Кызьы пӧртэм вакытъёсы лэсьтӥськиз «Шӧкыч» бам. Верало со бордын ужасьёс

Удмурт Дунне
By Удмурт Дунне 18 октября, 2017 17:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

14-тӥ коньывуонэ (октябре) «Шӧкыч» бамлы 55 ар тырмиз. Та дыр ӵоже сое лэсьтон бордын трос адямиос ужазы. Кызьы соос тодазы ваё со вакытъёссэс?

Ваче син — валтӥсь врачен

Ф. Суворов

 Оглом 20 ар нуи «Шӧкычез»: нырысь ик 1975-тӥ-1985-тӥ аръёсы, собере, кӧня ке вис карыса, 2000-тӥ аръёсы. Гожъяськи Леонид Суровый псевдоним улын.

«Шӧкычлэн» данэз соку туж бадӟым вал — газетэз но тросэз со понна басьтылӥзы, луоз. Бадӟым бамен печатлам сое. Но авторъёслы ёрмон ӧй вал — арнялы быдэ 20-30 гожтэт вуылӥз. Шаркан ёросысь 84 аресъем песянай туж тунсыкоесь юморескаос ысъя вал, жаляса верано, нимзэ али уг тодӥськы ни.

Зэм, соку котькуд мыдлань гожтэмед понна кылдэ юаны быгатылӥзы. Огпол гожтӥ одӥгысьтыз ёрос больницаысь валтӥсь врач сярысь. Дораз патере студентъёсты улыны лэзем — быдэсак соос чот улыны кутскем, аслыз нянь гинэ но басьямтэ ни. Та сярысь тодӥз КРУ (Контрольно-ревизионной управление), эскеронъёс ортчытӥз. Материалъёссэ сётӥз газетамы но — мон фельетон гожтӥ. Со врач мон вылэ судэ сётӥз ведь: ултӥяз, пе, монэ. Ярано, КРУ мон пала дурбасьтӥз но врачлы пумит иск дасяз. Собере врач судэ вазиськонзэ басьтӥз ик, но мыным ческыт ӧз йӧты. «Шӧкыче» гожъяськон — капчи уж ӧвӧл.

Анатолий Григорьев

Чиганъёсты удмуртлы дышетысал…

«Удмурт дунне» газетэ 1996-тӥ арын огдырлы гинэ ужаны вуылӥ, оскизы «Шӧкыч» бамез нуыны. Туж умой тодӥсько на, кыӵе шугъяськоно вал авторъёслы. Пичи гинэ гожтэт вуэ, сое озьы но, тазьы но нуйтыны-бергатыны выриськод. Укыр бадӟым ке, нош ик уг тупа ни — таӵеоссэ пызьыръяськод. Соин ик ӵемысь аслым гожъяно луылћз. Тодӥсько на: газетэ ӝожтӥськон вуиз, чиганъёс одӥг удмурт гуртысь вал лушкаллям шуыса — та учыр вылэ пыкиськыса, фельетон пӧрай. Шуи: лушкаськем интые, чиганъёс удмурт кылэз ӧжыт ке но мед дышетозы вылэм — от! усто луысал.

Гожъяськыны 6 часын ӵукна лыктылӥ, ӵош ужась эшъёсы вуэмлэсь азьло шыпытын ужаны кельшылӥз. Материалъёсме котьку 2 арнялы азьло дасясько вал. Нош одӥг пол печатной станок сӧриськиз, пе — фотоосты, суредъёсты поттыны уг луы. Мар кароно, «Шӧкыч» бамез маин ке но тырмытоно ук! 2 арнялы дасям вань материалъёсы огкутскемен пуксизы. Вот соку ческыт ӧз йӧты!

Алёна Ионина

Карт утчай

«Шӧкыче» монэ вуттӥз ачиз Очей Толи — Анатолий Ушаков. 2003-тӥ арын тодмо артист редакцие пырем. Соку солэсь юатэк ӧй чида: кыӵе тема калыклы самой матын?

— Кышноен карт кусыпъёс, конечно, — шуэ артист. — Учкись ведь соосты вылаз мерта, «милям но тазьы», яке «тазьы ӧвӧл кадь» шуыса малпа.

Толэзь ортчиз-а, ӧз-а, учыр тупаз командировкае потыны — Татарстанысь удмурт гуртъёсы. Нырысетӥ пумиськонын ик — Лельвиж гуртын — калык быдэс клуб тыр люкаськемын. Мыным подписка сярысь ивортоно, газетэн тодматоно. Вераськонэ мӧзмыт. Малпаськон вакытам кыӵе «шӧкыч» лексиз меда? Сцена вылын, подпискаез верам сяна, шуисько:

— Гажано эшъёс, мынам тӥледлы одӥг куронэ вань — удмурт гуртэ быземе потэ. Вань ке тодмоосты пӧлын чебер, визьмо но ужась пиосты, вералэ соослы мон сярысь.

Учкисьёслы тазьы вераме кельшиз, ява. Кин серекъя, кин паймыса учке — огез но нырулыса уг пукы. Вот, малпасько, шонер верам вылэм Очей Толи.

Тау гуртоосылы

Галина Семёнова (Савина)

Материалъёс ӧз тырмылэ. Соин ик тросгес гожъяй ачим, Шӧкыч уром яке Валентина Кузьмина кариськисько вал.

Та бамез нуыны кутскеме берегес Можгае сюанэ мынӥ. Тамада сюанчиосты котькуд куноен тодматэ. Ми доры черодэз вуиз но, могӟиз — шорам патрет мунё кадь учкыса сылэмез бере шуиз ик:

— Дуно куноос, таиз — Ижысь «Удмурт дунне» редакция картэныз, пумиталэ!

Мынам ымныры паймеменым кыстӥськиз.

Кузпалы, ачиз но валатэк, зол мыным юрттӥськиз. Солэсь учыръёссэ, верамъёссэ гожъясько вал. Аслыз ӧй вералля — ваньзэ тодысал ке, редакцие пыраны кепырасал, дыр, но «Шӧкыч» бамын со Паримон яке Вася нимын «ветлӥз». Тау кароно гуртоослы, огпол бертамам «Шӧкычлы» 3-4 материал вайисько вал. Одӥг пол Кузёбае бертӥ но, бускельмы шуэ: Галя, Валентина Кузьмина со тон ӧвӧл-а? Кылем арняе потэм «Шӧкычын» прямо милемыз картэным гожтӥллям.

Нош мынам одӥг валэктонэ: данъяське, ваньзы сярысь газетэ уг гожъяло.

Зуркась пукон

Лия Малых

Вис карылыса «Шӧкыч» бамез ог 5-6 ар нуи. Секыт ныпъет со, но шулдырез но вал: маскарчиосын тодматскиськод, кӧтыд вӧсь луытозь, серекъяськод.

«Шӧкыче» келям серемес учыръёсты, мадемъёсты ас поннам лыдӟисько но, пуконэ зурканы кутске. Кабинет тыр горемысьтым, ӵош ужась эшъёсы шорам паймыса учко — шуисько: «Шӧкычез» лэсьтӥсько. Улонын мон мӧзмыт адями, нош гожъяськонын шаянъяськон сямы потылэ, соку Пичи Очи луисько.

Огпол потамы Глазов ёросысь Золотари гуртысь школае. Зал тыр люкаськемын дышетскисьёс но дышетӥсьёс. Пиналъёс кырӟам-верамъя улысьтым пукон каллен-каллен вайяськиз но, мон небытак выж вылэ вуи. Куд-огез валаса ик ӧз вуттэ, мар луиз — мугор пичи уго.

Улонме гожъяськонэн герӟай бере, псевдоним чиньыос пӧлысь быръёно кариськи. Чиньыосты папамы вералля вал ас сяменыз: пӧлы — Палагай, азьчиньы — Азьгарай, шорчиньы — Шорник вор, нимтэмчиньы — Пичи Очи.

 

Удмурт Дунне
By Удмурт Дунне 18 октября, 2017 17:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<