Каракулино каргуртлы кулэ чылкытатӥсь сӧзнэтъёс

Удмуртилэн Тӧроезлэсь ужзэ быдэсъясь Александр Бречалов Каракулино ёросэ вуылыку, трос ужпумъёс ӝутэмын вал.

Удмуртилэн Тӧроезлэсь ужзэ быдэсъясь Александр Бречалов пумиськылӥз Каракулино ёросысь калыкен.

Ёросысь активен но калыкен пумиськыса, валамон луиз, кыӵе удыслы бадӟымгес саклык висъяно. Каракулино каргуртын лэчыт ужпум сылэ очистной сооружениос пумысен. Александр Бречалов оскытӥз, али проект бордын ужалом, нош 2019-тӥ-2020-тӥ аръёсы одно ик пуктом шуыса.

— Тросгес туристъёсты асьме доры кыскыны малпаськом ке, Кам шур одно ик чылкыт луыны кулэ. Со сяна, чорыганъя  выль бизнес-проектъёс кылдытыны луонлыкъёс вань, — шуиз со.

Тазалыкез утён удысъя но трос юанъёс чузъяськизы. Кивалтӥсь соглаш луиз: ёросэ тросгес ФАП-ёс усьтоно но  отысь тӥрлыкез выльдоно.

Ёросын улӥсьёсты туж сюлмаськытэ на газ. Туэ Галаново черкогурт пала нуись гумыослы документъёс дась ни, коньдон но висъямын, возьмало, ку доразы вуоз.

Куашканы вуэм коркаосысь выжтон программая но вераськон мынӥз. Элькун кивалтӥсь оскытӥз, шаерамы со азинтӥськоз шуыса. Но со вуоно арлы бюджет бордысь потоз ини. Ёросъёс но муниципалитетъёс та удысын асьсэлэсь но  программазэс кылдытыны кулэ.

Наталия Самсонова