Удмуртия толлы 36 процентлы дась

Удмурт Дунне
By Удмурт Дунне Июль 24, 2017 09:39

Та сярысь ивортӥз энергетикая, ЖКХ-я но тарифъёсты кун ласянь радъянъя министрлэсь ужзэ быдэсъясь Иван Маринин.

ЖКХ-я но тарифъёсты кун ласянь радъянъя министрлэсь ужзэ быдэсъясь Иван Маринин.

 

Кысык вакыт

Куазь зорылыса улэмен, ужъёс кӧнялы ке ӝегаса мынӥзы вал. Но али коммунальщикъёс уй но, нунал но тупатъяло ву, шуныт сётон гумыосты, котельнойёсты чаклало. Котькуд ёрослы толлы дасяськон понна ог 100 миллион манет висъямын. Уката чырмыт ужало Вотка городын но Вотка, Каракулино, Сюмси ёросъёсын — таос планзэс 50 процентлэсь ятырлы быдэстӥзы ни. Ӝеггес выро на Пичи Пурга, Грак палъёсын  — ужъёссы ог 17 процентлы быдэстэмын.  Но Иван Маринин лыдъя, толлы  элькунмы дась луоз, азьло аръёсы сямен, шуге-леке вуыны кулэ ӧвӧл.

— Ижын туннэ нуналлы 28,7 процентлы ужъёс быдэстэмын,  — шуиз со. — Но татысь коммунальщикъёс азе, азьло аръёсын ӵошатыса, уката бадӟымесь ужпумъёс пуктэмын. Элькун бюджетысь 500 миллион манет висъямын. Кылем арын шугъяськонъёс кылдӥзы вал Балезино ёросын. Но отын туэысен ужаны кутскизы выль котельнойёс.

Муниципал кылдытэтъёслэн йыръёссылы шуэмын: чебер лыдпусъёс сьӧры уйиськоно ӧвӧл, зэмос югдурез возьматоно. Но озьы-а, тазьы-а, 15-тӥ сентябрёзь элькунмы дась луыны кулэ эстӥськон вакытлы.

Котельноез эстэ автомат

Зэмос югдурез син азязы возён вылысь ёросъёсы потало Правительстволэн ёзчиосыз но. Алигес вуылӥзы Ува палъёсы. Иван Маринин отысь югдурез умоен лыдъяз.

— Ог ар талэсь азьло гинэ Уваын шугъяськонъёс ӧжыт ӧй вал, — шуиз со. — Управляющей компаниослэн тыронъёссы люкаськизы ву, шуныт сётӥсь предприятиос азьын. Нош али ваньмыз радъяськемын.

Ува каргуртысь шор котельной, кылсярысь, быдэсак дась ни толлы. Ёрос йырлэн лэсьтӥськонъя, ЖКХ-я, транспортъя но связья воштӥсез Константин Огородов вераз:

— Котельной усьтэмын 1979-тӥ арын. 2011-тӥ арын отысь тӥрлык быдэсак воштэмын. Озьы ке но арлы быдэ ик мае ке туала шӧмъем каро на.

Котельнойын выль-дӥськонъёсты ас вылаз туж шӧдэм Виктор Чернявский но. Слесарь луыса со татын 14 ар ужа ни. Шуэ: ваньзэ автомат радъя-эскере, мониторъёс вылын умой адӟиське, кытын кыӵе югдур. Соку ик адӟиськом, кытын ке тырмымтэос вань ке.

— Зэм, сыӵе учыръёс ӵем ик уг луыло,  — вера со. — Но марысь-мар ке, ми ӝогак отчы потӥськом, час куспын тупатӥськом.

Туала технологиосты пыӵатэмен, та котельнойын вань ужъёсты лэсьтыса вуттэ 8 специалист. Нош шунытсы вуэ 64 улон юртъёсы, 4 нылпи организациосы, 1 эмъяськонние, 5 культурая учреждениосы.

Оглом Ува ёрос толлы ог 40 процентлы дась. Эскеризы ни вань шуныт сётон гумыоссэс. Кытын шараяськизы тырмымтэос, та вакытэ чырмыт палэнто. Сузмем гумыоссэс кышъянэн уг выро ни — туала куронъёслы тупасьёсыныз вошто.

Та сяна, пӧсь гужемъёсы Ува каргуртын ву тырмемысь дугдылэ: калык бакча емышъёссэ кисьтамен, юыны уг кыльы ни. Но таиз ужпум но, шӧдске, сэрттэмын-пертчемын луоз. Отын уже кутыны чаклазы 300 кубической метръем цистернаез. Интыямын со музъем улэ, кылемын ай совето вакытъёсысь. Берло дыре тэк кыллиз. Табере солэсь кулэлыксэ нош ик валазы.

Элина Кумачёва

Туспуктӥз А. Горбунов, 

Udmurt.media

 

Удмурт Дунне
By Удмурт Дунне Июль 24, 2017 09:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<