жаль потӥзы анаез но атаез.

— Семьяямы ми 5 нылпиос, мон — кыкетӥез, — вера капитан. — Котькудмес дышетон понна трос уксё кулэ. Тае малпаса, ожгар удысэз бырйи. Казаньысь училищеын пиосты дышетӥз кун. Дӥсьлы, улон интылы, сиён-юонлы анай-атайлэсь коньдонзэс ёртоно ӧз луы ини.

Матысь адямиосыз сярысь сюлмаськон Петровлэн вираз пичиысен пыӵамын. Та сярысь вера анаез но. Татьяна Петровна 2 ужын тыршылӥз. Нуназе — ёрос больницаын санитарка, ӝытазе — администрациын утялскись. Татысь выжъёсты куддыр миськылӥз Лёня но, но та сярысь эшъёсызлы ӧз вералля. Соку Татьяна Петровна пиезлы валэктӥз: ужаны возьдаськоно ӧвӧл — кыскыны, юыны, йыруж лэсьтыны кепыр ваёно!

Туэ ӵошатсконлы январь толэзьысен ик дасяськыны кутскиллям.

— Училище, форма нуллон улон шоры учконме быдэсак воштӥзы, — веранзэ азьланьтэ Леонид. — Вань шузи-мази малпанъёсы тӧлӟизы. Пушкам дисциплина кылдӥз.

Казань бере егит лейтенантлэн службаез ортчиз нырысь Ростов, Ставрополь палъёсын, собере — Абхазиын. Татысен Петров нырысетӥ малпанзэ быдэстӥз. Вордскем шаераз аслаз басьтэм машинаеныз бертӥз. Бӧрысь ини, танк биатлонэ пыриськыса, 2-тӥ машинаез кылдӥз: 1-тӥ инты понна экипажезлы «Лада» кузьмазы.

Сэзь адями вӧзын техника но юн

12-тӥ августэ биатлон ортчиз Москва котырысь Алабино военной базаын. Отчы кужымзэ мертаны вуиз 19 кунысь 55 экипаж. Финалэ потӥзы Россия, Китай, Казахстан но Белоруссия.

Солэсь азьвыл Россия устоосыз пӧлысь устооссэ танкистъёссэ бырйиз. Соосты шараян понна кунысьтымы 40 полигонын ӵошатсконъёс радъяз. Отын 3 сюрс 500-лэсь ятыр солдатъёс вожвылъяськизы. Пӧлазы вал Петров но. Дунъясьёслы Леонид туж кельшиз. Озьы сое экипажлы командире юнматӥзы, бордаз механик но наводчик пуктӥзы. Ватсано: талэсь азьвыл Петров биатлонэ вуылӥз ни вал, но вормон ныр улысьтыз пегалляз — танкез тӥяськылӥз.

Туэ биатлон танкистъёслэсь лулсэрзэс зол бичатӥз. Кыӵе маршрут, кӧня мишень — тодӥзы старт азьын гинэ.

— Туэ ӵошатсконлы январь толэзьысен ик дасяськыны кутскимы, — вера капитан. — Т-72 Б3 танкмес тупатъямы — 840-ысен 1 сюрс 130-озь кужымзэ будэтӥмы. Мугормес но кыдатӥмы, лулпушмес но дасямы — психологъёс милемын 2 толэзь ужазы. Кин ке шуэ: малы психологъёс кулэ — танкысь мишене ыбылыны секыт шат? Но техникалэн ӟеч ужамез адями бордысь потэ. Нош со понна лулыд кужмо, визьмыд сазь луыны кулэ. Кышкан но дырекъян вормыны медаз люкетэ.

Туэ биатлон танкистъёслэсь лулсэрзэс зол бичатӥз. Кыӵе маршрут, кӧня мишень — тодӥзы старт азьын гинэ. Таӵеез азьвыл ӧй вал. Озьы котькуд команда пӧртэм шуг-секытъёсын ог 16 иськем сюресэз — 12 кругез — ортчоно, 24 мишене йӧттоно луиз.

— Вожвылъяськон азьын кышканэ вал ик, — шуэ Леонид, — но 12-тӥ август вуиз но, со кытчы ке сылмиз. Сюлэм зол жугиськиз старт азьын гинэ. Та дыр туж кема кыстӥськиз кадь. Но сирена шудэм, танке пыреме бере вань сюлмаськон тӧлӟиз. Ӧй адӟы ни ми понна «висисьёсты» но, телекамераосты но — быдэсак техника пушкы выйи. Берпуметӥ кругез ортчыкумы гинэ, гань-гань кариськи. Угось тушмонъёсмы милесьтым бере кылизы. Приборъёс пыр трибунаез эскерыны кутски. 16 сюрс пала адями сылыса чабе!

Та вакытэ анаез Татьяна Петровна дораз телевизор азьын семьяеныз «ура!» шуыса черекъяса пуке вал ини. «Что творит капитан экипажа Петров!» — аслэсьтыз ӝутскем мылкыдзэ ватыны ӧз быгаты ини комментатор Дмитрий Губерниев но. Вормонлы ӧз оскылэ соосыз но, таосыз но. Угось полуфиналын азьпалан мынэ вал Китайысь команда. Но финише асьмелэнъёс шаплыгес вуизы — 1 час 45 минут но 43 секунд куспын.

Компьютер сьӧрын ожгарчи уг луо

Вуоно арын но Россиын танк биатлон ортчоз. Но отчы Леонид пыриськыны уз быгаты ини — ӵошатсконлэн куронъёсыз сыӵеесь. Озьы ке но егит капитан ӵошатсконъёслэсь палэнскыны уг малпа. Та удысъя сомында тодон-валанъёсыз люкаськемын — дыр вуэмын кивоштӥсьёсты будэтыны.

Танкъёслэн биатлоназы Петровлэн экипажез 1-тӥ инты басьтӥз!

Абхазиын Л. Петров ӵапак дышетонэн выре. Котькуд тулыс но сӥзьыл дораз выль призывникъёс вуо. Соослы танклэсь пуштроссэ усьтэ.

— Шумпотӥсько, туала арын кунмы армилы бадӟым саклык висъя, — вера танкист. — Тае ми туж умой шӧдӥськомы. Куашкан калэ вуэм частьёс али пушйыны кутско, туала техника лыктэ. Зэм, куд-ог призывникъёс ужаны мылкыдэз быдто. Армие кужымзэс, тодон-валанзэс будэтыны уг лыкто — военной билетэз гинэ кулэ каро. Умойтэм соиз но: 1 ар служба — со туж ичи. Тани танкез кутсконысеныз пумозяз дышетыса вуттӥськомы гинэ — призывникъёслэн бертон дырзы вуэ. Татын 5 ар пала ужатозям, валай ини: гуртысь лыктэм егитъёсын ужаны капчигес — техника котыре кизы но мынэ, тунсыкъяськон мылкыдзы но шӧдӥське.

Пичи Пургалась школаын, библиотекаын пумиськонъёсын пиналъёс егит ожгарчиез юанэнызы согылӥзы: Интернет пыр танкен шудыса, адямилэсь, пе, танкист пӧрмоз-а? Леонид Петров соослэсь мылкыдзэс куашкатӥз: ожгарчи луо, нуналысь нуналэ ас бордазы ужаса гинэ.

Ольга Корепанова

Удмурт Дунне
By Удмурт Дунне 16 октября, 2017 16:07