Александр Бречалов сярысь. Кортлэсь лэсьтэмын!

Удмурт Дунне
By Удмурт Дунне 20 августа, 2017 14:23

Удмуртиен 5-тӥ толэзьзэ кивалтэ ни Александр Бречалов. Котырысьтыз адямиос паймемын солэн трос но ӝог ужаны быгатэмезлы. Со уг вала, кызьы луэ нуналаз 8 час гинэ ужаны но арняяз 2 нунал шутэтскыны! Со уг ваньмы тэк вераськыса пукыны, соин ик  газетмылы интервью но сётӥз  ёросэ мынон сямен машинаын,  кӧснуналэ.

Александр  Владимирович Бречалов — Удмурт Элькунлэн Тӧроезлэсь ужзэ быдэсъясь.

Александр  Владимирович Бречалов — Удмурт Элькунлэн Тӧроезлэсь ужзэ быдэсъясь, вордӥськиз 1973-тӥ арын 18-тӥ ноябре Адыгеяысь Тлюстенхабль посёлокын. Йылпумъяз Краснодарысь С. Штеменко нимо вылӥ военной училищеез. Москваысь О. Кутафин нимо кун юридической академиез.

Ужаз Чкаловской  гарнизонысь режимъя службалэн начальникезлэн воштӥсез, Москваысь банкъёсын юрист но кивалтћсь луыса, Россиысь покчи но шоро-куспо ужбергатонъя «Опора России» общественной огазеяськонлэн президентэз вал.

Ужамын Россиысь «Калык фронтлэн»  валтӥсь штабаз.

2014-тӥ арысен кивалтэмын Россия Федерациысь Общественной палатаен.

Кузпалъяськемын.

Кык нылпиез.

— Александр Владимирович, туннэ командаеныды потӥськоды тужгес удмурт ёросэ — Алнаше. (Интервью лэсьтэмын 29-тӥ пӧсьтолэзе авт.) Татын, мукет интыосын сярысь, ӟечгес югдур удмуртлыкен, нош мукет интыосын сюлэмшугъяськонъёс трос. Шумпотымон, Удмурт культурая центр кылдытонлы дурбасьтӥды шуыса, нош мукет кичӧлтонъёс кылэмын луозы-а?

— Мон котьку дурбась-тӥсько ӟеч кичӧлтонъёслы. Соос калыклы кулэ ке, малы  юрттонтэмез? Зэмзэ вераса, мон паймемын вал, малы та дырозь удмурт шоркарын Центр ӧвӧл, малы уг шедьы коньдон учебникъёслы, малы нылпи садъёсын уг луы  удмурт группаос усьтыны — со сярысь вераськонэз ик ӧвӧл кадь. Соку ӧй кылдысалзы кӧтӝожъёс удмурт кылэз ваньзэс одно дышетытон пумысен. Дышетыны кулэ  нырысь ик асьсэос удмуртъёс, нош мукетъёс, тунсыко потӥз ке, дышетозы. Со понна луонлыкъёс кылдытоно. Выль центр солы одно юрттоз, малпасько.

— Тӥледыз Удмуртилы кивалтӥсе пуктэмзы татын улӥсьёс понна туж возьмантэм луиз. Нош асьтэлы? Тодылӥды-а  азьвыл Удмуртия сярысь, кема-а малпаськиды Владимир Путин сыӵе ӵектонэн вазиськем  бере?

— Малпаськыны кема ӧй малпаськы, нокыӵе кышканэ ӧй вал, угось та дырозь мон кивалтӥ Россиысь Общественной палатаен, ужамын армиын но, бизнес удысын но, ужан опытэ но бадӟым, кусыпъёсы но вань. Нош Удмуртия сярысь верано ке, конешно, азьвыл татчы ноку вуылэме ӧвӧл, маке-маке кылылӥ Калашников, оборона комплекс сярысь — со ваньмыз. Лыктон азям, валамон, тодматски Интернет пыр. Жаляса верано, вотэсысь мон тросгес пумитай  уродэн гожъямез, курламез. Но лыктӥ но — пайми. Ваньмыз чик но урод вылымтэ. Мон спортсмен бере, син шорам нырысь ик йӧто спортэн вырон интыос, оскелэ, татын соос синмаськымонэсь! Мон Г. Кулаковалэсь но А. Демидовлэсь комплексъёссэс гинэ уг вераськы, ёрос центръёсын но туж ӟеч стадионъёс, базаос.

Нош кыӵе  ужась татын калык. Синмаськымон интыос! Малпасько, ӝоген асьмеос быгатом тросгес туристъёсты кыскыны. Огкылын вераса, Удмуртия мыным туж кельше. Но ужамелэн емышез мед адскоз шуыса, кӧня ке дыр кулэ.

— Выль интыяды 3 толэзь но ужаса ӧд вуттэ, Иже вуылӥз Владимир Путин. Россилэн Президентэз котькуд улосэ уг вуылы: яке ӟечаз, яке уродаз… Та дыр ӵоже озьы ик пумиськылӥды ни Россилэн Правительствоезлэн Тӧроеныз Дмитрий Медведевен, Федерация Кенешлэн кивалтӥсеныз Валентина Матвиенкоен. Вера-а со, Удмуртия табере нимысьтыз саклык висъяно инты луоз, асьмеос федерал центрысь тросгес юрттэт басьтыны быгатом шуыса?

— Владимир Владимирович туж трос интыосы вуттӥське. Нош та рад со зэмзэ но ветлэ сыӵе улосъёстӥ, кытын 10-тӥ сентябре тӧроосты, губернаторъёсты быръёзы. Со мыным гинэ уг, ваньмызлы дурбасьтэ. Мукет ужпум — кызьы ми солэсь осконзэ быдэстом. Та рад вуылыкуз, Ижын ортчиз машина поттӥсьёслэн съездзы, отын туж бадӟым ужпумъёс ӝутэмын вал. Со сяна, ми быгатӥм Президентлы возьматыны Удмуртилэсь луонлыкъёссэ — Россиысь экспортъя центрлэн кивалтӥсез Пётр Фрадков тодматӥз, кыӵе вузъёсты Удмуртия палэнэ келя но кыӵеоссэ келяны луоз, со понна огкылъёс  утчано-тупатоно.

Дмитрий Анатольевичен пумиськылыкум, вераським  шаерамы школаос, нылпи садъёс пуктон, робототехникаен тунсыкъяськись пиналъёслы классъёс усьтон сярысь но мукет. Озьы огкылэ вуэмын, шаерамы 4 школалы коньдон висъямын луоз шуыса. Туэ сӥзьыл Д. Медведев Удмуртие вуылыны кулэ. Туэ ик дорамы вуылыны чаклало мукет бадӟым кивалтӥсьёс но: тазалыкез утёнъя министр Вероника Скворцова, лэсьтӥськонъя но ЖКХ-я министр Михаил Мень, транспортъя министр Максим Соколов. Отын номыр паймымонэз ӧвӧл — федерал кивалтӥсьёсын кусып возён, валче ужан — со мынам уже. Луоз-а солэсь элькунлы пайдаез — малпасько,  одно луоз.

— Общественной палатаын ужакуды, кыӵе бадӟым тунсыко проектъёс вордскизы кичӧл-тэмдыя? Кудъёссэ соос пӧлысь Удмуртиын улонэ пыӵатыны луысал?

— Общественной палата — со аспӧртэм социальной лифт. Отчы пырисько  сюлмаськытӥсь ужпумъёсты сэрттыны-пертчыны быгатӥсь шаплы адямиос. Соос, кин кыл вылын гинэ ӧвӧл, уж вылын возьмато асьсэлэсь улон шоры учконзэс (позицизэс). Милям активистъёсмы мыло-кыдо пырисько политикае но. Кылсярысь, Кун Думае кылемаз быръёнъёс азьын праймеризэз ортчыса, депутат луизы Николай Будуев, Николай Николаев, Дмитрий Созонов… Ноку озьы ӧй вал на — Дума 50 процентлы егитомиз.

Радъямы президент грантъёс сётъянэз. 2 пӧртэм фонд кылдытӥм, краудфандинг амалэн коньдон люкаса, сое улосъёсысь адямиослы люкылӥм. Кылсярысь, Эгра ёросысь Сэп гуртысь «Бырись гуртъёслэн музейзы» проект кылем арын 2 миллион манет утӥз! Туэ соослы ватсамын 700 сюрс. Трос-а со, ӧжыт-а? 700 сюрс — со та поселенилэн бюджетэз мында.

Удмуртие вуэме бере ик мон кылдытӥ Кичӧл-тонъёслы дурбасьтонъя фонд — муниципал кылдытэтъёс азе ужпум пуктэмын — грантъёс чотын котькуд ёросэ кысконо фондысь быдэн 10 миллион манет, но со понна тунсыко проектъёс дасяно. Ӵуказе ӵап та пумысен бадӟым кенеш ортчытӥсько.

Удмуртиын нырысьсэ ортчизы Титан ӵошатсконъёс. Финишын.

— Ӵуказе — арнянунал…

— Мон тодӥсько. Вот куке Удмуртия кун долгзэ тырыса быдтоз, куке ми ӟечгес улыны кутском — соку ик шутэтском. Мон малпасько, чиновник лыдъяны кулэ ӧвӧл, кӧня час со ужа, кӧня солэн шутэтскон нуналэз. Гуртоосты нокин но скал кысконлэсь, гырон-кизёнлэсь уг мозмыты ук. Вылаз ик, чиновникъёс, огшоры адямиосын ӵошатыса, 2 поллы тросгес уксё басьто.

— Сыӵе адямиосты милям кортлэсь лэсьтэмын, шуо. Кытысь сомында дарт, кужым?

— Озьы ик вань, мон айронмен (англи кылысь — корт адями). Мон 39 арескам гинэ айронмен* луи (триатлонэн вырыны кутски), со дырозь выри капчи атлетикаен, футболэн, малпасько вал, бероми, номыр уз пӧрмы ни. Но куке адӟи, 70 аресъемъёс 4 иськемез уяса пото, инсульт бере воргоронъёс велосипедэ пуксё… Нырысетӥ 30 иськемзэ бызьыку — бен, секыт, но собере 2-тӥ шокан усьтӥське. Нялтас вераса, нырысетӥ стартам, со Франциын ортчиз, мон ворми, отӥяз сокем ӧз удалтылы ни, но та висён бордам пыраклы паласькиз, табере мугорме кыдатытэк одӥг нунал но уг чидаськы. Али спортлы дыры трос уг кыльы ни, азьвыл стартъёс азьын нуналаз 5 час висъясько вал, но котькуд ӝыт, изьыны выдон азьын, одӥг час ӵоже мынам тренировкаос луо: яке уян, яке велосипед. Адямилэн, зэмзэ ке, туж трос кужымез, со ассэ жаля гинэ.

Со сяна, яратоно аслэсьтыд уждэ. Кытын но ӧй ужа, мыным котьку кельшылӥз, мар мон карисько. Осконэз быдэстоно.

— Тӥлесьтыд тусбуйдэс школадылэн Данъян пул вылаз возё, дыр, табере  элькунысьтымы кабинетъёсын кылдоз…

— Ӧвӧл! Мыным уг кельшы сыӵе сям. Нош школа сярысь ке — отын номыр понна монэ данъяны. Урод ӧй дышетскы, но отличник ӧй вал, дисциплиная юанъёс кылдылӥзы… Сое валаса, монэ анае военное пырыны косӥз. Туж секыт вал, но али со понна тау карисько. Училищеез мон горд дипломен йылпумъяй ни, отын уг яра вал урод дышетскыны — каникулэ ӧз лэзьылэ. Но дышетскем школаям, Краснодаре, вуылӥсько, быгатэмея юрттӥсько. Вылаз ик, отын уло песянае но анае, апае (со мынэсьтым 3 ареслы бадӟымгес). Соослэсь данъяськемзэс тодӥсько но шумпотӥсько, осконзэс быдэстӥ шуыса. Анай-атае мыным сомында сётӥзы — сое ноку берыктэме уз луы, дыр.  Ми вал туж огшоры семья: песянае-песятае — Поволжьеысь немецъёс, ас вакытаз соосты сутка ӵоже Сибире келяллям, собере соос 40 ар шахтаын ужамын. Атае огшоры лэсьтӥськись вал, анае «Союзпечатьын» ужаз. Атай машина но басьтӥз ай монэн ӵош гинэ — военной училищеез быдтэме бере быдэн «шестёрка» заводим. Но мон ноку но ӧй шӧдылы, урод улӥськом шуыса. Милемыз котьку яратӥзы. Милям семьяямы ӧз керетылэ, ог-огенызы кенешыса улӥзы. Милям али но туж шуныт кусыпъёсмы, ӝыт но, ӵук но телефон пыр вераськиськом. Тани туннэ ӵукна гожтэмез (айфонысьтыз вайберзэ усьтэ): «Бур ӵукнаен, пие! Нуналэд  мед удалтоз».

Айромен. Ужаны кужым сётэ спорт.

— Вотэсбамысь туспуктэмъёстыя валам, семьяды Иже вуылэ шуыса. Кызьы учкизы соос улон интыдэс воштэмды шоры? Уг пот-а Удмуртия «дунне пыдэсэн»?

— Бен, одӥг пол гинэ ӧз ни вуылэ. Соослы татын туж кельше: театръёс но, Калашников музей но… Ижын трос тунсыко интыос, быдэс Удмуртиын — уката но. Нылмы но пимы — кыктоос, но туж пӧртэмесь: пие мон кадьгес, уянэн выре, нылмы эктэ. Соос анаенызы ӵош Москваын уло, сентябре 11-тӥ классэ мынозы.

Елена кузпалэным 5-тӥ классысен тодмоесь. Солэн валтӥсь ужез — пиналъёсын вырон, но со вуттӥське ужез но бергатыны — варматаеным  ӵош Краснодарын бизнесэн выро. Огкылын вераса, кузпалы, семья утем, нылкышно ужъёсты быдэсъям сяна, уксё но поттэ.

— Тодӥськоды на-а тӥ нырысетӥ но берпуметӥ лыдӟем книгаостэс?

— О, милям семьямы туж лыдӟиськись, анае «Союзпечатьын» ужа вал бере, дорамы лачак басьяз журналъёс, книгаос. Мае лыдӟи пичи дыръям — уг тодӥськы ни, выжыкылъёс, дыр. Нош ньылыса кадь лыдӟиськыны кутски 9-тӥ классысен: «Искатель», «Нева», «Огонёк» журналъёс. Яратоно писательёсы вал — А. Дюма, Т. Драйзер… Берпуметӥосыз пӧлысь ке, выльысен лыдӟи Рене Моборнлэн «Стратегия голубого огня» книгазэ, со бизнесэн вырисьёслы чакламын. Мон сое 5-6 ар талэсь азьло лыдӟи ни вал англи кылме волятон вылысь.

Али книгаен кылльыны трос дыры ӧвӧл (со сярысь ке юамды потэ), но  айфонам скачать кари аудиобиблиотека, сюрес вылын мынон-ветлон сямен кылзӥськисько, туж яра, со аспӧртэм аудиоспектакль кадь. Олокӧняетӥзэ лыдӟи ни М. Булгаковлэсь «Мастер и Маргаритазэ» — котькуд пол маке выльзэ усьтӥсько. Трос пол выльысен лыдӟисько Э. Ремаркез. Но яратоно произведение но  фильме — «В августе 44-го…» (В. Богомоловлэн «Момент истины» романэзъя, режиссёрез М. Пташук — авт.).

Али котькуд ёросын ӝожтӥсько: Интернет ляб. Бен, Интернет кулэ, сотэк шуг, но оскелэ, со гинэ уз кары тӥледыз визьмогес но шудогес. Книгаосын сомында тунсыкоез!

 

*айронмен — 3 этаплэсь ӵошатскон: 3,86 иськеме уян, 180,25 иськем шоссе кузя велосипедэн ворттон, 42,195 иськеме пыдын бызён. Триатлон ортче 1 нунал ӵоже, дуннеысь тужгес секыт спортэн лыдъяське. 

 

Печатлаське дунтэк. А. Бречаловлы инты висъямын ФЗ-67 законъя.

Зинаида Рябинина

 

Удмурт Дунне
By Удмурт Дунне 20 августа, 2017 14:23