Грак ёросысь Муркемырын ортчиз Емыш-fest

Удмурт Дунне
By Удмурт Дунне Август 2, 2017 17:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

29-тӥ июле Грак ёросысь Муркемыр гурт ёросысьтызы вань поселениосты огазеяз. Татын ортчиз «Емыш-fest» ужрад.

Муркемыръёс куноосты пумитало.

Азьвыл гракъёс пиналъёслэн быдэ вуонзылы но выль емышлы сӥзем праздникъёсты нимаз ортчытъяло вал. Нош берло 3 арзэ ни та 2 праздникъёсты огазеязы но сое  «Емыш-fest» нимазы. Тазьы шулдыргес но, дунтэмгес луоз, шуизы. Но огзэ сямзэс ӧз йӧтылэ: ужрад арлы быдэ интызэ вошъя. Озьы туэ со Муркемырын ортчиз.

«Удмурт Кенеш» огазеяськонлэн Грак ёросысь ёзэныз кивалтӥсь Александр Аблаев верамъя, интыысь интые выжылон гуртоосты огазея. Туэ муркемыръёс ваньзы дэмен ульчаосы утялтӥськыны, кенеръёссэс буяны потӥзы. Ужрад дыръя возь вылэ пуктэм гур дорын кин табань, кин кыстыбей, кин перепеч пыжиз. Муркемыре ог 200 пала куноос люкаськизы. Пӧлазы, удмуртъёс сяна, мукет выжыысь калыкъёс но вал. Эшшо ке Татарстанысь Елабугаысь, Менделеевскысь удмурт калыкъёслэн делегациоссы вуизы. Артэ уло бере, гракъёс бигер удмуртъёсын эшъясько. Я бигеръёс Гракысь Гербере но удмурт Выль ар ужрадъёсы вуыло, я гракъёс сопала шонто, шуэ Александр Аблаев. Емыш-fest ужрадэ но бигер удмуртъёс мыло-кыдо вуизы, асьсэлэсь калык  ансамбльёссэс сцена вылэ поттӥзы. Сцена вылын котькуд делегация аслэсьтыз кырӟанъёссэ, эктонъёссэ возьматыны кулэ вал. Та ик аспӧртэм концерт но луиз.

Ужрадлэн кортӵогез луиз егитъёслэсь быдэ вуэмзэс эскеронъя вожвылъяськон. Конкурсэ пыриськизы Лолошур-Возжи, Пуклё но Ӟатча поселениосысь нылъёс-пиос. Пиослэсь пу пильылыны, ӝажы лэсьтыны быгатонлыкъёссэс эскеризы, нылъёслэсь чаклазы карнанэн ву нуллыны быгатэмзэс, мунё бинямзэс, ӝӧквыл пуктыны пӧрмытэмзэс.

— Косонъёсты ваньзы сямен умой быдэстӥзы. Визьзэс, удмурт кылэз тодэмзэс но эскероно кариськимы, — вера ужрадэз нуись Алексей Медведев. — Ӟуч кылысь удмуртэ куд-ог кылъёсты берыктыны косӥ но, ӧз быгатэ. Муркемырысь Егор Симаков но Марина Иванова со ласянь чупрес луэмзэс возьматӥзы. Соослы ик Батыр но Чеберай ним сётӥмы. Егорлы синпельлы кузьмамы мангал, нош Мариналы — кызьпу туйлэсь пунэм шкатулка.

Ужрадэз ортчытыны «Родина» хозяйство коньдон висъяз. Кивалтӥсез Сергей Петров тапалан вордӥськемын уго. Калыкез выль емышлэсь пӧрам ӝукен но шыдэн куноязы.

Туэ  Емыш-fest паймытӥз гуртысь усточи семьяосын но. Ужрадын нырысьсэ абдрамон семьяослы нимысьтыз азбаръёс висъязы. Кылсярысь, Кузнецовъёс киужлы усточи луо, эмъюмлы кутӥськись турын-куар бичало-куасьто. Таин тодматӥзы азбаразы вань кожисьёсты. Петров иськавынъёс гуртазы вашкалазэ утисьёс луо. Нош Виктор Леонтьев валэныз Россиын ортчылӥсь пӧртэм ӵошатсконъёсы пыриське. Кыӵе но кубокъёссэ, медальёссэ азбаре ӧз потты со! Бадӟымъёс но пичиос котырысьтыз ӧз ик кошкылэ.

Ужрад йылпумъяськиз арганчиослэн фестиваленызы. Ог 15 кузя люкаськизы соос. Удмурт гуръёс чузъяськем улсын кин кырӟаз, кин эктӥз! Адямиослэн, пӧсь куазь шоры учкытэк, кошкемзы уг на поты вал.  Грак ёросын удмурт ужрадъёс трос уг ортчыто бере, «Емыш-fest»-эз арлы быдэ чидатэк возьмало уго.

Елена Сараматова

 

Удмурт Дунне
By Удмурт Дунне Август 2, 2017 17:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<