Алнаш ёрос: Кытын тыршо — отын емышо

Удмурт Дунне
By Удмурт Дунне 4 августа, 2017 11:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем кӧснуналэ, 29-тӥ пӧсьтолэзе,  Удмуртилэн Тӧроезлэсь ужзэ быдэсъясь Александр Бречалов потаз Алнаш ёросэ. Пумиськонъ-ёсын со, трос вераськытэк,  ӵектӥз юанъёс сётъяны: мар шугъяськытэ алнашъёсты, мар люкетэ азинскыны, вань-а  луонлык палэнысь уксё кыскыны, выль ужан интыос кылдытыны?

Алнашын луоз выль школа!

Ой, сюрес, пырдэм сюрес…

Гурт удысын субсидиосын югдур, сюресъёс, школа, нылпи сад пуктон, Интернет, удмуртлыкез утён — таӵе юанъёс тужгес но зол шугъяськыто алнашъёсты. «Молодая гвардия» хозяйстволэн кивалтӥсез Михаил Крылов юаз: кыӵе югдур субсидиосын, малы соос кулэсмо? Азинскоз на-а миллион тонна йӧл кысконъя программа?

Александр Бречалов, алнашъёсты трос йӧл кыскемзы понна ушъяса, вераз:  миллион тонна йӧл кысконлэсь  куштӥськыны элькун уг малпа, со туж ӟеч программа, соин ик гурт удыслы юрттэт вуоз. Со сярысь нимысьтыз кенешон ортчоз 3-тӥ  гудырикошконэ Дэри черкогуртын.

Алнашъёс озьы ик ӝож-тӥськизы сюресъёсын югдур вылэ. Ёросэтӥ ортче М7 федерал трасса, али отӥ тупатъян ужъёс мыно, соин валче татын ялан машинаос тымисько. Сюрессэс вакчиятон вылысь амалоосыз сюрес дуре интыяськем гуртъёс пыр потаны кутскизы, бадӟым машинаос гуртэтӥ ортчись сюресэз быдто ни, ӝожтӥсько адямиос. Та югдурез А. Бречалов тодэ, со пумысен валэктыны куриз  сюрес хозяйствоя но транспортъя министрлэсь ужзэ быдэсъясез А. Горбачевез. Туннэ нуналлы тодмо ни: сюрес вылын ужалоз весовой контроль — бадӟым машинаосты гуртэ пыронлэсь алозы. Со сяна, Алексей Викторович ивортӥз, ёросысь кыӵе сюресъёс тупатъямын луозы 2018-тӥ арын. Кылсярысь, шумпотэмзы луоз Алнаш — Кибъя сюресэтӥ (6,5 иськем) ветлӥсьёслэн. Зэм, проект али  министерствое берыктэмын, малы ке шуоно, А. Бречаловлэн малпамезъя, проектлы укыр бадӟым дун пуктэмын.

— 6 иськемлы 164 миллион манет кисьтыны — укыр шукрес, утчано луонлыкъёс дунтэмгес лэсьтыны, — шуиз А. Бречалов. — Нош шыръям уксёез  эшшо кыӵе ке сюресэз тупатъянэ кутыны луоз.

Ӝегатскытэк тупатъямез кулэ каре на Асан совхоз-техникумысен Татарстанэн кунгож дорозь сюрес, солэн кузьдалаез 4 иськем пала, нош проект малы ке дасямын 2-лы гинэ. Кемалась курадӟо ни  Ляли но Шадрасак-Кибъя гуртъёсысь 600 пала улӥсьёс,  татчы нуись гравий сюрес кемалась пырдэмын.

Александр Бречалов вуылӥз ёросысь предприятиосы.

Улонлэсь бере кылиськом!

Алнашын 2015-тӥ арын  лэсьтыны кутскизы 500 интылы выль школа, угось алияз  пиналъёс уг тэро ни: 840 муртлы чаклам школа юртын 2 сменаен дышетске 1 сюрс 200 пинал. Проект усе 280 миллион манет тыр, уже кутэмын 49 миллионэз — соин ӝутыны луиз одӥг этажзэ гинэ. Александр Владимирович та югдурез тодэ, Россиысь Правительстволэн Тӧроеныз Д. Медведевен пумиськылыкуз, со ӝутӥз та ужпумез. Оглом югдур интыысьтыз вырӟыны кулэ. Дмитрий Анатольевич сӥзьыл чакла Удмуртие вуылыны (оло нош, Алнаше но, шуиз Александр Владимирович). Озьыен, бадӟым оскон вань, алнаш пиналъёс ӝоген выль шуныт-югыт юртын тодон-валан люкалозы шуыса.

Зэм, туала вакытэн ӵош вамышъяны уг сёты… ляб Интернет. Со татын туж ӝег — электрон почтаез эскерыны гинэ но уг луы, ӝожтӥсько дышетӥсьёс, кивалтӥсьёс, нош кызьы пиналъёс выль ивор утчалозы, презентациос лэсьтозы? Бадӟым шугъяськонъёс телефон связен но — Алнаш ёрос Татарстанэн артэ бере, татын соосты капыртэ роуминг, озьы вераськон туж дуно усе. Удмурт ёросысь гуртъёс уг адӟо удмурт телевидениез, учко бигерзэ! Луоз-а спутник, тунсыкъясько гуртоос. Спутник пумысен кивалтӥсь номыр ӧз сћзьы, угось со бюджетлы туж дуно усе, но малпаськом гуртъёсы оптоволокно кыскон сярысь, шуиз А. Бречалов. Соку «Мынам Удмуртиелэсь» программаоссэ учкыны луоз кабель пыр.

Сьӧд Ошмес гуртын улӥсьёс А. Бречаловлы пӧртэм юанъёсын вазиськизы.

Кинъёс утё гуртэз

Сюлмысь пумиськон ортчиз Сьӧд Ошмес гуртын. Нырысь аслаз фермер хозяйствояз куноосты пумитаз Владимир Сергеев. А. Бречаловез синмаськытӥз ужлы ӝабрес луэменыз. Владимир Ильич — азинлыко фермер, 15 ар талэсь азьвыл со аслэсьтыз хозяйствозэ усьтӥз, кутскыкуз 2 тракторез но 1 комбайнэз сяна ӧй вал, нош табере техникаез 35 ни. 340 сюро таза пудоез, 2 сюрс 28 гектар музъемез. Котыр ласянь юрттӥське гуртоосызлы, али, кылсярысь, гуртэ клуб пуктэ. Вань В. Сергеевлэн эшшо одӥг данъяськонэз — 2004-тӥ арысен со кутскиз ӟеч выжыысь вал вордыны, али солэн хозяйствояз 42 йыр ужпиосыз. Соос арнялы быдэ Казаньысь ипподромын ортчылӥсь ворттылонъёсы (скачкаосы) пырисько, туннэ нуналлы 6 кубоксы ни! Гуртысь огшоры егит тракторист Олег Шабалкин 2-тӥ арзэ гинэ ворттылэ ай, но вормисе потӥз ни. В. Сергеев кивалтӥсьёсты туж куриз таӵе ӵошатсконъёсты Ижын но ортчытъяны.

Та гуртын улӥсьёс туж ужасесь шуыса адӟиське, шуиз А. Бречалов. Соос  сюлмасько, гуртазы ужан интыос мед луозы, гуртсы медаз быры шуыса. Тани Людмила Алексеева вань улонзэ фермаын ужамын, пенсие потыса но, пиезлы юрттӥське — солэн аслаз хозяйствояз 22 скалэз, потэ вылэм ужзэс паськытатэмзы, но субсидия басьтыны кӧня ке гинэ баллзы уг тырмы… Сыӵе мылкыдын улӥсьёс гуртын эшшо вань на, Тӧролэсь ужзэ быдэсъясь сӥзиз юрттыны амал шедьтыны.

Алнашын но, Сьӧд Ошмесын но пумиськонъёс дыръя чузъяськизы удмуртлыкен герӟаськем юанъёс. Кылсярысь: кызьы тӥ учкиськоды удмурт кылэз но культураез азинтон шоры?

— Туж умой, — шуиз  А. Бречалов. — Адӟиськоды ук, кӧня ке толэзь ӵоже ми  «Удмурт Кенешен» вераським ни  Ижын Удмурт культурая центр лэсьтон но Кызьпу арамаез удмуртомытон сярысь, могӟетъёс луыны кулэ ӧвӧл удмурт кылъя учебникъёсын но — дышетэ гинэ ас кылдэс.

Кылъёссэ зэматыса,   А. Бречалов муниципал кылдытэтлы кузьмаз туэ 2-тӥ паларлы удмурт газетъёс-журналъёс басьтыны сертификат но удмурт книгаос.

Алнаш ёрос — азинлыко инты, татын трос луонлыкъёс, ужез гажась адямиос, соослэн трос тунсыко кичӧлтонъёссы. Мон котьку шуисько: юрттоно ужан дартэн адямиослы, ёросэ ветлэмез бере шуиз Александр Бречалов.

 

Зинаида Рябинина

Туспуктэм: udmurt.ru,

Зинаида Рябинина

 

Удмурт Дунне
By Удмурт Дунне 4 августа, 2017 11:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<