Сергей Широбоков кунмылэсь флагзэ кутоз на!

Удмурт Дунне
By Удмурт Дунне Август 22, 2017 08:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арня пумын Ижевске вуиз Лондонын ортчем капчи атлетикая дуннелэн чемпионатысьтыз азвесь медален бертӥсь удмурт спортсмен, Шаркан ёросысь Малой Ита гуртысь Сергей Широбоков.

Вице-чемпионэз аэропортын ик трос калык пумитаз. Люкаськемъёс пӧлын вал мугор кыдатон культурая, спортъя но егитъёсын ужан политикая министр Игорь Краснов, спортсменлэн нырысетӥ тренерез Екатерина Ежова, шаерысьтымы капчи атлетикая секцие ветлӥсь нылпиос, Шаркан ёросысь кивалтӥсьёс но спортсменлэн ӵыжы-выжыосыз. Соку ик ваньмыз юалляськизы чемпионат сярысь, вице-чемпионэн ӵош туспуктэме пуксьылӥзы. Пизэ пумитакуз, шумпотон синвуосыз потӥзы анаезлэн Людмила Петровналэн.

— Лондонэ мынонзэ быдэс гуртмы тодӥз, ӵошатскон нуналэ ваньзы телевизор азьын пукизы, мон но эшеным учки,  — шуэ спортсменлэн анаез. — Телевизор дорын 2 час пала пукыса ик жади, нош соос, ӝог вамышъяса, кыӵе жуммизы, дыр. Секыт вал шоразы учкыны. Эшшо но юнгес сюлмаськыны кутски медаль понна нюръяськонэ 4 кузя кылемзы бере. Но мон малы ке ас поннам оскисько вал, та ӵошатсконысь пие одно ик кыӵе ке медален бертоз шуыса. Вожвылъяськон йылпумъяськем бере быдэс гурт калык ульчае потӥз, ваньзы шумпото, монэ ӟечкылало.

Анай сюлэм пиезлэсь вормон басьтонзэ шӧдэ вылэм. 20 иськеме вамышъянын Сергей Широбоков финиш гожез 2-тӥ интыын выжиз. Спортсмен уг ваты: зарни понна но, пе, нюръяськыны луоно вал, опытэз окмымтэ.

Сергей Широбоков: Азьланьын — Олимпиада!

— Лондонын бызён сюресъёс сюбегесь, нош мукетыз ваньмыз туж кельшиз: тупамон куазь, спортсменъёс пӧлын эшлыко кусыпъёс, учкисьёс шуныт пумитазы, — шуэ Сергей. — Финиш бере гинэ мылкыд куашкалляз, угось вормисе потэм эшъёсы асьсэ кунзылэсь флагзэс кутӥзы, нош мон со вакытэ, ма карыны паймыса, котыртӥзы ветлӥ.

Спортсменэз буйгатӥз шаерысьтымы мугор кыдатон культурая, спортъя но егитъёсын ужан политикая министр Игорь Краснов. Сергейлэн азьпалан ассэ возьматыны, кунмылэсь флагзэ кутыны трос луонлыкъёсыз кылдозы на, ми солы оскиськом, — шуиз министр.

Шумпотэмзэс уг вато шарканъёс но. Шаркан ёрос администрациысь мугор кыдатонъя но спортъя ёзэн кивалтӥсь Сергей Чернов шуэ: таӵе чемпионъёсын артэ сылыса, пинал спортсменъёслэн спортэн эшъяськыны мылкыдзы эшшо но пуроме. Ӧпкелиськом,  Удмурт шаерлэсь яке Шаркан ёрослэсь флагзэ сьӧраз ӧм келялэ шуыса. Азьпалан та сярысь малпаськоно.

Гужем сезонзэ Сергей Широбоков бадӟым вормонэн йылпумъяз. Вордскем палъёсаз шутэтскемез бере нош ик выль стартъёслы дасяськоно луоз. Вуоно арын, февраль толэзе, сое витё ни дуннеысь ӝог вамышъясьёслэн кубоксы понна нюръяськон но мукет стартъёс. Лушкем малпанъёсыз вань ни 2020-тӥ арын ортчоно гужем Олимпиада пумысен но. Оскем потэ, спортсменлэн малпанъёсыз улонын зэмалозы шуыса.

Валентина Емельянова

 

 

 

Удмурт Дунне
By Удмурт Дунне Август 22, 2017 08:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<