Кварсалэн данъяськонэз кысӥз. Малы пытсаськиз тодмо аграрной техникум

Удмурт Дунне
By Удмурт Дунне 8 августа, 2017 15:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вотка ёросысь Кварса гуртлэн шорсюлмыз  аграрной техникум вал. 12 гектар вылэ интыяськемын вал библиотекаез, спортзалэз, стадионэз, мастерскойёсыз, автопаркез, пасекаез, фермаез. Туннэ ваньмыз ланьыра.

Вотка ёросысь Кварсаысь техникум буш сылэ.

 

Буш кылён

Куинь ар талэсь азьло гинэ техникумлэсь 4 дышетскон корпусъёсызлэсь, общежитиосызлэсь липетъёссэс, укнооссэс, выжъёссэс вошъязы. Техникумез куке-соку пытсалозы шуыса, йыразы ик ӧз лыктылы. Аккредитациез но ортчизы. Зэм, берло аръёссэ доразы дышетскисьёс пумен кулэсмылӥзы. Кылсярысь, 2009-тӥ арын татын 268 мурт дышетскиз, 2010-тӥын — 248, нош 2014-тӥын лыдзы 128-озь усиз. Но дышетӥсьёс тае азьвыл аръёсы нылпиос ӧжыт вордскемен герӟаллязы, отӥяз югдур тупатскыны кулэ, школаез йылпумъясьёс йыло шуыса, Удмуртиысь Дышетонъя но наукая министерстволы кӧня ке пол вазиськылӥзы. Берло дыре уго Кварса гурт ялан паськыта. Кварса гурт поселениен кивалтӥсь Елена Хрусталёва верамъя, туннэ татын 1 сюрс 840 мурт улэ. Но министерствоын кылӥсь ӧз луы ни. 128 студентэз 120 мурт дышетэ-сюдэ-утялтэ шуизы но техникумез 2014-тӥ арын пытсаны ужпум пуктӥзы. 2-тӥ, 3-тӥ курсъёсын дышетскисьёсты шаерысьтымы мукет техникумъёсы интыязы. Кварсаысь со быдӟа комплекс буш медаз улы шуыса, татчы усьтӥзы Пиналъёслы патриотизм мылкыд пыӵатонъя центр. Но таиз но ар но ӧз века. Общежитиосы интыязы огыр-бугыр Украинаысь пегӟемъёсты. Кварсаын дышетонэз воксё дугдытӥзы. Озьы 80 процентэз дышетӥсьёс но ужасьёс ураме кылизы.

— Тросэз гуртоос техникумын ужало вал, — шуэ Елена Хрусталёва. — Табере ужтэк курадӟо. Туннэ общежитиос но бушесь — беженецъёс кошкизы. Дышетон заведенилэн  мукет юртъёсыз но учкисьтэк-утялтӥсьтэк куашкало. Соин но техникумлэн комплексэз  вӧзтӥ кошкемзылы быдэ гуртоос лулӟыло, эх, татын уж кылдысал ке, шуо. Дорам но со пумысен олокӧня пол вазиськылӥзы ни. Зэмен ик, комплексэз выльысь ужатыны луысал ке, кварсаос ганяк шокчысалзы. Палэнын ужасьёсыз но выльысь шумпотыса берытскысалзы. Собере, гуртоослэн нылпиоссы но техникумын дышетско вал. Механизатор, водитель, плотник, повар луыны мылкыд карисьёс шедьылӥзы. Табере Чайковские, Перме дышетскыны кошко. Валамон ни, уноез уз бертэ ни.  Азьланяз но тазьы ик луиз ке, ужась киослы ёрмыны кутскомы. Техникум выльысь ужаны кутскысалыз ке, гурт поселенилы но пайда луысал. Азьвыл уго выт пӧлысь ӝыныез  лыктэ вал техникумысь. Комплекслэсь юртъёссэ сӥзьылысен тулысозь шунтыса возё, гумыос пильылӥське, борддоръёс медаз кынме, медаз пурысьталэ шуыса. Со понна ог 3 миллион манет юнме медаз кисьтӥське.

Бырйиськон

Зэм, уноез дышетӥсьёс асьсэлы уж шедьтӥзы ни. Кин ке Воткинске, кин ке Чайковские интыяськиз. Но туннэ ке но техникумзы понна нюръясько.  Сюлэм вӧсенызы пӧртэм ведомствоосы вазиськыло.

— Уно аръёс ӵоже техникум гуртлэн брендэз вал, — шуэ техникумлэн директорезлэн азьвыл воштӥсез Татьяна Капина. — Ми ляб тазалыко нылпиосты, сӧсыръёсты но дышетылӥмы. Шаерысьтымы уноез сирота нылпиос но ми дорын специальность басьяллязы. Общежитимы вань, улон но дышетскон условиос умоесь — та соосты бордаз кыскылӥз. Собере, сирота нылпиослы уж но шедьтыны шуг ук. Нош милям пасекамы но, фермамы но асьмелэн вал. Татын соослы 2 профессия дунтэк басьтыны луонлык сётӥськылӥз. Со куспын 18 арессэс тырмытъязы, асьсэлы уж шедьтылӥзы. Кварса котырын йыртэмасьёс но техникумлы луыса кулэсмизы ни вал. Милям уго спортзал но, мастерскойёс но — маин но нылпиосты бордамы ӧм кыскылэ! Нош али, ужлы ёрмыса, нылпиос нош ик йыртэманы кутско.

Таӵе югдурен валче гуртоос но, техникумлэн азьвыл дышетӥсьёсыз но туж куро Кварсаын дышетонэз выльысь радъяны. Зэм, дышетонъя но наукая министрлэн воштӥсез Зоя Суворова верамъя, Кварсаысь техникумлэн ваньмыз ваньбурез шаерысьтымы техникумъёс куспын люкылэмын ни. Татчы пересьёслэсь юртсэс но, мечеть но усьтыны малпанъёс вал. Нош техникум кельтыны уз пӧрмы ни, дыр. Министрлэн мукетыз воштӥсез Игорь Белозёров верамъя,  Воткаын ужало промышленной техникум, машиностроительной техникум, крезьгуръя педколледж, медициная колледж. Татын дышетскисьёс пӧлысь уноез — Вотка но Шаркан ёросъёсын улӥсьёс. Кварсаысь техникуме лыктӥсьёс сокем уз луэ. Нош промышленной техникум гурт удыслы кулэ луись специалистъёсты тырмыт дася.

Кварсаослэн асьсэлэн проектъёссы вань. Кылсярысь, татын азьвыл но сӧсыр пиналъёсты дышетӥзы бере, таосты визьнодан борды рос-прос басьтӥськысалзы. Со понна техникумын ваньмыз лэсьтэмын. Но Игорь Белозёров шуиз: инвалид пиналъёсты дышетонэн выро Ижысь лэсьтӥськонъя техникум, лэсьтӥськон технологиосъя техникум, агростроительной техникум, Сарапулысь политехникум, Глазовысь агропромышленной техникум, Балезиноысь политехникум, Уваысь профколледж но Можгаысь агропромышленной колледж. Татын 250-270 инвалидъёс дышетско. Со тырмыт.

Кварсаос бордазы выльысь басьтыны дасесь 9-тӥ классэз йылпумъям сирота нылпиосты. Таосты дышетонъя, практика ортчонъя цехъёссы вань уго. Но талы но министерстволэн валэктонэз сюриз: 2014-тӥ арын 1 сирота нылпиез дышетон-сюдон понна Кварсаысь техникумын 381 сюрс манет кошкиз, шаерамы та лыдпус 70-80 сюрс манет. Дышетон удысын уксёез быгатыса кутонъя ужпум пуктэмен ик, техникум пытсамын вал, шуэ Игорь Белозёров.

Кварсаослэн осконзы вань на Воткаысь промышленной техникумлы, таид коть гуртысьтызы агротехникумлэн базаяз ужалоз шуыса. Практика ортчыны бусыоссы но, автодромзы но, гаражъёссы но вань.  Таиз проект тужгес умоен лыдъямын, сое быдэстон борды басьтӥськыны чакламын, шуиз Игорь Белозёров. Техникумлэсь кылем ваньбурзэ сётозы Удмуртилэн казнаяз. Но техникум эшшо одӥг ар кузётэк улӥз на ке, юртъёс куашкалозы, выльысь тупатъяны секыт луоз, шуэ Татьяна Капина.

 Удалтон

Та нуналъёсы капчи югдур ӧй вал Камбаркаысь машиностроительной колледжын. Россиысь Дышетонъя но наукая министерство сое июнь пумын пытсан сярысь ужпум ӝутылӥз. Дышетскисез ӧжыт, колледжез возён, дышетӥсьёслы уждун тырон дуно усе, азинскон понна планъёсыз ӧвӧл, шуизы. Колледжлэн директорез Андрей Андреев верамъя, берло 2 ар ӵоже колледжын бюджет интыос висъямын ӧй вал бере, лыктӥсез кулэсмиз. Туннэ отын 92 студент лыдъяське. Таос но, Камбаркаын улӥсьёс но колледжез ворсанлы пумит ӝутӥськизы. Камбаркаын уго со сяна мукет училищеос ӧвӧл ни. Пумитъяськемзылэн емышез шӧдӥськиз. Та нуналъёсы тодмо луиз: колледжез уз пытсалэ на, учкозы, быгатоз-а ужаны. Озьы татын туэ выльысь усьтӥзы бюджет интыос. Азьвыл татын Камбарка ёросысь нылпиос дышетскылӥзы бере, общежитие ласянь ужпум ӧз ӝутӥськылы — доразы автобусэн берталлязы, нош туннэ дорамы Сарапулысь но, Нефтекамскысь но нылпиосты ӧтьыны малпаськомы бере, город дась общежитие висъяны, патерын улӥсьёслы колледж дась компенсация тырыны, пиналъёс гинэ мед лыктозы, шуэ Андрей Андреев.

Елена Сараматова

 

Удмурт Дунне
By Удмурт Дунне 8 августа, 2017 15:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<