Пичи Пурга ёросысь Кечол МТСлы — 80 ар

Удмурт Дунне
By Удмурт Дунне Сентябрь 18, 2017 14:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

МТС кутскон сётӥз Кечол черкогуртлы но. Гуртоос та дано лыдпусэз бадӟым праздниклы пӧрмытӥзы. 

Пичи Пурга ёросысь Кечол МТС-лы 80 ар тырмон ужрадын.

Пӧртэм документъёсын утчаськыса, гурт администрациын ужасьёс тодӥзы: машинно-тракторной станция кылдэмын вал 1937-тӥ арын. Ас вакытаз со 30 пала гуртъёслы, ог 20 колхозъёслы техникаен юрттӥськиз. Война вакытэ трактор сьӧры пуксизы 18-19 аресъем нылъёс. Жаляса верано, соос пӧлысь туннэ улэп на одӥгез гинэ — Мария Бегитова. Ужрадэ ӧтемъёс пӧлын со тужгес дуноез куно луиз. Дуно куноос луизы на Николай Бехматов, Фёдор Романов, Арсентий Ивашкин — ваньзы таос кема аръёс ӵоже ужазы МТС-ын. Котькудзылэн кылемын туж тунсыкоесь тодэ ваёнъёссы. Кызьы ужаз МТС — люкаськем калыклы пыр-поч мадиз шаерчи Валерий Баймурзин но.

— Жаляса верано, МТС-лэн кулэлыкез кылем даурысь 50-тӥ аръёслэн пумазы быриз, — шуиз со. — Угось со вакытэ пичи колхозъёс бадӟым эштосъёсы огазеяськылэмын вал ни — котькудӥз аслэсьтыз гаражзэ возьыны ӧдъяз. 1959-тӥ арын Кечол палан одӥг бадӟым хозяйство вал, но со люкиськиз «Мир» колхозлы но УАССР-лы 10 ар совхозлы. Таос ик МТС-ын кылем техникаез куспазы люкизы.

Но МТС-лэн гаражъёсыз туннэ вань — калыклэн тодаз вайыто ортчемзэ, оскон сёто вуоноезлы. Берло дыре Кечолысь хозяйство бырон калэ вуылӥз, 3 сюрс гектар музъемъёссэ куак басьтӥз. Но али кылдӥз выль хозяйство — «Радуга — Агро» огазеяськон. МТС-лэн азьвыл гаражаз гуретэ ни выль техника.

— Секыт вакытъёсы но калык гуртысь кошкыны ӧз дырты, — вераз муниципал кылдытэтлэн йырыз Сергей Золотарёв. — Муниципал кылдытэтэ пырись вань гуртъёсын али оглом 2 сюрс 300-лэсь ятыр улӥсез лыдъяське. Гуртъёс пӧлысь тужгес бадӟымез — Кечол черкогурт. Ӵапак МТС солы кутскон сётэм вылэм. Угось МТС-э ужаны лыктылӥзы специалистъёс — станция котыре соослы юртъёс пуктылыны кутскизы. Озьы черкогурт пумен паськытаз. Туннэ со котырын пуктӥськыны буш интыос но ӧвӧл ни. Шӧдӥське: калыклэн огъя кыткетын ужаны мылкыдыз выльысь ӝутӥське.

Ужаны гинэ ӧвӧл — шутэтскыны но. Озьы тазэ праздникез но соос уртче дасязы-ортчытӥзы: гурт администрациын, клубын, шор ёзо школаын, школа-интернатын, нылпи садъёсын ужасьёс. Люкаськем куноослэсь мылкыдзэс уката ӝутӥзы «Вить Сергейёс». Пуртыысь ӝукез вӧсяз Валерий Баймурзин. Гуртоослы ортчем праздниксы кемалы вунонтэм луиз.

Элина Васильева

 

Удмурт Дунне
By Удмурт Дунне Сентябрь 18, 2017 14:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<