02 ивортэ: липет улэ пачказ, вынзэ вииз, нылпиос быризы…

Удмурт Дунне
By Удмурт Дунне 14 августа, 2017 10:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Липет куашказ, улон быриз

 6-тӥ августэ ӝыт 8 часын Ижын кышкыт учыр луиз. 15 аресъем пияш вылэ вуж гаражлэн липетэз куашказ.
Элькунысьтымы Следствиея управление ивортэмъя, пинал вылэ бетонлэсь секыт плита усем. Пияшлэсь улонзэ утьыны ӧз луы ни.

Шоркарысь Вотка шоссе ульчаысь куштӥськем гараже пияш эшъёсыныз ӵош лыктэм вылэм. Эскерон мынэ на.

Ӧз жаля эшсэ но, вынзэ но

Балезино ёросысь 40 аресъем кышномурт, 9 аресъем пиезлы 14 тырмиз ке, 5 арлы пытсэт сьӧры пуксёз. Кыл кутон улэ со кыскемын 2 йыруж понна.

Кышномурт нырысь лушкаськем. Огаз ӝытэ тодмоеныз курытсэ юэм, соин ӵош банкомат дуре васькем. Ӵапак соку ик тодмоезлэн картаезлэсь пин-кодъёссэ йыраз кельтэм. Юлтошез кудӟыса ульчае пограм бере картазэ талам но отысь 10 сюрс манетсэ капыртэм.

Та учыр бере кӧня ке нунал ортчыса, кышномурт выныныз куаж-куаж керетэм. Йыркурзэ пушказ возьымтэ — тӥр кутыса, вынызлэн йыраз 14 пол шуккылэм. Соиз интыяз ик кулэм.

Лушкаськись кырмемын

Вавож ёросысь но Пермь улосысь полицейскойёс, ӵошен ужаса, кырмизы федерал розыске сётэм 54 аресъем кышномуртэ.
Со Уголовной кодексысь 159-тӥ статьяя — алдаськыса лушкаськон — кыл кутон улэ кыскемын вылэм. Кылем арын Вавож ёросысь арлыдо воргоронлэсь 350 сюрс манетсэ капыртэм. Пенсионерез пӧям: коньдонды вуж, выленыз одно ик воштоно. Песятай пӧечилы оскем но ватоссэ поттэм.

Пытьыосызъя медаз шедьтэ шуыса, кышномурт та учыр бере Пермь улосэ кошкем. Но отын но солы югдурез утисьёслэсь пегӟыны ӧз кылды.


Ӵынэн ӵогӟизы

Камбарка городысь 33 но 44 аресъем кузпалъёс вылэ ӝутэм уголовной уж судэ келямын. Соос 109-тӥ статьяя — адямиез малпаськытэк виён — кыл кутон улэ кыскемын.

Кузпалъёслэн 5 нылпизы вал. Туэ 9-тӥ июне, 3 пиналъёссэс сьӧразы кутыса, соос ужъёссыя кошкиллям. Квартирае 5 аресъем пизы но 3 аресъем нылзы кылиллям. Таос асьсэлы шудон шедьтӥллям — диванэз   ӝуатӥллям. Тыл соку ик быдэс квартирае вӧлскем. Ӵынэн ӵогӟыса, 2 нылпиос быризы.

 

Юонлы уксё утчаз

Шаркан ёросысь Мыддорин гуртысь медпунктэ лушкаськись пырам. Та пумысен полицие вазиськиз фельдшер.

Югдурез утисьёс соку ик гуртэ потӥзы, ФАП-ез эскеризы. Йыртэмась отчы пырем, тунгонэз тӥяса. Пытьыосызъя со кырмемын вал. Медпунктысь коньдонэз капыртэм Мыддоринын улӥсь 33 аресъем воргорон. Кыл кутон улэ трос пол шедьылэмын вылэм ини. Курытэныз эшъяське. Лушкаськыны но пырем, юонлы уксё утчаса. Ӝутэмын уголовной уж.

 

Улэ отын, лушкаське татын

Глазов городысь огаз коркалэн подъездаз почтаын ужась кышномуртлэсь  100 сюрс манетсэ талазы. Та коньдон чакламын вал пенсионеръёслы люкылыны.

Лушкаськись, ымныраз маска дӥсяса, кышномуртэ пуртэн кышкатэм. Бӧрысь сумказэ ишкалтэм но пегӟем. Подъезд котырысь видеокамераос юрттӥзы сое шараяны. Йыртэмам Глазов ёросын вордӥськем, али Санкт-Петербургын улӥсь 47 аресъем воргорон. Ӝутэмын уголовной уж.

Дасяз Ольга Корепанова

Удмурт Дунне
By Удмурт Дунне 14 августа, 2017 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<