Усьты Удмуртиез! Маин москваослы тунсыко шаермы

Удмурт Дунне
By Удмурт Дунне Июль 7, 2017 14:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ортчем шутэтскон нуналъёсы Москваысь Эрмитаж садын гурлаз-юмшаз удмуртъёслэн Гербер шулдыръяськонзы. Россилэн шоркараз со 3-тӥзэ ортчиз ни. Маин туэ паймытӥз?

Дуннеысь тодмо шахматист С. Карякин шудӥз Ижысь нылпиосын.

 

Ӟечбур, Москва!

Гербер азьын, нунал азьлапал, Москваын шимес тӧласькиз но зорыса улӥз. Чакламын вал, Удмуртиысь кӧня ке автобусъёсын лыктэм артистъёсмы, Киужъёсъя элькун центрысь, Эшъяськон юртысь ужасьёс ӝытазе репетиция карозы. Но куазь шузимиз, лэся, толэзьлы чаклам зорзэ нуналскын кисьтоно кариськиз. Соин ик ӵуказе нуналэз ваньзы туж сюлмаськыса витизы.

1-тӥ пӧсьтолэзь, сайкыт инбам, уйбыт мисьтӥськем Эрмитаж сад. Син шоры соку ик йӧто удмурт пужыосын ӧтёнъёс. Татчы кыстӥсько  Москваын улӥсьёс, Россилэн шоркараз дышетскись но улӥсь улосчиосмы. Садэ пырисьёсты кырӟаса-вераса, буй-буй нянен пумитало удмурт коллективъёс, волонтёръёс ваньмызлы сётъяло удмурт Герберлэсь программазэ. Тунсыко: программаын вань пичи удмурт кыллюкамез. Озьы москваос удмурт сямен ӟечбуръяськыны, вазьыны дышетско ни.

Герберез удмурт кырӟан-эктонъёсын усьтӥз «Айкай» фольклор театр. Калыклы вазиськизы Удмуртилэн Тӧроезлэсь ужзэ быдэсъясь Александр Бречалов, Москваысь Калык кусыпъёсъя но улосъёсын кусып возёнъя департаментлэн кивалтӥсез Виктор Сучков но Москваысь удмуртъёслэн «Герд» огазеяськонзылэн ки-валтӥсез Николай Подседерцев.

— Удмуртъёс ярато асьсэ культуразэс, — шуиз Александр Бречалов. —  Та праздникез ми радъяськом, Удмуртия сярысь Москваын улӥсьёс тросгес мед тодозы шуыса. Куд-огез малпа, Удмуртия — со Калашниковлэсь автоматсэ поттон инты гинэ. Но Удмуртия — со туж тунсыко но яркыт дунне.

— Таӵе праздникъёсын ми ог-огмылы матэгес луиськом, — шуиз Виктор Сучков, Москвалэн мэрезлэсь, Сергей Собянинлэсь, ӟечкыланзэ лыдӟыса.

Герберлэсь пуссэ — Можга ёросысь Герберысь ваем Кылдысинэз — сётӥзы Москвалэн кивалтэтэзлы.

Башкириысь но шаерысьтымы удмурт кенакъёс шулдыртӥзы Герберез.

 

Маин ми дано? 

Оглом Герберын 10 азбар ужаз. «Тодматске Удмуртиен» нимаськисяз калыкез шулдыртӥзы Тол бабай но Лӧпшо Педунь, киысьтызы арганъёссы ӧз ик усьылэ кадь. Татын ик нылпиос удмурт шудонъёсын шудӥзы, гозы вамен тэтчазы, Лӧпшо Педуньлэсь  туссэ пазлъёсын бичазы. «Усьты Удмуртиез» сэрегын калыкез тодматӥзы шаермылэн туризм ласянь аспӧртэмлыкеныз, бичазы Удмуртилэсь мозаика картазэ. «Кылзы Удмуртиез» площадкаын П.Чайковскийлэн музеетӥз 3D экскурсия радъяськиз, нош «Лэсьтэмын Удмуртиын» интыын «Патриот18» движение пыриськисьёс  Калашниковлэсь автоматсэ бичаны дышетӥзы. Татын черодын сылӥзы нылъёс но. Герберын автомат бичанъя рекорд 27 секунд луиз.

Аспӧртэм пу верандае интыяськем «Шуд Удмуртиен» площадкаын лачмытак пукизы нылпиос — Можга ёросын ортчем Герберын шахмат турнирын вормемъёс. Соос асэныз Сергей Карякинэн, шахматэн ӝог шудонъя дуннеысь чемпионэн, тодматскизы. Ижкарлэн нуналэзлы сӥзем турнирын вормисе потэм нылпиос — Мария Носочёва но Даниил Осипов — Сергей Карякинэн кужымзэс мертазы. Эшшо одӥгез кизили —  Россилэн шахматэн шудонъя кык пол чемпионэз Александр Морозевич — вань пинал шахматистъёсын огдыре шудӥз.

— Удмуртия туж кужмо луэ шахматэн но шашкиен шудӥсьёсын, — пусйиз Удмурт Элькунлэн Москваысь представительствоезлэн кивалтӥсезлэсь ужзэ быдэсъясь Михаил Хомич. — Соин ик тыршоно та удысэз азинтыны.

Маин эшшо дано Удмуртия? Турнир йылпумъяськиз гинэ, верандаын кутскиз куасэн бызьылонъя чемпионъёсын Галина Кулаковаен, Тамара Тихоноваен но Иван Черезовен пумиськон. Та вакытэ  ик Эрмитажысь пичи сцена котыре калык кыстӥськиз. Татын «Тодад возь Удмуртиез» флешмоб кутскиз. Вань мылкыд карисьёс Удмуртилэсь утись пуссэ — шунды — лэсьтӥзы. Аспӧртэм шунды Удмуртилэн куншетаз но, кунпусаз но вань. Вылӥысен беспилотникъёс съёмка лэсьтӥзы. Флешмобе султэмъёс, шумпотэмзэс вераса, киосынызы шоназы, тыпыртӥзы гинэ — шундыё инбамысь зор ведраен кадь кисьтӥськиз. Ярам, со юзматӥз гинэ, нош ик пальыштӥз шунды. Утись пус зэмзэ но утиз! Автозаводмылэн празднике ваем выль автомобильёсыз эшшо но золгес чиляны кутскизы. Вань мылкыд карисьёс та машинаосы пуксьылыны быгатӥзы.

Сумка тыр книга

Туэ Герберын, «Айкай» фольклор театр сяна, калыкез шулдыртӥзы «Silent Woo Goor», «Малыми» рок-группаос, «Suomi» группа, «Детская новая волна-2017» конкурсын вормем улосчимы Арина Петрова но мукетъёс. Удмурт шӧмо дэремъёсын коллекцизэс возь-матӥзы модельеръёс  Татьяна Москвина, Полина Кубиста но Олег Ажгихин. Куд-ог дэремъёслы учкисьёс сокем синмаськизы, татысен ик басьтӥзы.

Калык ӧз бырылы Можгалась фермер Галина Белозёрова дорысь. Москваысь Гербере кышномурт арлы быдэ аслаз мылкыдызъя, машинаяз пуксьыса, лыктэ. Туэ но 200 килограмм пала пельнянь но мукет продукцизэ ваем. Москваос, пе, лыкто, пӧсь пельнянь сиё, кельше но эшшо доразы нуон вылысь басьто на. Шоркаръёслы туж ярало йӧллэсь поттэм сиён-юонмы но. Али шаерысьтымы ужбергатӥсьёс рос-прос малпасько Москваын но лавкаоссэс усьтон сярысь.

Асьмелы Москваын кадь ум но потӥське, Удмурт шаерын удмурт калык пӧлын кадь, пальышало удмурт пужыё ӝӧкъёс сьӧрын чай ӟузьылыса пукись кенакъёс. Таосыз — Башкириысь фольклор коллективъёсы ветлӥсьёс. Гербере соос асьсэ коньдонэнызы 30 кузя вуиллям. Лыктытозязы 2 пол дугдылӥллям, инкуазьын ведра тыр шыд пӧзьтыса, шутэтскыса-кырӟаса пукиллям.

Котьку сямен ик, Герберын удмурт книгаосын но пӧртэм чеберъяськон арбериосын, синпель кузьымъёсын вуз карон мынӥз. «Удмуртия» издательстволэсь мыло-кыдо басьтӥллям удмурт выжыкылъёслы, дӥськутлы, пӧраськонлы, мадёсъёслы сӥзем книгаоссэ, «Удмурт-ӟуч, ӟуч-удмурт кыллюкамзэ». Паймымон, лыктӥзы, пе, егит пиос но 2 сумка тыр книга басьтыса, кошкизы…

Праздниклы рос-прос дасяськем Киужъёсъя элькун юрт. Станокен куиськон доры кожазы пиосмуртъёс но. Татын ик кускерттонъёс лэсьтонъя мастер-класс радъяськиз, вӧзаз куды пуныны дышетӥзы, палэназгес горд сюйлэсь горшокъёс лэсьтӥзы.

Оглом праздник удалтӥз. Отчы 8-10 сюрс пала калык пыриськиз. Зэм, ӧжытгес вал удмурт коллективъёс. Но таиз Гербер азе мукетгес ужпум пуктэмын вал: возьматоно, маин узыр Удмуртия. Культурамес гинэ ӧвӧл, предприятиосмес, уж-бергатӥсьёсмес, выль технологиосмес. Туристъёслэн, инвесторъёслэн дорамы лыктэмзы мед потоз. Сюлэм шунтэм вӧй кадь луылӥз, куке москваос бадӟым тунсыкен юалляськизы: нош мар шуэм со — Гербер? Нош трос-а Россиын удмуртъёс? Маин дорады мыныны умойгес луоз? Озьыен, калыклэсь мылкыдзэ вырӟытыны луиз.

Елена Миннигараева

Туспуктэмъёс: udmurt.ru
Елена Миннигараева

 

 

Удмурт Дунне
By Удмурт Дунне Июль 7, 2017 14:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<