Кызьы Валамазын вордӥськем Иван Кудрявцев тодмо дрессировщик луиз

Удмурт Дунне
By Удмурт Дунне Сентябрь 18, 2017 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Циркысь тодмо артистъёс Иван Кудрявцев но Гоша гондыр.

Быдэс дуннелы тодмо луэм дрессировщиклы Иван Кудрявцевлы 12-тӥ сентябре 85 арес тырмысал. Сьӧлта ёросысь вордӥськем Валамаз черкогуртаз солы музей комната но Гоша гондырезлы синпелет усьтӥзы.

Руль сьӧрын — гондыр

Трос кунъёсын ворекъязы Иван Кудрявцев но солэн Гоша гондырез. Та кык артистъёс Бразилиысь, Япониысь, Канадаысь, США-ысь но мукет кунъёсысь учкисьёслэсь сюлэмъёссэс берыктӥзы. Куд-огезлы осконтэм но потылӥз кадь, сыӵе секыт трюкъёсты гондыр ачиз лэсьтэ шуыса. Дано дрессировщик но солэн ньыль пыдо эшез сярысь СССР-ын пуктэмын 2 кинофильм: «Косолапый друг», но «Король манежа», Франциын — «Медведь» комедия. Цирк удысэ вамышъёсыз, Гошаез дышетэмез, соин ӵош пӧртэм кунъёсы вуылэмзы сярысь Иван Кудрявцев 1964-тӥ арын «На арене с Гошей» книга поттӥз.

Со вакытэ лыдъяське вал, гондыр 2-3 трюк сяна лэсьтыны уг быгаты шуыса, нош Иван Кудрявцевлэн пуштрес эшез 13 трюк быдэстылӥз — великен, самокатэн, мотоциклэн ворттылӥз, пулъёс вылтӥ ветлӥз, бекмылляськиз, шаръёсыз омырын бергатылӥз. Быдэс дуннеысь учкисьёс синмаськемын вал Гошалы. Нош США-ын одӥгез журналист ӵектӥз гондырез вице-президентэ пуктыны. Ижын улӥсьёс абдраса учкылӥзы ульча кузя мотоен ворттылӥсь Гоша шоры. Зэм, мышказ пукылӥз кузёез. 1975-тӥ арын Удмуртиысь ГАИ Гошалы сётӥз мотоциклэн ветлыны право.

Тросэз адӟылӥзы, но уг тодо, вылды, Удмуртиысь цирклэн пусаз (логотип) мотоцикл вылын ворттылӥсь гондыр — со Гоша шуыса. Та гондыр ик пуктэмын Ижын ортчылӥсь цирк искусстволы сӥзем калыккуспо фестивальлэн  статуэткаосаз.

Иван Кудрявцевлэн пичи дырысеныз шӧдӥське вал ини пудоен огкыл шедьтыны быгатэмез: Петька атассэ одӥг боды вылысь мукетаз тэтчатӥз, Полкан пунызэ бер пыдъёсыз вылэ султыны, кыткетын ворттылыны дышетӥз. Животъёсызлэсь быгатэмзэс учкыны люкаськылӥзы  быдэс черкогуртысь пиналъёс. Школа бере агрономе дышетскыны дасяськем пияш шӧдтэк шорысь шедиз Иже вуэм пӧйшуръёсын адӟытонэ. Соослы синмаськыса, Иван утялтӥсе куриське. Берло пияш гондыръёсын ужась тодмо дрессировщикъёслы, Сидоркин кузпалъёслы, юрттӥсь кариське. Нош малпанъёсаз  бадӟым сцена вылэ артист сямен потон.

Гоша машина сьӧры но пуксьылӥз.

Одӥг пол со бордаз басьтэ гондырпиез. Нылпизэ сямен яратыса сое будэтэ, утялтэ но пӧртэм трюкъёслы дышетэ. Гоша, тазьы нимаз со эшсэ, сое быдэс дуннелы тодмо каре. Иван Фёдорович УАССР-ысь дано артист, РСФСР-ысь калык артист луиз. Улонысь кошкиз 1984-тӥ арын 8-тӥ октябре, солы 52 арес гинэ вал, нош Гоша  кузёезлэсь одӥг арлы гинэ вазьгес пересьмыса кулӥз, солы 20 арес вал ини.

Музей но синпелет

Иван Фёдоровичлэн вордӥськем гуртаз та дырозь утиськемын атай юртэз. Татчы со туж яратыса бертылӥз, городлэсь, бадӟым сценалэсь шутэтскылӥз. Валамазэ вуыса, тэльысь, шур дурысь уг ик пыралля вал, тодазы ваё дано дрессировщиклэн ӵыжы-выжыосыз Михаил но Валентина Кудрявцевъёс, Алевтина Малых, Сергей Гребёнкин. Книгаяз но туж шунытэн ас вордӥськем сэрегез, анай-атаез сярысь гожтэ. Цирк арена вылысен но вератэк уг кельты вал дор палъёсыз сярысь.

Семьязы вал огшоры крестьян выжыысь, Иван 6 нылпи пӧлысь 5-тӥез. Валамазын уло на агай-сузэръёсызлэн нылпиоссы. Соос чакласа возё дано дрессировщиклэсь юртсэ. Аслаз пиналъёсыз Америкаын, Испаниын, Москваын уло. Али Валамазысь коркан нокин уг улы ни ке но, отын утиськемын Иван Фёдоровичлэн кунгож сьӧрысь ваем кузьымъёсыз — Япониысь чай юон сервиз, гондыръёсын ковёр, вирзӥбетэз зӥбломытӥсь, сэръёсты юнматӥсь тӥрлык. Ас вакытаз Иван Фёдорович ӵыжы-выжыосызлы мотоцикл но «москвич» машина кузьмалляз. Со сюлмаськемен, Валамазын сюресъёс тупатӥськизы, школа ӝутэмын вал.

Та выллем мотоен ворттылӥз Гоша гондыр. Со огдырлы ваемын Валамазысь музее.

Черкогуртын дано адямизэс сӥлы карыса, усьтэмын музей. Солы кичӧлтӥсь луиз муниципал кылдытэтлэн йырыз Елена Русских.

— Азьвыл ай, библиотекаын ужакум, трос материал люкай И. Кудрявцев сярысь, — вера Е. Русских. — Туэ ёрос администрация юрттӥськемъя бадӟым праздник пӧрмытыны быгатӥм. Музейлы сэрег шедиз азьвыл школалэн юртаз. Малпаськомы, нылпиослы гинэ ӧвӧл, бадӟымъёслы но тунсыко луоз дано дрессировщиклэн улэм-вылэменыз, аслаз но Гоша гондырезлэн туспуктэмъёсынызы, со вакытысь афишаосын, пӧртэм кунъёсысь ваем арбериосын — магнитофонэн, тусьты-пуньыен но мукетэныз — тодматскыны. Ваньзэ тае музейлы кузьмазы дрессировщиклэн ӵыжы-выжыосыз.

Озьы ик гурт калыкез ӟечкылазы Удмуртиысь циркын ужасьёс Марина Томшич но Владимир Шкелёв.

Гошалы сӥзем синпелет пуктэмын Валамаз черкогуртын.

Музеез усьтон нуналэ ик черкогуртын Гошалы пулэсь синпелет пуктэмын. Сое быдэстӥз Сьӧлталась кибашлыослэн юртысьтызы усточи Роман Черных. Валамазысь вань калык но И. Кудрявцевлэн ӵыжы-выжыосыз дано дрессировщикез буре ваён плиталы коньдон люкало на, матысь дыре со Гошалэн синпелетэз вӧзы пуктэмын луоз.

Сьӧлталан цирк шоу возьматэмын вал. Учкисьёсты ас быгатонлыкъёсынызы шумпоттӥзы Сарапулысь «Сюрприз» цирковой коллективысь нылпиос, дуннеысь одӥгез кужмо адями, Гиннеслэн рекордъёсын книгаяз трос пол сюрылэм Иван Шутов — со Сьӧлта ёросысь Узиын вордскемын.

Мӧзмылӥз Валамазлэсь

Юромо празднике бертэм И. Кудрявцевлэн сузэрезлэн Калининградын улӥсь нылыз Людмила Сергиенко:

— Туж шунытэн тодам вайисько дядя Ваняез. Данъяськиськом, огшоры семьяысь потэм адями сыӵе яркыт кизили луиз шуыса. Дядя Ваня хищникъёсын ужа вал бере, мугораз трос вурысъёсыз вал. Со туж лякыт сямо, ас ужзэ, пӧйшуръёсты яратӥсь адями вал. Котькуд ар тыршылӥз Валамазэ бертылыны. Тодӥсько на, анайзэ, мынэсьтым песянайме, курылӥз гурын картошка пыжыны. Гондыреныз соос зэмос эшъёс вал.  Берпуметӥ аръёсы Гоша сцена вылэ ӧз пота ни ке но — пересьмиз, лябӟиз, пельтэм луиз — дядя Ваня гастрольёстӥ сое сьӧраз нуллӥз на. Гондырзэ ватэмез бере дядя Ваняен пумиськи, со туж мылкыдтэм ветлӥз, яратоно эшез сярысь синвуаськытэк верамез уг луы вал. Гошаез Иж котыре ватӥзы.

Ангелина Снигирёва

Туспуктэмъёс басьтэмын
Сьӧлта ёрос библиотекаысь но
И. Кудрявцевлэн ӵыжы-выжыосызлэсь

 

Удмурт Дунне
By Удмурт Дунне Сентябрь 18, 2017 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<