Сергей Широбоков: Азьланьын — Олимпиада!

Удмурт Дунне
By Удмурт Дунне Август 22, 2017 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаркан ёросысь 18 аресъем  ӝог ветлӥсь Сергей Широбоков Лондонын ортчем Дуннелэн чемпионатаз утӥз азвесь медаль, зарнилэсь 2 секундлы гинэ кыльыса. Вераны кулэ: 2015-тӥ арын Сергей вормылӥз ни Колумбиын ортчем дуннелэн чемпионатаз, но соку со ӵошатскиз аслаз арлыдъемъёсыз пӧлын. Таяз радэ егит спортсмен бадӟым тодмо ӝог ветлӥсьёсын нюръяськиз.

Сергей Широбоков Лондонын ортчем Дуннелэн чемпионатаз утӥз азвесь медаль.

— Сергей, кызьы но ку вуид ӝог ветлон спортэ?

— 14 арескысен. Физкультураен дышетӥсе шуиз: Сергей, оскалты ай ӝог ветлыны. Оскалтӥ. Зэмзэ вераса, таӵе спорт вань шуыса со нуналозь ӧй ик тодылы. Соин ик нырысь ачим дышетскыны выри: Малой Ита гуртысеным Бородуль школаозь  5 иськем, котырак нюлэс, туж чебер инкуазь. Со сюресэз нуналлы быдэ солань-талань ӝог ветлыса ортчылӥ. Собере ёросын радъяськылӥсь вожвылъяськонъёсы потаны кутски.

Ёрос ӵошатсконъёсысь монэ синйылтӥз ни Шарканысь тренер — Екатерина Ежова, со ачиз Ижевскын ужа, тренировкаосы чортӥз. Озьы Ижевске техникуме пыреме бере Екатерина Витальевна  доры ветлыны кутски. Со монэ нырысь ик ӝог ветлон техникаме шонер пуктыны дышетӥз.  Собере дасяськыны кутским Россиысь ӵошатсконъёсы.

— Ӝог ветлонэн выремедлэсь азьло бызьылӥськод, дыр, вал?

— Воксё уг! Футболэн шудылӥ. Зэмзэ вераса, пичи дыръям ваньмон дыр трос ик ӧй вал. Гуртын уж трос. Атай берозь ужалляз, ми апаеным ялан анайлы юрттӥським.

Сергей Широбоковез пумитан дыръя.

 — Но тон нырысетӥ ӵошатсконад ик, Россиысь первенствоын, вормид?

— Озьы пӧрмиз. Вормеме бӧрсьы монэ Саранске сборъёсы чортӥзы. Али дышетскисько Мордва кун пединститутын физкультураен дышетӥсьлы, 3-тӥ курсэ вуи ни. Отын ик тренировкаосы ветлӥсько. Ӝоглыке бадӟым бере, монэн ӵош али нокинэ уг пукто ни. Нырысь капчи ӧй вал… Но огпол но ӧй малпалля бадӟым спортэз куштон сярысь.  Тодӥсько вал, чидай, вань тренировкаосын ӟеч дасяськи ке, вормонъёсы одно луозы шуыса.

 — Луизы ук! 2015-тӥ арын Колумбиын ас арлыдъемъёсыд пӧлын дуннелэн чемпионэз луид, табере Лондонын ортчем дуннелэн чемпионатаз азвесь медаль басьтӥд. Азвесь медаледлэн кыӵе дуныз?

— Тренеръёсы мыным валэктӥзы: азьмынӥсьёсын артэ, соослэн  азязы потатэк, мыноно. Вань кужымез сётыса мыноно берпуметӥ иськемъёссэ. Озьы ик лэсьтӥ.

Кӧня ке кышкай, судьяос люкетозы, оло, шуыса, тужгес но  — Чувашиысь Клавдия Афанасьеваез дугдытэмзы но сюрес вылысь палэнтэмзы бере. Малпасько вал, призовой интые потыны кутски ке, соос горд карточкаоссэс возьматъяны кутскозы шуыса. Ярам, штраф ӧз сётъялэ.

Сюрестэ ортчыкуд, малпад-а вормон сярысь?

— Конечно! Мон лэсьтӥ ваньзэ, мае быгатӥ. Ӵошатскон дыръя ачим сярысь гинэ ӧй малпаськы. Куке воксё секыт луылӥз, аслым вералляй: эн дӥсьты сётскыны. Тон ачид понна гинэ уд,  ваньзы понна, кинэ ӧз лэзе та ӵошатсконъёсы, чидаськод.

Россиысь капчи атлетикаен вырись спортсменъёсты али уг лэзё калыккуспо ӵошатсконъёсы пыриськыны.  Тон но нейтральной кункышет улын ветлӥськод. 

— Политика ни со. Куке калыккуспо ӵошатсконъёсын тон Россилэн нимыныз уд пыриськиськы, куке ӵошатсконэ нейтральной кункышет улын потӥськод — сюлэмыд тырттэм кадь, мар ке но уг окмы. Конечно, лякытгес луысал, ми ӵошатсконъёсы быдэс командаенымы мынысалмы ке. Соку милям трос медальёсмы луысалзы.

— Тон тодмо ни дано ӝог ветлӥсьёсын. Соос шоры учкыса но, дыр, мылкыдыд выль вормонъёслы ӝутӥське.

— Озьы ик вань. Мынам кумире — Мордовиысь Денис Нижегородов, озьы ик данъяськисько Удмуртиысь Герман Скурыгинэн.

 — Герман Скурыгин аспал адямиед кадь, Дуннелэн чемпионатаз  азвесь медаль басьтӥд ни. Кылиз на Олимпиадае ветлыны, Денис Нижегородовез сутыны…

— Мынам ужпуме: кыказ-куиняз Олимпиадаын вормыны!

— Ӵем-а гуртад бертылыны кылдэ?

— Гуртэ бертылӥсько туж шер — арлы 2 пол. Спортлэн дуныз — бадӟым вормонъёс. Соосты басьтон понна кулэ малэсь ке куштӥськыны, чиданы.

Юлия Турова
Туспуктӥз В. Емельянова

 

Удмурт Дунне
By Удмурт Дунне Август 22, 2017 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<