Кияса ёросысь ӟуч школаын дышето удмурт кылэз

Удмурт Дунне
By Удмурт Дунне Сентябрь 18, 2017 11:13

Кияса ёросысь Первомайской школае Первомайской черкогуртысь,  Яжбахтино, Косолапово но Аксарино гуртъёсысь 96 нылпиос ветло. Ваньзы сямен ӟучъёс ке но, пӧлазы удмурт кылэз дышетӥсьёссы вань.

Кияса ёросысь Первомайской школаын удмурт кылъя факультатив нуо.

— Кӧня ке ар талэсь азьло Элькун Правительство удмурт кылэз дышетонлы сӥзем видеоконференция ортчытӥз, — вера Первомайской школалэн директорез Александр Рябин. — Отын шуизы: тросаз ёросъёсын анай кыллы ӧжыт саклык висъяське. Нош Кияса ёросын удмуртэз дышетӥсьёс уката ӧжыт (милям татын тросгес ӟучъёс уло уго). Соин но удмуртэз дышетон пумысен ӧм малпаськылэ вал. Но видеоконференциын ик ивортӥзы, куд-ог школаосын удмурт кылэз ӟуч нылпиос дышето шуыса. Соку малпай: ми но озьы ум быгатэ-а, мар-а? Удмурт кылъя дышетӥсьмы вань, завуч но директор — удмуртъёс.

Но таӵе ужпум борды усьтыр-табыр басьтӥськыны уг яра. Нырысь анай-атайёс но пиналъёс пӧлын юалляськон ортчытоно, соослэсь мылкыдъёссэс тодоно. Валэктонъёсысьтызы адӟим: соос пумит ӧвӧл, куд-огез соку ик дышетскон борды басьтӥськыны дась вал. «Мултэс кылэз дышетон — юнме дыр быдтон» шуисьёс ӧй вал.

Юалляськон ортчытэм бере законъёсыз рос-прос лыдӟимы: ум тӥялэ-а соосты? Но удмурт кыл шаерамы кун кыл бере, нокыӵе могӟетъёс ӧвӧл. Соку малпамы, нырысь удмуртэз факультатив чотын гинэ дышетом, нош уж пӧрмиз ке, азьланяз, оло, урокъёс но пыртом.

— Удмурт кылэз сётӥсько, «Ӟеч-а, бур-а, удмурт кыл!» программа вылэ пыкиськыса, — вера Первомайской школаысь удмурт но ӟуч кылъёсъя дышетӥсь Ирина Шишлина. — Со программая удмурт кыл арняяз 3 урок луыны кулэ, но милям, жаляса верано, 1 час гинэ висъяське. Соин тыршисько со тодон-валанэз ик вакчигес дыр куспын — араз 34 урокын — сётыны. Аслым но туж яра, нылпиослы но кельше. Доре уж уг сётъяськы, уг жадьытӥськы. Ӵемгес пиналъёс 12-15 кузя ветло, нош шудонъёс ортчытӥськом ке, тросгес люкасько.

Таӵе занятиослэн пайдазы синйылтымон: факультативе ветлӥсь нылпиос али мар но со юаны-вераны, куспазы ӧжытак вераськыны быгато ни. Асьсэос ик ушъясько, удмуртъёс пӧлы шедё ке, соослэсь мар сярысь лабыртэмзэс валаськом ни шуыса. Анай-атайёс талы шумпото гинэ. Собраниосын верало, пиналъёссы удмурт культураез но мургес тодыны, тунсыкъяськыны кутскизы шуыса.

— Мон ас мылкыдыя удмурт кылэз дышетыны кутски, туэ кыкетӥ арзэ ветлӥсько ини, — шуэ 9-тӥ классын дышетскись Игорь Букарев. — Удмурт кыл мыным каньыл потэ. Занятиосын трос выль кылъёс дышетӥськом, шудӥськом. Кружокмы арняяз 2 пол ке но мед ортчылысал — мон шумпотысал!

— Мыным удмурт кыл чик секыт уг поты, — шуэ 9-тӥ классын дышетскись Света Гребенщикова. — Занятиосамы ми удмурт сиён пӧраны дышетскимы, огполаз Уддяди гуртэ Выль аре ветлӥмы. Ӵемысь шудӥськом, тунсыко заданиос быдэсъяськом — мыным туж яра!

— Кыл тодэмзэс волятон понна ми соосты куддыр удмурт ужрадъёсы нуллӥськом, — шуэ Александр Рябин. — Мылкыдмы вань удмурт огазеяськонъёсын эшъяськыны, соослэн ужрадъёсазы пыриськыны.

Алёна Михайлова

 

 

Удмурт Дунне
By Удмурт Дунне Сентябрь 18, 2017 11:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<