Азьтэм Ленин

Удмурт Дунне
By Удмурт Дунне 6 октября, 2017 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пиналъёслэн верамъёссылэсь, лэсьтэмъёссылэсь оло серекъялод, оло бӧрдод. Удыс нуналзы азьын дышетӥсьёс тодазы ваё  школа улонысь маскара учыръёсты.

Мария Никитина, Пичи Пурга ёросысь Вуж Мӧнья школаысь дышетӥсь:

— 2-тӥ классэ ветлӥсь огез пияше, бадӟымъёслэсь адӟем карыса, тамакез веръяны малпам. Школа котырысь куакъёс пушкы пырем но ӵындыса пуке. Та сярысь иворез эшъёсыз мыным ӝог вуттӥзы. Урокъёсме вунэтыса, куакъёсы шок-пуль бызи. Час-а, кык-а пияшез уйылыса ветлӥ — уг тодӥськы ини. Но дораз пырыкум, со, гуртэ уж лэсьтыса, ӝӧк сьӧрын йӧн-йӧн пуке вал ини.

Ярам, куакъёс пӧлтӥ ветлэме токма луымтэ: пияше будӥз, визьмаськиз — туннэ но тамак уг кыскы!

 * * *

5-тӥ классысь пиосы монэ витьымтэ шорысь паймытӥзы. Азьвыл «2»-лы но «3»-лы гинэ дышетско вал ке, али «4»-ёс но «5»-ёс басьяны ӧдъязы. Котькудзылэсь тетрадьзэс, синъёсылы оскытэк, эскерисько — гуртэ ужзэс янгышъёстэк, вольыт гожъяллям. Эх, лӧптӥсько ас поннам, таос визь борды куаж-куаж басьтӥськиллям!

Но шумпотонэ 1 арня сяна ӧз кыстӥськы. Шарае потӥз: классысьтым нылъёсы кампет-печення понна пиослэсь дорысь ужзэс озьы лэсьяло вылэм…

 Марина Кожевникова, Эгра каргуртысь 1 номеро школаысь географилы дышетӥсь:

— Нылпиослы паймемысь уг дугдылӥськы, кызьы гинэ визьзы уг тырмы городъёслэсь но кунъёслэсь нимъёссэс берыктылыны. Кылсярысь, Пхеньянэз «Похеньян», «Тихиньян» шуо, Ингушетиез — «Кушетия». Азовской зарезь шӧдтэк шорысь химической элемент бордысь «Азотское» луэ. Секыт сётӥське Коми Республикалэсь шоркарзэ — Сыктывкарез — вераны, таиз «Сывтывкар» луылэ. Нош Башкортостан — «Башкаркастан».

Павел Емельянов, Пичи Пурга гимназиысь информатикалы ды-шетӥсь:

— 9-тӥ классын информатика урок мынэ. Нылпиос программированиын Паскаль кылъя контрольной гожто. Одӥгез нылаш, йырзэ кормаса, кӧня ке пукиз-пукиз но ӝот-ӝот куараен шуиз: «Павел Владимирович, сётэлэ «наводка». Класс горак серектӥз. Валамон, со куре вал подсказка сётыны. Кисыысьтым 500 манетме поттӥ но шуисько, тырмоз-а? Та бӧрсьы контрольнойзэ ачиз лэсьтӥз.

Раиса Григорьева, Сьӧлта ёросысь Югдон школаысь химилы дышетӥсь:

— Одӥг пол нылпиосын химия урокын реакция лэсьтӥмы. Мар пӧрмиз, зынызъя тодманы кури. Одӥгез нылаш зынъяз-зынъяз но шуиз: чорыг зын потэ, пе. Класс горак серектӥз, нош вӧзысьтыз нылаш гордэктӥз. Ӵап ӵукна гинэ чорыг сии вал, пе, пробиркаез кутылыкум, зыныз кылем, оло.

 Алевтина Снигирёва, Сьӧлта ёросысь Югдон школаысь покчи классъёсты дышетӥсь:

— Нылпиосын городэ лыктӥмы. Куд-огез нырысьсэ шоркарез адӟиз. Одӥгез нылаш автобус укноысен ӵышкем но вож буям писпуосты синйылтӥз. Быдэс автобус тыр кеськиз: «Учке-учке, писпуос ветрянкаен висьыны усиллям!»

Светлана Хлебова, Сьӧлта ёросысь Выль Мӧнья гуртысь удмурт кыллы дышетӥсь:

— Удмурт литературая урок. Одӥгез пияш кизэ ӝутэ, куриське кылбур лыдӟыны. Потӥз, лыдӟиз.

— Ваня, ма, та кылбурдэ азьло но верад вал ини, — шуисько.

— Озьы-а, мар-а?

Берло эшъёсыз веразы, со, пе, мукет арлыдо дышетӥсьмылы озьы, одӥг кылбурез трос пол лыдӟылыса, ӟеч оценка басьтылэ. Татын но, оло, пӧрмоз шуыса, оскалтэм.

* * *

— Одӥг пол 1-тӥ классъёсын Увае концертэ лыктӥмы. Урамысь синпелетэз адӟим. Со В. Ленинлы синпелет шуыса, валэктӥсько. Нош малы Ленин, со азьтэм (ленивый) вылэм шат, паймизы пичиос.

Шӧкыч уром

Суредаз Владимир ИЖБОЛДИН

 

Удмурт Дунне
By Удмурт Дунне 6 октября, 2017 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<