Антонида Ермолина: Шуд уг алдаськы

Удмурт Дунне
By Удмурт Дунне Октябрь 16, 2017 15:30

Антонида Ермолина.

Дунне вылысь мон тодӥсько чиньы вылэ тэрымон гинэ нылкышноосты, кудъёсызлэн ӧвӧл одӥг но шексы! Одӥгез соос пӧлысь — «Кенеш» журналын ужась журналист но кылбурчи Антонида Ермолина.

Пальышась

Сайкыт, визьмо, сабырлы, тунсыко, котьку капчи мылкыдо… Мыным потэ, со азьын ноку одӥг адями но шӧтэм кыл вераны яке йыртэманы уг дӥсьты, малы ке шуоно со укыр ненег. Мон ачим но трос тодмоосы пӧлысь со азьын гинэ возьдаськисько уртчылӥсь сямылэсь.

Огдыре ми ӵош ужам «Ӟечбур!» газетын. Вакытъёс секытэсь вал: уждун уг сётъяло, нуназеоссэ кабинетын черодэн картош пӧзьтӥськом. Ваньмы вуӵкетӥськом, нош со ялан пальпотэ. Пичи нылыз но картэз сярысь вераны кутске ке — шунды потэ кадь, сокем аслыз но, милемлы но шуныт луэ.

Нуназеям бере ӝӧк сьӧраз пуксе но, «нылъёс, кылзэ ай» шуыса, юнкоръёслэсь кылбуръёссэс лыдӟыны кутске. «Зол, о-о ведь?» — шумпотыса юа милесьтым. Ӧйтӧд… «Ну, кылзэ ай эшшо огпол. А эшшо тани суред но ыстэм! Ой, чебер, о-о ведь?» — нош ик лӧптэ со пиналлэн ужезлы но пумен «туж зол кылбурез» волятыны кутске. Но чутрак ноку уг гыры — пинал гожъяськись аслэсьтыз кибервылзэ медаз ышты.

Кылбурась

Ачиз Антонида Васильевна пичи дырысеныз кылбур гожъя. Но малы ке соосты ялан ватыса возе. Аслам кылбур бичетэ потэм бере солэсьёссэ адӟыса, малпай: тӥни кинлэсь книгазэ поттоно вал мынамез интые. Но со малы ке ужъёссэ издательствое озьы ик ӧз сёты. Оло, зарни юбилеезлы сыӵе кузьым лэсьтоз, малпай. Но ӧз, Тоня — со ваньмыз кадь ӧвӧл — улонзэ лыдпусъёсъя радъянэз кулэен уг лыдъя. Малы кылбуръёстэ жаляськод книгаен поттыны? — юасько ни кӧня ке ползэ.

«ӟечбур!» газетын ужакуз.

— Кылбуран — со яратон ук… Сое одно шарае поттыны кулэ но ӧвӧл, дыр. Собере, мыным со укша кадь потэ ноку бызьылымтэ нылкышнолэн та быдӟа арлыдаз вуыса выль кен кариськыны турттэмезлы. Витьтонозь писатель ӧй кариськы бере, ӵок-а, мар-а ни…

Гожъяськисьёс туж трос ук, мынам асме чик висъяме уг поты. Ӵош будэм эшъёсы пӧлын но гожъяськисьёсмы ӧжыт ӧй вал, огвакыт ваньмы сямен Алнаш ёрос газетлэн «Ошмес син» огазеяськоназ ветлылӥмы. Сое угось гуртысьтымы потэм кылбурчи Иосиф Иванов радъялляз, ас гуртооссэ бурдъяны быгатэ вал. Байтэрек школаямы кырӟаны быгатэмзэ нокинлэсь ӧз юаллялэ, ваньмес хорын кырӟатылӥзы. Школамылэн директорез Л. Белоусов удысэзъя биолог ке но, кырӟан но гожъялляз. Одӥг пол монэ аслаз кабинетаз ӧтиз но аккордеонэн шудыны ӧдъяз. Та гуръя, пе, кылбур гожтоно. Урокын пукон вискам со нуналэ ик гожтӥ. Озьы мынам ӟуч кылын нырысетӥ кырӟанэ кылдӥз. Ёрос ӵошатсконын кырӟанмы нырысетӥ интые потӥз. Крезьгуръя дышетӥсьмы Пётр Чернов но кылбурея гур гожтӥз. Удмурт кылъя но литературая дышетӥсьмы Владимир Семёнов баянэн шудылӥз. Школалэн одӥг юртысьтыз мукет юртаз, арганзэ кыскаса, мынылоз вал, нош ми сьӧраз бызиськом. Владимир Никифорович одӥг ар сяна ӧз ке но дышеты, солэн кенжытэм тылсиез кысонтэм луиз. Собере со кошкиз, но гожтэт ысъяз на, кыӵе-мар дышетскемдэс, кылбурамдэс «Дась лу!» газетэ гожъямдыя адӟисько, пе. Сыӵе тӥни лӧпкытыны быгатъяз. Кытын меда али?

Соин Иже дышетскыны вуыса гинэ, тодӥ, ваньмыз уг но кылбурало, уг но кырӟало вылэм шуыса… Паймылӥ, куке кылбурчиосты йӧспӧртэмен лыдъяллязы.

Д. Яшинлэн литературно-творческой кружоказ 1980-тӥ аръёсы А. Семёноваен но Р. Ларгинаен џош.

Кырӟась

— Но соку валай, макем мыным удалтэм семьяеным но, вордскем интыеным но. Анай-атай огшоры колхозникъёс вал, но соослэн пуш дуннезылы, лулчеберзылы мон весь синмаськисько. Анай одӥг ужзэ но кырӟатэк ӧз лэсьтылы, атай весь лыдӟиськылӥз, милемын книгаосысь чуръёсын (цитатаосын) вераськылӥз.

Ми 9 пинал будӥм, ваньмы кырӟаллямы-кыл-бурамы. Али атаймы кылле ни, но адскыны бертӥськом ке, дэмен кырӟаськом, валесэз азьын эктӥськом, со туж шумпотэ.

— Сомында пинал пӧлысь кудӥныз ке нимысьтыз данъясько-а?

— Аняез вераськод-а? (Удмуртиысь калык артистка Анна Плотникова — авт.). У-уг, мыным озьы уг поты. Ас понназы котькудмы понна шумпото, дыр, но кызьы ке нимысьтыз ушъяны, висъяны — ноку но. Ваньмес огкадь ярато, лякыт верасько, шуныт пумитало. Анялэн но нокыӵе кизилияськон сямыз ӧвӧл. Сузэреным кусыпъёсмы сярысь верано ке, мынам «кизилияськылэме» вань пичи дыръямы. Бадӟымгес пиналъёс, клубе люкаськылыса, гужем но, тол но ас кожамы концертъёс дасяллямы, нуналлы быдэ репетицие люкаськиськом вал. Мон сьӧры Аня куриське, нош мон сое уг лэзиськы, пичи на тон, шуисько. Берло будэмез бере ни вераз, апай ӧз лэзьы бере, клубе пырыны уг дӥсьтӥськы, пе, укно улын, кырӟамзэс кылзыса, пукисько-пукисько но, бертыса чуланын со гуръёсты арганэн шудыны дышетскисько. Вот озьы обидеме вань вуоно калык артисткаез (серекъя).

Вордскем гуртаз гужем шутэтскыкуз Аня сузэреныз, Алиса нылыныз но вынызлэн пиналъёсыныз.

Сомында пинал будэ-тӥзы ке но, ми чик ӧм кылылэ анай-атайлэсь улон вылэ ӝожтӥськемзэс, коньдон ӧвӧл шуэмзэс. Арганмы но, великмы но вал. Тышкаськылэмзэс но уг тодӥськы. Яке мон, бадӟым апай шуыса, асме умой возьыны тыршисько вал, дыр.

— Анна Плотникова, кырӟам сяна, ачиз ик крезьгура но, тон кылбур гожъяськод — тӥ џошен кырӟан гожъянъя фабрика кылдытыны быгатысалды, дыр. Анайдылы сӥзем кырӟанды туж сюлэме пырись ук.

— Со пырак одӥг гинэ валче ужмы. Мынам уг поты «ӧнерчи» луэме, кырӟан мукет сямен кылдыны кулэ кадь потэ. Анялэн нырысь крезьгурез кылдэ, мынам — кылъёс, пӧртэм сямен малпаськиськом, дыр… Соиз но кырӟан лушкем пӧрмытэмын. Сузэре, мынэсьтым юатэк, текстме басьтэм, выльысь озьы эн кары ни, шуи.

Волятӥсь

— Кылбуран таланттэ вужере кельтыны выриськод ке но, улон кожъёс тонэ писательёс доры ик вутто…

— Ноку но ӧй малпалля, озьы луоз шуыса. 23 ар «Ӟечбур!» газетын ужаме бере туэ «Кенеш» журналэ вуи. Кудӥз юа: нылпиослэсь жадид, дыр? Зэм верасько: чик ӧй, кызьы нылпиослэсь жадёд? Мыным туж кельшылӥз нылпи газетын ужаны, но улон кыӵе ке выль ӧр ӵектэ ке, эскерытэк палэнскыны уг яра, дыр. Вылаз ик, мынам «урод» сямы вань — мон малы ке зэмась вӧтъёс адӟылӥсько. Озьы туэ тулыспалэ уйвӧтам мыным Егор Загребин сяська кузьма кадь, ӟечкыласько, пе… Со уе ик Трофим Архиповез но адӟи на. Сайкаме бере кема малпаськи: марлы меда монэн писательёс вераськизы? Ӵуказеяз ик «Кенеш» журналлэн редакторез Ольга Бородина аслыз воштӥсь луыны ӵектӥз… Табере зэмзэ но котькуд нуналэ писательёсын, литератураен герӟаськемын. Таиз но удыс туж кельышлы.

Моряксэ витиз 3 ар.

— Шуо, бадӟым писателез лэсьтэ редактор…

— Оглюкетэз татын зэмез вань кадь потэ. «Ӟечбур!»-ын ужакум ай, сётъязы тодмо удмурт писательёслэсь произведениоссэс газетэ поттон вылысь дасяны. Зэмзэ вераса, нырысь пайми вал, кызьы сыӵе бадӟым адямиос янгышъёсын гожъясько, малпаськон ӧрзэс вошъяло, кыӵе ке учыръёсты сурало, но валай: писатель улэ аслаз произведениез пушкын, со уг быгаты сое муртлэн (лыдӟисьлэн) синмыныз дунъяны, янгышсэ адӟыны. Собере, солэн дырыз но ӧвӧл, дыр, котькуд правилоез чакласа, гожъяны, текстэзлэн чылкытлыкезлы трос дыр висъяны. Произведениын валтӥсез — малпан. Нош редакторлэн ужпумез — сузян, волятон — алмазлэсь бриллиант лэсьтон выллем. Нырысь уг дӥсьтӥськы вал тупатъяны, кожалляй, писательёс уз лэзе кибервылзэс исаны, но озьы вылымтэ, кудӥз тау но каре ай. Малпасько, одӥг редактор но текстэз юромо урод уз кары.

Яратӥсь

Нош нылпиослэсь мӧзмыны Антонида Васильевналы уг сёты нуныкаез — Алиса нылызлэн Арина нылыз. Ӟабыльтокез син куспын оломар но малпа. Ӵошен кылбурало, кырӟало, суредасько. Нылдэ будэтыкуд, аслыд туж визьмо потӥськод, одно ик вазьгес лыдӟиськыны-гожъяськыны мед кутскоз кадь, косъяськон дыръёс но луо вал, нош внучкаен ваньмыз воксё мукет — ваньмыз шудыса сямен пӧрме, шуэ Антонида Ермолина.

Та нылкышно паймытэ семья кусыпъёсын туж сабырлы луэменыз — куке ваньмыз ог-огзыя анай-атайёссылэсь яна потыны выризы, со туж тупаса улӥз картэзлэн анаеныз, со уг вала, кызьы, трос аръёс уртче улыса, кузпалъёслэн яратонзы кысэ, солы одӥг липет улын уг люкеты нылызлэн семьяез — ачид ке яратондэ уд жаляськы, шуд уг алдаськы, шуэ со, нош ик мусо пальпотыса.

Зинаида Рябинина

Антонида Ермолиналэн кылбуръёсыз

Адымо*

Антонида Ермолина
Тӥ дыртэ,
Нош мон уг дырты.
Уг дырты туннэ ке но.
Сяськалы но, оло,
кузьмало мон,
Вутто на,
Пальышанме.
Тӧлӟемезлэсь азьло.
Тӥ дыртэ,
Нош мон уг дырты.
Кема, туж кема
мыно.
Уӵыен но, оло,
верасько мон,
Вутто на,
Чалмемезлэсь азьло.
Тӥ дыртэ.
Мыштэс учкиды ке,
шуэ:
Кыӵе со кылем бере.

*Адымо — иноходец

 

Гур быръён
Шулдырзэ ойдо мытом,
нылы,
Кырӟанмес.
Сьӧд кайгу уз ни шедьты
соку
Сюресэз.
Мед ветлоз йыромыса ай,
Мед.
Мед ачиз ик нёжъялоз
Ӝож гурзэ.
Нюлэскы со мед кошкоз,
Сьӧд тэле.
Шурали мед бичатоз
Пыдъёссэ.
Со ачиз серекъяса ик
Пуштоз.
Шулдырез кырӟан
соку
Вордӥськоз.

 

Визьмаськон
Кузь вал мынам
йырсие
Люгы пӧлтӥ бызьыкум.
Одӥг, кык, сизьым,
дас…
Люгы йырсиме сураз.
Йырси кылиз вакчигес,
Нош йырвизь луиз
кузьгес.

 

Пегась
Черк вӧзысь турын пӧлын
Инмарен ми шудӥмы.
Нунал лумбыт ик отын
Огмес огмы утчамы.
Ай соку мон нырысьсэ
Инмарлэсь адњи туссэ:
Шунды си сямен васькиз,
Лысву вылтӥ погыльскиз.
Бичатӥз пыдтышъёсме,
Я, пе, шедьты ай монэ.
…Черк вӧзысь турын ӝужда
Мон ӧвӧл ни табере.
Йырам кышет  керттыса,
Пырисько тани черке.
Ялан астэ утчасе
Кельтӥд монэ,
Инмаре.

 

Удмурт Дунне
By Удмурт Дунне Октябрь 16, 2017 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<