Маин паймытӥз «Таврида» форум

Удмурт Дунне
By Удмурт Дунне Сентябрь 18, 2017 12:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туэ 3-тӥ пӧсьтолэзьысен 31-тӥ гудырикошконозь быдэс Россиысь егитъёс быгатӥзы пӧртэм удысъёсъя тодонъёссэс волятыны но шутэтскыны «Таврида» форумын. Берпуметӥ сменаяз — егит журналистъёс понна — вуылыны шуд усиз мыным но.

Кун Думаысь депутатэн П. Толстоен селфи.

Телевизорысь — ми доры

«Таврида» форум кӧня ке ар ӵоже ини радъяськылэ Крымын. Сьӧд зарезь дуре пуктэм базаын одӥг смена ӵоже дышетско но шутэтско 30 аресозь 300 егитъёс. Соосыз дышето быдэс кунмылы тодмо луись, ас удыссэс ӟеч тодӥсь-валась специалистъёс.

Удмуртиысь та сменае ми 4 кузя сюримы. Самолётын лобыкумы, ум на тодӥське вал, быдэсыз рейс «Тавридае» мынэ шуыса. Симферопольысен ваньмес автобусъёсы пуктылӥзы но нуизы Стерегущее черкогурт пала. Быдэс уез сюрес вылын ортчытыса, ӵукна изем потӥз. Но кӧлон сярысь вунэтоно луиз: 5 часын милемыз шулдыр кырӟанъёсын-эктонъёсын пумитазы кураторъёс, соос ик интыязы пичи коркаосы. Пӧртэм регионъёсысь егитъёсыз суразы. Ваньмес 15 адямиен 20 группаослы люкылӥзы. Со группаосын ужамы но шутэтскимы быдэс смена ӵоже.

«Таврида» — туж тунсыко форум шуыса, трос пол кылылӥ ни вал, но сокем кельшоз шуыса, ӧй малпалля. Отчы лыктэм егитъёс доры куное туж тодмо адямиос вуыло. Милесьтым азьвыл шутэтскемъёс доры ветлӥз ачиз Президент В. Путин. Ми доры со ӧз вуы ке но, мукет тунсыко куноосмы вал. Тужгес кельшизы Евгений Ревенкоен, Пётр Толстоен но Александр Коцен пумиськонъёс. Азьвыл соосты телевизорысь гинэ адӟем вал ке, форумын милемды соослэсь люкиз кӧня ке гинэ вамыш.

Журналист, «Вести недели» передачалэн азьвыл нуисез, али Кун Думаысь депутат Евгений Ревенко ватытэк вераз Сириысь, Украинаысь югдур шоры учкемзэ,  журналист чотын «пӧсь» интыосы вуылэмзэ, буре вайиз отын бырем эшъёссэ.

— Журналист, пӧртэм учыръёсы вуылыса, котькыӵе улонэз адӟыса, адямилыксэ утьыны кулэ, — шуиз Евгений Ревенко. — Кайгулэсь, шуг-секытъёслэсь сюлэмды чурыт луиз ке, сое кулонэн ӵошатыны луоз. Ивор сюлэмез поныса дасямын ӧвӧл ке, лыдӟисьлы со тунсыко уз поты.

Тазьы верамез бере Хабаровскысь журналист мадиз улосазы кылдэм югдур сярысь. Быдэс Россилы тодмо луизы пудо-животъёсты курадӟытыса виылӥсь егитъёс. Соос вань кӧшкемыт ужъёссэс видеое пуктылӥзы, собере Интернетэ поттазы. Тае тодыса, журналистъёс шыпыт ӧз улэ, иворъёсазы животъёсты быдтӥсьёсты курлазы. «Тавридаысен» ини тодмо луиз: судлэн решениезъя йыртэмасьёсты пытсэт сьӧры 3 арлэсь кемалы келялозы. Хабаровскысь журналистъёсыз пыкылыны кутскизы: тӥ ке со учыръёс сярысь сомында ӧй гожъясалды, приговор сыӵе чурыт ӧй луысал.

Тавридаын — Удмуртиысь егит журналистъёс.

— Тӥ лэсьтӥды асьтэлэсь уждэс, приговор тӥ ӧд сётэ, соин кыл но уд кутӥське со понна, — шуиз Евгений Ревенко. — Та учыр бере йырзы борды кутӥськыны кулэ соос, кин со йыртэмасьёсты будэтӥз, дышетӥз. Мон малпасько, тӥ ваньзэ шонер лэсьтӥды.

«Комсомольская правдалэн» специальной корреспондентэз, «Звезда» газетлэн валтӥсь редакторез Александр Коц но трос вераськиз ожгар темая. 1999-тӥ арысен со вуылэмын уно «пӧсь»  точкаосы, адӟемын котькыӵе кайгуэз.

— Котькуд командировка азьын кышкыт, но мон малпасько, солэсь возьдаськоно ӧвӧл. Кышкан куалектонэ (паникае) гинэ медаз выжы,  — шуэ Александр Коц. — Тужгес кышкыт мыным вал Цхинвалын, соку адӟи, кызьы вӧзысьтым ик адямиос пуштылӥзы. Соку ик адӟи мон шоры ыбись адямиез. Зол сӧсырми, соин со командировкае тужгес вакчиез вал — сутка но ӧз кыстӥськы. Мукетыз секыт командировка вал Бесланэ, адями курадӟонэз тужгес трос адӟи Донбассын.

Тодмо журналистлы, Кун Думаысь депутатлы Пётр Толстойлы тросгес юанъёс вал политикая: Крымлэн Россие берытскемез, санкциос, коррупция, пропаганда сярысь. Тросмылы кельшизы солэн меӵак валэктонъёсыз, югдур шоры пӧртэм ласянь учкыны но дунъяны быгатэмез. Пумиськон йылпумъяськем бере быдэс зал бызьыса мынӥз журналистэн селфи лэсьтыны. Со кутӥз кинлэсь ке планшетсэ, зӥбиз кнопкае…

Шутэтскыны гинэ ӧвӧл — ужаны но

Политика удысысь юанъёслы валэктоно луиз Крымлэн тӧроез Сергей Аксёнов но. Крым 2014-тӥ арысен асьмелэн ке но, отысь татчы жингыртыны туж дуно усе — роуминг.

Вакчи дыр куспын Крымын ужаны кутскизы выль законъёс, выль программаос, куронъёс. Отын улӥсьёс ваньмызлы туж ӝог дышоно луизы. С. Аксёнов верамъя, егит специалистъёс, ужась киос соослы туж кулэ, соин соос шумпотыса возьмало Россилэн мукет улосъёсысьтыз лыктӥсьёсыз. Со сяна, Крымын али пуктӥсько выль нылпи садъёс, школаос, больницаос. Отчы но ужасьёс кулэ луозы.

Гужемъёсы Крым Россиысь туристъёс понна но синмаськымон инты луэ. Балезиноысь блогер Алексей Старков малпам маршрут: табере со гуртооссэ «Газелен» Сьӧд зарезь дуре шутэтскыны нуллэ. Но шутэтсконэн сое ниманы секыт, пе.

— Рыбачье посёлокын, кытчы мон Балезиноысь калыкез нуллӥсько, коркаос куашкан калэ вуэмын, музъем арендае сётэмын, — шуэ Алексей. — Кузёез сое уг утялты. Вылаз ик, зарезьлэсь кыдёкын ӧвӧл интыяськемын жаг куян инты.

А. Старков возьматӥз С. Аксёновлы туспуктэмъёссэ, Рыбачьеысь администрациысь документъёсты. Форумысь бертэммы бере кылӥськиз ни: Алексей берен Крыме кошкем Рыбачьеысь калыклы жагез утялтыны юрттыны но куашкась коркаосын герӟаськем юанэз пумозяз сэрттыны.

Та ужез пияш берыктэ «Калык фронтэн» ӵош. Ӵапак ОНФ радъяз «Тавридалэсь» егит журналистъёс понна сменазэ, соин форумын ми тодматскимы «Калык фронтлэн» вань проектъёсыныз, соос понна кыл кутӥсьёсын (пусъёно, ваньзы ик соос али Кун Думаысь депутатъёс). ОНФ-лэн азьветлӥсьёсыз ӧтизы милемыз мыло-кыдогес ужазы пыриськыны, шуг-секытъёсты шараяны.

Зарезьын интые — шукыын

Пумиськонъёс но кенешонъёс сяна, программаямы дышетскон пыртэмын вал. Нырысь тодмо журналистъёс валэктӥзы, кыӵе луыны кулэ туала журналист, нош собере басьтэм тодон-валанмес ми кутӥмы деловой шудонын. Богатый крайысьтымы Златоградын  вал асьмелэн кивалтӥсьёсмы, огшоры калыкмы. Ми тыршимы 6 бадӟым медиахолдингъёсын. Златоградын ялан кыӵе ке ужрадъёс ортчылӥзы: я адӟытон усьтӥське, я мэрлэн нылыз бызе, я огшоры адямиос «Калык фронтэн» Сьӧд зарезьлэсь ярдурзэ турынлэсь чылкытато. Милемлы со сярысь иворъёс дасяно вал.

Ужмес дунъязы дышетӥсьёсмы — Россиысь валтӥсь холдингъёсысь журналистъёс. Соос лыдэ басьтӥзы ӝог ужаммес, туспуктэмъёсмес, интыын видео лэсьтыны быгатэммес, йыръянъёсмес. Милям «Златач» холдингмылэсь ужзэ нырысь курлазы ке но, бӧрысь 1-тӥ инты сётӥзы. Ну, шумпотӥм ук! Ӵош «ужам» эшъёсынымы шудон ӵоже туж эшъяським.

Шутэтскыны но тыршимы. Ваньмон дырмес гинэ но рос-прос радъяллямы: я шукы пӧлын дискотека, я волейбол, я квест. Соин ик, зарезьлэсь ог 20 метрын улыса но, отчы 2-3 пол гинэ пырыны вуттӥмы. Бертон азямы куазь жобаськиз на. Озьы ке но мылкыдмес со ӧз куашкаты, угось зарезьын пыласькыны куке но быгатомы на, дыр, нош «Тавридае» уз ни кутэ — одӥг сменае 2 пол вуылыны уг луы, пе.

Елена Рябина

Туспуктӥз Илья Ишмуратов

 

 

 

Удмурт Дунне
By Удмурт Дунне Сентябрь 18, 2017 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<