«Зарни сӥзьыл» базар ӧтчаське

Удмурт Дунне
By Удмурт Дунне Сентябрь 29, 2017 16:10

Ижысь Восточной рынок котырын 30-тӥ сентябре «Зарни сӥзьыл» 9-тӥез ярмарка усьтӥськоз.

«Зарни сӥзьыл» ярмаркаын вуз карозы Удмуртиын поттэм сиён-юонэн.

Удмуртиын поттэм сиён-юонэн вуз карон 2008-тӥ арысен радъяськылэ. Азьвыл со ипподромын ортчылӥз, но калыклы та инты сюлэмъяз ӧз луы. Соин ик ар талэсь азьвыл выжтэмын вал басьяськисьёслы тодмогес интые — «Восточный» рынок пала. Ужрадэ соку ик сомында калык вуиз — усьтӥськемез бере 1 час ортчыса, ӝажыос бушазы. Гурт удысъя но сиён-юонъя министерствоысь рынокъёслэсь ужзэс радъянъя секторлэн кивалтӥсез Нина Вотякова вера:

— «Зарни сӥзьылэз» басьяськисьёс гинэ ӧз кельшытэ. Солэсь пайдазэ шӧдӥзы ужбергатӥсьёс но, предприятиос но. Кылем арын ярмаркае гурт удысысь ог 150 огазеяськонъёс пыриськизы. Туэ мылкыд карисьёс уногес — 21 ёросысь 220 куриськон вуэмын ни.

Рыноке поттэм котькуд вузлэн ӟечлыкез эскериськоз. Отысь шедьтыны луоз котьмае: сӥль, йӧл, дӥсь, пудо, лопатка-саник, тусьты-пуньы но мукет. Туэ ярмаркаез радъясьёсты муш вордӥсьёс паймытӥзы — 40 мурт ужрадэ чечызэ ваёз.

— Та лыдпус, оло, будоз на. Угось вуз каронэ котькуд мылкыд карись пыриськыны быгатэ, дун тырытэк. Со понна Гурт удысъя но сиён-юонъя министерствое 8(3412) 919-549, 919-550 телефонъёсъя жингыртоно, — шуэ Нина Алексеевна.

Маин бордаз кыскоз на ужрад? Люкаськемъёсты кырӟась-верась коллективъёс шулдыртозы. Сютэмъёсты пыжем сӥлен, пӧсь табанен но чаен куноялозы. Котькудӥз вуз карон азбар чеберъямын луоз. Ярмарка ӵукна 10 часын ужаны кутскоз. Йылпумъяськоз берпуметӥез басьяськись кошкем бере — 15 час котырын. Отчы пырыны яралоз машинаен но — сиён-юонэн тырмытэм песьтэрез тыбыр вылын нуоно медаз луы.

Нялтас вераса, шоркарын мукет но ярмаркаос ужало. Емышен, кидысэн, будосэн вуз карыны 2 сюрс 42 инты чакламын. Соослэн кытын интыяськемзы, ужамзы пумысен рос-прос тодыны луоз, Иж городлэн izh.ru сайтаз пырыса.

Ольга Корепанова

 

Удмурт Дунне
By Удмурт Дунне Сентябрь 29, 2017 16:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<