Кылбурен — Байкалэ

Удмурт Дунне
By Удмурт Дунне Октябрь 5, 2017 16:00

Егит гожъяськисьёслэн 17-тӥ форумзы таяз арын Иркутск музъем вылын ортчиз. Угось татын дано ӟуч гожъяськисьлэн Валентин Распутинлэн вордскем палъёсыз — туэ солы 80 арес тырмысалыз. Иркутске ог 120 егитъёс вуылӥзы.

Туж тунсыко вал тодыны, кызьы егитъёс гожъясько, соослэн «кылбурет кухняенызы» тодматскеме потэ вал, малы ке шуоно мон кӧня ке ас вакытамгес кылбурасько, амалъёсы но огвыллемесьгес луо ини. Но форум ӟуч кылын гожъяськисьёслы гинэ радъяське, соин ӟуч кылын кылбуръёс гожтыны басьтӥськи. Зэмзэ вераса, удмурт кылын гожъяськыны мыным трослы капчигес — ки кӧня ке волятэмын ини, нош ӟуч кыл — копак мукет, аслаз куронъёсыныз, ӟуч кылын кӧня гожъяськисьёс! Аслыд пичи ке но инты шедьтыны секыт. Кылем арын форуме монэ ӧз кутэ. Нош таяз арын, списокысь нимме адӟыса, шумпотыса тэтчай, ява! Кӧня ке шумпотӥ но кышканы кутски — ох, туздырозы кылбуръёсме семинарын.

Форуме сюрес кузь гинэ вал — нырысь Муское поездэн мынӥ, собере — аслобетэн (самолёт) Иркутскозь. Лобоно ог 5 час. Часовой поясъёс воштӥськемен нунал но, уй но сураське. Форумлэн нырысетӥ нуналаз мон, кузь сюресэз ортчем маке, туж жадемын вал ке но, Иркутсклы синмаськыны кынары тырмиз. Кызьы уд синмаськы? Гадь тыр чылкыт омырез шокчиськод. Инвис пала учкыса, адӟиськод Ангараез — та шур гинэ Байкалысь потэ — вань мукетыз та тыэ пыро. Мадёслы осконо ке, Ангара, пе, Байкал атаезлэсь пегӟыса, Енисей туганэз доры кошкем. Та мадёслы оскем потэ.

Форумез усьтон ортчиз выль лыдӟиськонниын, егит гожъяськисьёсты но мастеръёсты ӟечкыланы вуылӥз Иркутск улосвыллэн губернаторез Сергей Левченко. Зэмзэ вераса, нырысетӥ нуналаз мон кышкай, чыртыме бералто шуыса — сомында дано адямиос мон вӧзтӥ ортчылӥзы: зӧк литературной журналъёслэн редакторъёссы, тодмо критикъёс, кылбурчиос, гожъяськисьёс. Арня ӵоже куд-огеныз мастер-классъёсын ужам, куд-огзэ котрес ӝӧкъёсын кылзӥ, куд-огеныз Байкал дуре омуль чорыг сиыны ветлӥм, куд-огеныз одӥг ӝӧк сьӧрын вераськыса пуким. (йырдэс кур эн каре — ушъяськытэк ӧйлась.)

Форумлэн валтӥсь ужпумез — выль нимъёсты усьтон, егит гожъяськисьёслы юрттон. Та форум пыр ортчемын тодмо гожъяськисьёс: Роман Сенчин, Сергей Шаргунов, Захар Прилепин, Василий Сигарев но мукетъёсыз. Валтӥсь ужрад — мастер-классъёс. Мон гожтӥськи «Дружба народов» журналлэн семинараз, сое нуизы гожъяськись но критик Роман Сенчин (со проза гожъясьёсын ужаз) но кылбурчи, прозаик но кылысь кылэ берыктӥсь Галина Климова (со ужаз милемын, кылбурчиосын). Мастер-классын котькудмылэсь кылбуръёсмес пыр-поч эскеримы, вань шекъёссэ, тырмымтэоссэ шараямы. Котькудӥз аслэсьтыз малпанзэ вераз мукет кылбурчиослэн чуръёссы сярысь. Мон понна со туж пайдаё вал — куд-ог шекъёсы сярысь ачим но тодӥсько вал (удмурт кылын кылбуръёсылы но тупало соос), мукетъёссэ семинар бере гинэ валай. Мынам кылбуръёсы сярысь ог 2 час пала вераським — кӧня ке ушъямез кылӥ ке но, тросгес критиковать каризы, со дыре ик ӟеч кенеш сётӥзы. Али валасько: мыным со критика туж кулэ вал. Кызьы шуиз критикалы сӥзем котырес ӝӧк сьќрын «Наш современник» журналлэн редакторез Сергей Куняев, «литература — дело кровавое». Оло, зэм но: курбон сётытэк, ӟеч автор ноку уд луы. Вань мастер-классъёс ортчем бере мынам кылбурет шоры учконэ трослы воштӥськиз.

Котькуд ӝыт радъяськизы кылбурет ӝытъёс. Котькуд мылкыд карись кылбуръёссэ лыдӟыны быгатӥз. Монэ нырысетӥ ӝытэ чорто вал но, мон возьдаськеменым сцена вылэ потыны ӧй быгаты. Кыкетӥ ӝытаз асме ворми но кӧня ке кылбур лыдӟи ик. Мон валай, удмурт кыл мон понна — аспӧртэмлыко «зона комфорта», нош ӟуч кылын асме пыртос кадь шӧдӥсько.

Форумлэн пумаз йылпумъянъёс лэсьтэмын вал. Та ужрадэз радъяллясь СЭИП фонд котькуд форум бере «Новые писатели» сборник поттэ. Мон туж пайми, куке монэ но мастер-классмылэн кивалтӥсьёсыз ӵектӥзы отын печатланы. Эшшо но золгес пайми, монэ Культурая министерстволэн стипендиезлы ӵектэмъёс пӧлы пыртӥзы шуыса (но та ӵектон гинэ ай, соин шумпотыны вазь).

Арня ӵоже — копак мукет улон. Кылбурет дунне пушказ выйытэ, чебер инкуазь йырез поромытэ, Байкаллэсь кезьыт вузэ али но чиньы пумъёсыным шӧдӥсько на кадь. Асме зэмос гожъяськисен шӧдыса бертӥ шуыны уг дӥсьты, дыр. Но мон егит шуыса, тыраз шӧдӥ — соиз зэм.

Анастасия Шумилова

Удмурт Дунне
By Удмурт Дунне Октябрь 5, 2017 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<