Мар возьмало дышетӥсьёс таиз дышетскон арлэсь?

Удмурт Дунне
By Удмурт Дунне Август 31, 2017 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

24-тӥ гудырикошконэ шаерысьтымы дышетӥсьёс люкаськылӥзы конференцие. Мар возьмало соос таиз дышетскон арлэсь? Ужрадэ пыриськиз Удмуртилэн Тӧроезлэсь ужзэ быдэсъясь Александр Бречалов. 

Август конференция дыръя.

 

Садъёсты выльдон

Туннэ 48 сюрс 518 адями тырше дышетон удысын. Берло 3 ар ӵоже 339 мурт «Дышетон» нацпроектъя грант утӥз, 18 сюрс визьнодась  вылӥ наградаосын пусъемын. Соос тыршемен но, берло 3 ар ӵоже олимпиадаосын Удмуртия улосъёс пӧлын 3-тӥ интыын луэ.  Азьпалан Москва город но Мордовия гинэ. Озьы котькуд 2-ез пинал вожвылъяськонысь вормонъёсын берытске. Туэ ЕГЭ-ын 100 балл басьтэмъёс 33 луизы, миым 26 вал. 567 выпускник школаез медален йылпумъяз. Шаерамы профессия басьтэмзы но специальностьсэс ӟеч тодэмзы понна озьы ик медален пусъё — таӵеос 320 кузя люкаськизы.

Шумпотымон лыдпусъёс трос. Но азьланяз мар бордын ужаны но вань. Со сярысь конференцие люкаськемъёс азьын вераз дышетонъя но наукая министрлэсь ужзэ быдэсъясь Алексей Шепталин:

— Валтӥсь ужпум: 3-ысен 7 аресозь вань нылпиослы садэ ветлыны луонлык сётоно. Берло 5 ар ӵоже ватсаса 7,5 сюрс инты кылдытэмын. 2017-тӥ ар пумозь эшшо 80 инты усьтыны чакламын. Вуж садъёсты тупатъяса, луонлык кылдоз эшшо 350 пиналлы путёвка сётыны. Соку черод быроз. Но со дыре ик шугъяськытэ садъёслэн вужмемзы. Миым 18 ёросын пусъемын куашкан калэ вуэм садъёс. Тужгес секыт югдур Яр ёросын — 85,7 процентэз садъёссы аварийноесь. Балезино ёросын — 52,6 процентэз.

Азьвыл сад пуктыны федерал бюджетысь но коньдон висъяське вал. Кылсярысь, 2013-тӥ арын федерал центр юрттэмен, 30 нылпи сад ӝужаз. Берло дыре юрттэт уг вуы. Озьы 2 ар ӵоже одӥг но юрт элькун чотын пуктыны ӧм быгатэ. Ярам, инвестор Можга ёросысь Черёмушки гуртэ сад усьтыны юрттӥз.

Луонлыкъёсты паськытатон

Котькуд пинал быгатэ наукаын, творчествоын, спортын вормонъёс басьтыны. Алексей Шепталин пусъемъя, нылпиослэсь быгатонлыкъёссэс усьтыны гинэ юрттоно. Талантъёсты усьтӥсь огез проект — Россиысь дышетонъя «Сириус» центр. Шаерысьтымы 167 пинал 2 ар ӵоже отын аслэсьтыз быгатонлыкъёссэ паськытатыны быгатӥз. Элькунамы но та ласянь нырысетӥ вамышъёс лэсьтӥсько. 1-тӥ сентябре Ижысь элькун лицей-интернатын ужаны кутскозы 18 лабораториос. Нылпиос биологияя, химияя, физикая, робототехникая но мукет предметъёсъя тодон-валанъёссэс муромытыны мед быгатозы шуыса, туала куронъёслы тупась тӥрлык вуттэмын ни.

— Со дыре ик 20 процентэз школаос туала куронъёслы уг тупало, — шуиз Алексей Шепталин. — 4 школаос пулэсь пуктэмын ай. Кылем ар пумын 106-езлы капитальной ремонт лэсьтоно луиз. Ёросъёс ас кужыменызы та ужез быдэстыны уг вормо. Республикалэн бюджетысьтыз та ужпумъёслы келям уксё но куддыр мукет интые кутӥське. Туэ нырысетӥ квартал ӵоже, кылсярысь, шараяськиз: 3 миллион манет кулэезъя ӧз кутӥськы. Та выллем югдур мукет улосъёсын но, пе. Соин ик Россиысь Дышетонъя но наукая министерство школаосты возёнэз кун кие сётыны чакла. Коньдонлэсь кутӥськемзэ чаклам сяна, со юрттыны кулэ тодон-валан сётонъя огъя герӟет кылдытыны. Москва городын, Тамбов, Псков но Самара улосъёсын сыӵе реформа ортчемын ни.

Вормонъёс доры кыстӥськон

Лэчыт ужпум школьникъёсты 1 сменаен дышетыны выжтонэн. Алексей Шепталин верамъя, кыкетӥ сменаын дышетскись нылпиослэн лыдзы арысь аре йылэ. 10 ёросын гинэ таӵе сюлмаськонзы ӧвӧл.

— Туэ, выль интыос кылдытон вылысь, федерал бюджетысь 392,7 миллион манет вуыны кулэ, Удмуртилэн бюджетысьтыз 98,2 миллион манет софинансирование амалъя висъяськиз ке. Чакламын 2 сюрслэсь уно дышетскон интыос усьтыны, таос пӧлысь 825-ез — Можгалан. Вуттыны чакламын Алнашын но Ижын пуктӥськись школаосты, — вераз министрлэсь ужзэ быдэсъясь.

Школаосын ӵош ик лэсьтӥсько мугорез кыдатонъя объектъёс. Берло 4 ар ӵоже тупатъямын 192 спортзал. Туэ 25-сэ выльдыны чакламын.

— Вунэтыны уг яра сюресъёсты но. Шаерамы 653 маршрут усьтэмын. 10 сюрс 9 пиналэз нуналлы быдэ автобусэн нуллоно-ваёно. Туэ 42 выль автобус висъяны чакламын. Зэм, улон воштӥськемъя автобуслы но кулэяськисьёс йыло. Кылсярысь, ватсаса тодон-валан басьтӥсьёслы но рейс кулэ. Шуом, Можга городын ватсаса тодон-валан басьтӥсьёсты нуллэ 2012-тӥ арын поттэм 1 транспорт. Мероприятиосы вуттӥськыны со тырмыт ӧвӧл, вылаз ик тӥяськылэ. Нош можгаослэн вормонъёссы бадӟымесь: миым шаерысьтымы, Россиысь но калыккуспо конкурсъёсын 1 сюрс 53 пол вормизы. Нылпиосты нуыны-вайыны луонлык ӧм кылдытэ ке, вормонъёс но уз луэ.

— Вань кужыммес пономы, дышетон удысэз азинтонэн герӟаськем ӵектонъёсты улонэ пыӵатон вылысь, — конференцие люкаськемъёслы шуиз Удмуртилэн Тӧроезлэсь ужзэ быдэсъясь А. Бречалов.

Елена Сараматова

Туспуктэм: udmurt.ru

 

Удмурт Дунне
By Удмурт Дунне Август 31, 2017 14:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<