Нырысетӥ интыын — быгатон!

Удмурт Дунне
By Удмурт Дунне Октябрь 12, 2017 11:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ортчем субботае, 7-тӥ октябре, Удмуртилэн Тӧроез Александр Бречалов но Правительствое выль быръем муртъёс пумиськылӥзы журналистъёсын. Валэктонъёс сётӥзы вань юанъёслы — бышкисьёсызлы но.

Удмуртилэн Тӧроез А. Бречалов: адямилэн кытысь луэмез нырысетӥ интыын луыны кулэ ӧвӧл.

Кадръёс сярысь

Бышкись юанъёс пӧлы пыртыны луэ  нырысетӥзэ ик: малы Удмуртилы сомында москвичъёс, вазен соослэн улон-вылонзы, ужзы нокызьы герӟаськемын ӧй вал ук шаеренымы.

— Адямилэн кытысь луэмез нырысетӥ интыын луыны кулэ ӧвӧл, нырысь ик лыдэ басьтоно солэсь опытсэ, профессионализмзэ но азяз пуктэм ужпумъёсты быдэсъяны дась луэмзэ, — вераз А. Бречалов.  — Кылдытыны чакламын Удмуртиез азинтонъя корпорация — солы кивалтӥсь быръён вылысь али конкурс ялэмын. Россиысь 30 улосысь резюмеос вуизы ни. Россиысь луисьтэм муртлэн но туж кужмо, тунсыко ӵектонъёсыз вань. Татын номыр умойтэмез ӧвӧл. Быръёно устооссэ! Удмуртилэн азьвыл командаезлы озьы ик луонлык сётэмын вал асьсэдыз возьматыны. Жаляса верано, пӧлысьтызы огез-кыкез гинэ валазы, мар зэмзэ но куро соослэсь. Туэ 5-тӥ апреле Удмуртие вуыкум, мынам али кадь командае ӧй вал, соос эшъёсы пӧлы ӧз пырылэ. Ваньзы  туж чурыт эскеронъёс пыр потэмын.

Туннэ ӧвӧл на юнматэмын Правительстволэн Тӧроезлэн кыкез воштӥсьёсыз. Та интыосы тыро-пыдо кандидатураос шедьтымтэ, пе. Но дыртыса соосты уг но утчало. Кызьы вераз Удмуртилэн Тӧроез: соос чакласа возьыны кулэ луозы ЖКХ-ез, сюресъёсты, озьы ик гурт удысэз, инкуазез утёнэз — ваньмыз таос туж кулэ удысъёс, кудаз-огаз нырысь ик порядок кылдытоно. Соин ик та удысъёсты али меӵак ас вылазы басьтӥзы Удмуртилэн Тӧроез но Правительстволэн Тӧроез.

А. Бречалов верамъя, али пыр-поч вераны уг луы на, ку тодмо луозы вань министръёс но. Талы нимысьтыз нунал юнматымтэ: тупась адями сюриз ке — юнматозы.

Коньдон сярысь

— Тодӥськоды-а, кыӵе тыриськонъёсын Удмуртия 2017-тӥ аре пыриз: ар пумозь 52 миллиард манет люкаськыны кулэ вал, кылем арын борды эшшо 3 миллиард ватсаськыны быгатысал, — пусйиз Александр Бречалов.  — Апрельысен кутскыса, ужаськом та лыдпусэз кулэстон бордын — кылёз ог 49 миллиард манет пала. Озьы кӧня ке но коньдонэз шыръяны быгатӥм. Банкъёсысь бадӟым процентэн басьтэм кредитъёсты кун кредитъёсы выжтон бордын ужано на — нырысетӥосыз сётӥсько 9,7 процентэн, кыкетӥосыз — 0,1 процентэн. Нош 49 миллиард манет пӧлысь 31 миллиардэз басьтэмын бадӟым процентэн. Процентъёссэ тырыны гинэ ог 3,6 миллиард манет кошке.

Вылаз ик, бюджет 5 миллион манет пала дефицитэн юнматэмын вал. А. Бречалов верамъя, 3 миллиард манетсэ пытсаны луиз ни. Оскон вань, кылемзэ берыктон вылысь, ар пумозь Россилэн казнаысьтыз юрттэт вуоз шуыса.

Коньдонэз шыръян калыклэн улон-вылонэз — пенсиос, пособиос но мукетыз вылын — уз шӧдӥськы. Утчаны чакламын мукет амалъёс. Кылсярысь, куд-ог министерствоос но ведомствоос машинаоссылэсь куштӥськизы, кулэ луыкуз таксие пуксё — озьы толэзь куспын ог 130 сюрс манет шыръяське.

Журналистъёс юазы на: берло аръёссэ элькунмы нюръяськиз шаерамы бичам налогъёслэсь 50 процентсэ дорамы кельтон понна. Та уж азинтӥськоз-а?

— Та сярысь вераськонъёс уг мыно, кулэлыкез но ӧвӧл,  — вераз Удмуртилэн Тӧроез. — Дыр туж дуно, малы сое быдтонэз сюлворонъёслы-куронъёслы. Сое сӥзёно экономикамес юнматонлы, ужаны быгатэммес возьматоно. Нош, жаляса верано, ужаны ум пӧрмытӥське на!  Россия ноку пумит уг кариськы пӧртэм проектъёс, программаос улсын улосъёслы коньдон сётыны. Но элькунмы туж ӧжытаз пыриськылӥз — та бордын ӝот-ӝот ужано.

Тазалык сярысь

Элькун кивалтӥсьёс соглаш карисько: элькунысьтымы куд-ог эмъян учреждениосын оптимизация чакласькытэк ортчытэмын вал. Таин валче, кылсярысь, Балезино ёросын больницае сюрон понна, куд-огез али ог 2 час сюрес вылэ быдтэ. Но кызьы вераз Правительстволэн Тӧроезлэн воштӥсез Анастасия Муталенко, туэ декабре отын «Доктор Плюс» клиника усьтӥськоз, Медицина страхованиея фонд пыр ужаса, калыкез дунтэк учкоз-йӧнатоз.

Бадӟым оскон, пе, диагностикая мобильной центръёслы, соос колёсаос вылын ужало бере, одӥгысьтыз мукетаз ёросъёсы потаны быгато. Отчы пуктылэмын туала куронъёслы тупась тӥрлык, со борды юнматэмын пӧртэм специалистъёс. Таӵе центръёслэн лыдзы элькунамы матысь дыре йылыны кулэ.

— Ёросъёсы потакум, тазалыкез утён удысын тырмымтэос вылэ ӝожтӥськонъёс туж трос вал,  — шуиз А. Бречалов. — Но малпасько, ог 70 процентэз соос пото калык пӧлын валэктон уж нуымтэ бордысь. Кылсярысь, одӥгаз ёросын нылкышно ӝожтӥськиз: ёросамы уг тырмо сюбег специалистъёс, эмъян тӥрлык вужмемын. Люкаськем калыклы вазиськисько: кидэс ӝутэ, кин озьы малпа на. Кизэ ӝутэ 2 мурт.

Туристъёс сярысь

Кин кыл кутоз шаерамы туризмез азинтон понна, угось выль Правительстволэн структураяз Культурая министерство борды туризм басьтэмын.

— Туризмез азинтонэз ас вылаз басьтоз Удмуртиез азинтонъя корпорация,  — валэктӥз вице-премьерлэн нырысетӥ воштӥсезлэсь ужзэ быдэсъясь Александр Свинин.  — Та удыслы нимысьтыз саклык висъяны кулэ — туризмез азинтыны Удмуртилэн луонлыкъёсыз туж бадӟымесь. Но жаляса верано, кылсярысь, кылем арын туристъёсты кыскыны быгатэмезъя элькунмы ПФО-ысь 14 улос пӧлысь 13-тӥ интые кылемын. Шуом, Сарапулэ уг дугдылы одӥг пароход но, малы ке шуоно турфирмаос уг тодо сыӵе луонлык сярысь.

А. Бречалов  паймемзэ вераз: малы биатлонъя «Ижысь винтовка» вожвылъяськонъёс гинэ но туж шыпыт ортчытӥсько, отын вормисе потэм спортсменъёс Олимпиадае яке дуннелэн чемпионатаз пыриськыны быгато ни ке но. Та ӵошатсконъёс туж тунсыко луозы туристъёслы но, соин ик туэ декабре сое паськыт радъялом.

Вераськон ӝутскиз киужъёсъя центръёс пумысен — отын ужасьёс али уг валало, мар вите соосты азьланьын.

— Асьмелэн туж паймымон кибашлыосмы, туж синмаськымон вузъёс потто,  — валэктӥз Удмуртилэн Тӧроез. — Соин ик мар лэсьтэмын ни со центръёсын, озьы ик «Лудорвай» музей-заповедникын, зоопаркын но мукетаз — ум куашкатэ. Но выль сямен ужаны дышетсконо луоз. Соосты возёнлы республика арлы быдэ ог 100 миллион манет быдтэ, нош со коньдон уг берыктӥськы. Вузэз поттыны но, вузаны но быгатоно. Али, кылсярысь, 10 сандык 3 толэзь ӵоже лэсьтӥськом ке, та ужез 2 арня ӵоже радъяны быгатоно — кӧня ке центръёс одӥг кыткетэ мед басьтӥськозы.

Октябрь толэзь пумын Ижысь вокзалын усьтӥськоз элькунысьтымы усточиослэн киужъёсынызы вуз карон инты. Та выль сямен ужаны кутсконлэн нырысетӥ вамышез луоз.

Элина Кумачёва

Туспуктэм: udmurt.ru

 

Удмурт Дунне
By Удмурт Дунне Октябрь 12, 2017 11:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<