Чуланысь шедьтэм узырлык

Удмурт Дунне
By Удмурт Дунне Июль 26, 2017 15:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пётр Павлович Гущин — Алнашысь тодмо удмурт шаерчи.

Туэ апреле 125 ар тырмиз Пётр Павлович Гущинлы — Алнашысь тодмо удмурт шаерчилы, «Гудыри» газетын берыктӥсь луыса ужам муртлы, шаермылэн историез, калыкмылэн сям-йылолъёсыз сярысь очеркъёслэн, тодэ ваёнъёсын но кылбуръёсын рукописьёслэн авторзылы. 

«Кылёз ук та дуннее лёгем но пытьые…» — таӵе чурез вань П. Гущинлэн одӥгаз кырӟаназ. Но «лёгем пытьы» — со улоназ лэсьтэм ужъёсыз гинэ вылӥллямтэ, со гожъяса кельтэмъёсыз но. Соос сярысь тодмо луиз, Пётр Павлович улонысь кошкем бере 22 ар ортчыса гинэ.

1998-тӥ арын, шаертодонъя материал гожъяса ветлыкум, пыри Пётр Павловичлэн Алнашысь пуктэм но улэм юртаз. Кенэз С. Гущина монэ чуланазы ӧтиз но фанералэсь лэсьтэм коробез возьматӥз. Отын бугыръяськонъям паймыса но шумпотыса йыры ик берганы кутскиз (узырлыкен ватос шедьтӥсьёслэн мылкыдзы сыӵе ик луэ, дыр).

Бумагаен тырмем сандыкын вал пӧртэм документъёс, туспуктэмъёс, шаермылэн историеныз, сям-йылолъёсын герӟаськем тодэ ваёнъёс, топонимикая, алнашъёслэн выжыоссыя материалъёс, схемаос, дневникъёс но кылбуръёс-кырӟанъёс. Вань та рукописной материалэн шаертодонъя кружокам 15 арлэсь кема ужамы. Соос вылэ пыкиськыса, гожтэмын пӧртэм эскеронъёс, исследовательской ужъёс.

Алнаш черкогуртлэн 260 ар тырмонэзлы сӥзьыса, 2011-тӥ арын «Анлаш… Троицкое… Алнаши…» книга потӥз. Та книгаям пыртыны тырши П. Гущинлэсь исторической но этнографической очеркъёссэ,  кӧня ке кырӟанзэ.

 

Пинял дауре туж секыт ортчиз,

Куинь войнае ик ветлоно луи.

Кулак каронэз но адӟоно луи,

Сапдан колошаез но  адӟоно луи.

 

Кускам тӥр поныса, кырын-бурын

Секыт ужъёсыз ужаса ветлӥ.

Куректӥсько шуыса, кайгырисько шуыса,

Вина юыны мон ӧй чӧлтӥськы.

 

Нылпиосме будэтыны тырши,

Ваньзэ ик калыке   поттӥ.

Ӵок, уг ни гожты ваньзэ ортчемзэ,

Пушкы тыре, бӧрдэме потэ…

 Кузь улон сюресэз ортчиз Пётр Гущин (1892-1976), 3 война пыр потӥз, кытчы гинэ ӧз вуттэ сое ож сюресъёс, кыӵе но курадӟонъёс пыр потоно ӧз лу улоназ! «Дан тыныд, Анлаш селомы! Ӧвӧл дунне вылын тынэсьтыд мусоез, тынэсьтыд чеберез, тынэсьтыд шулдырез. Мон адӟи Москваез, Харьковез, Киевез, Ростов-на-Донуэз, Казанез, Уфаез, Пермез, Кировез. Мон вал Румыниын, Австриын, Буковинаын, калги Карпат гурезьёстӥ. Одӥгез но та вылӥ верам интыос монэ бордазы ӧз кыске. Мон вордӥськи Анлашын. Ӟечкын мед кулом Анлашын…» — гожтэм П. Гущин.

Алнашын улӥсь тросэз мӧйыос тодо на Петыр агаез: визьмо, йӧно, ужась, гажамон, котькинлы ужен но визь-кенешен юрттыны дась луись воргоронэз. Со ёросамы черепица поттонэз радъяз, трос аръёс ӵоже Алнашысь «Мотор» колхозэн кивалтӥз. Даурез ӵоже киысьтыз перозэ ӧз куялля. Аслаз статьяосаз со ӧтьылӥз инкуазез, шаермес утьыны, ас калыкезлэсь ортчемзэ, выжызэ тодыны.

Удмурт калыклэн трос дано но визьмо пиосыз. Пётр Гущин вал нырысетӥосыз пӧлын, уго Т. Борисовен артэ ужаз «Гудыри» газет поттон бордын. Кытын гинэ ӧз тыршы Пётр Гущин: газетын-а, заводын-а, колхозын-а — котьку вал нырысетӥ радын, котьку вал гажано адями.

Пётр Гущинлэн «Кузь сюрес» ужез — аслаз улонэз сярысь. Солэсь куд-ог люкетъёссэ удмурт лыдӟисьлы ӵектӥсько, уго алнаш воргоронлэн улонэз пыр яркыт адӟисько калыкмылэн, удмурт газетмылэн историез, даур кутсконысь бугырес аръёс.

Нина Новгородцева, шаерчи

 

Пётр Гущин. Куз сюрес

«Великой Октябрьской революцилэн 40 арезлы сӥзьыса, мынам но ортчем сюресме вераме потэ. Та дуннеын 65 ар улытозям, оломаре но адӟоно луиз…  

Со вал 1904-тӥ арын, мон дышетскисько вал Алнаш школаын. Мыным шуд усиз удмурт кылын книга лыдӟыны. Огпол дышетӥсьмы Иван Васильевич Яковлев монэ урок бере кельтӥз но пичи гинэ книга сётӥз, со вал удмурт кылын календарь. Кыӵе мон шумпотӥ! Доре бертыса, лыдӟыны кутски. Быдэс семьямы мон котыре люкаськиз. Семьяямы 8 адями вал. Мон сяна нокин лыдӟиськыны уг быгаты вал. Олокӧня ӝыт мон со книгаез быдэс семьямылы лыдӟи.

Вуоно араз дышетӥсе кузьмаз мыным мукет удмурт книга. Со книгаын печатламын вал Николай царьлэн манифестэз. Со манифестын вераське вал, выт тырон кулэсмоз шуыса. Мон со манифестэз селоысь крестьян калык азьын лыдӟи. 1905-тӥ арын налогъёс кӧнялы ке кулэсмизы ик, но шумпотон кемалы ӧй вал. Вуоно араз тыриськонъёс нош ик будӥзы. Куанер крестьян калыклы нокытчы вал ӝожтӥськыны. Котькытын вал сютэм улон, куашканы вуэм гуртъёс, пӧртэм висёнъёс, пеймыт куанер калык…

Одӥг пол вазь ӵукна ми доры пыризы староста, подать бичась но десятник. Десятник азяз значоксэ жильыен ошем, озьы ик староста но. Тон дорын ПУС, валдэ кыткы али, выт тырыны пумитъяськисьёслэсь ваньбурзэс поттано, шуо. Мон вал кытки. Мынӥсько урам кузя. Мыно но пыро куанер улӥсьёс доры. Потто кудӥзлэсь самоварзэ, кудӥзлэсь тушаксэ, миндэрзэ но мукет дуно арбериоссэс. Кыӵе бӧрдыса кыле вань семьязы…

 

* * *

1915-тӥ арын сентябрь толэзе монэ мобилизовать каризы Первой мировой империалистической  войнае. Эксэй закон дыръя пиналъёсыз солдатэ ке нуо, соос туж бӧрдыса кошко вал. Первой соос пӧлын туж ӧжыт вал гожтэт тодӥсез, даже ӟуч кылэз но уг тодо вал. Ӟуч кыл но тодымтэ бере, гожтэт но тодымтэ бере, соослы туж секыт йӧтэ вал политзанятиосын (азьло «словесность» шуо вал). Со словесностез юало ке, [солдат] уг ке быгаты вераны, пель дораз чабкылыса, юало вал. Нош маршировать карыны пыдзэс ке сурало, сыӵеоссэ прикладэн ӝуго вал. Нош мар карод, гожтэтэз но ӟуч кылэз уг тодо бере.

Монэн ӵош служить кариз туймыйыл пи. Со чик гожтэт уг тоды вал, «а» букваен «б» букваез но уг люкы вал. Офицеръёс сое жугытэк одӥг нунал но уг ортчы вал: яке чабкыло, яке прикладэн, я плёткаен жуго. Озьы жугыса воземзы бере со пияш туж зол висьыны кутскиз, службалы но воксё ярантэм луиз.

Туж секыт вал пичиесь национальностьем калыкъёслы: удмуртъёслы, поръёслы, чувашъёслы — ваньмызлы пичиесь нациослы. Одӥг учыре мынам но ӝимеме вань. Со вал Уфаын 1915-тӥ арын. Милемыз дышето вал тӧдьы Кам дурын ӵошкыт возь вылын, ӧтын кыӵе ке завод вал. Мон ӝими правофланговое. Ротной командир прапорщик команда сётӥз. «Направление на эту трубу», — шуиз но кузь заводской труба шоры возьматӥз. Сыӵе трубаос отын трос. Ну, мон копак ротаез нуисько ини со труба шоры. Ротной командир лыктӥз но мыжыкеныз мынам гурулам туж зол донгиз, ӟигары ик быриз. «Не на ту трубу, а на эту», — шуиз [командир]. Ой, йыры кур луиз, вӧсь но кариз.

Монэ басьтэмзы бере Уфаын 3 арня дышетӥзы но Австрийской фронтэ келязы, 104-тӥ Устюжской полке. Декабрь толэзе со аре ик мон ранить луи. Собере монэ келязы Новочеркасск-на-Дону городэ госпитале (Общество Донских врачей). Йӧнам берам келязы Москвае, Клязьма дачае. Отын огшап возем беразы 1916-тӥ арын январе келяло Тамбовской губерниысь Козлов городэ (али сое Мичуринск шуо) запасной батальонэ. Отын огшап возем беразы нош ик фронтэ келяло 10-тӥ стрелковой Финляндской полке. 1916-тӥ арын август толэзе мон кыкетӥзэ ранить луи. Собере монэ келяло Саратовской губерниысь Петровск городэ военной лазаретэ. Петровскысен монэ келяло Ростов-на-Дону городэ запасной батальонэ. Татчы сюрем берам условиос воксё мукет луизы. Мукет частьёсын, занятиосын ӧжыт уд ке быгатӥськы, жуго вал, нош татын командной состав туж умой относиться кариське вал. Мукет частьёсын командиръёс «Здорово, братцы!» шуыса здороваться карисько вал, нош Ростовын полковник «Здорово, товарищи!» шуэ вал, ми солы воксё паймим. И сиён но ӟеч вал.

«Безбожник» колхозысь крестьянъёсын ӵош. 1960-тӥ ар.

 

* * *

Со вал 1917-тӥ арын январь толэзе. Занятие дыръя ял карыку, отделенный командир младший унтер-офицер Смолин, палэнэгес нуыса, мыным лушкемен вераз, Россиын, пе, революция дасяське, эксэез, пе, поттыны туртто. Со кыл мыным паймымон потӥз, ми уго эксэез кыӵе ке инмар пуктэм кожаськом вал, кызьы сое уллялод, эксэйысь куштод?

Одӥг пол 1917-тӥ арын январь толэзьлэн пумаз уйин туж ӟеч изён вакытэ монэ кин ке но, пыдам йӧтылыса, лушкемен сайкатэ, куаразэ поттытэкгес, мыным вазе: «Гущин, султы, ойдо дӥсяськы, асьмеос городэ поталом», — шуэ. Йырме ӝутыса учки но, монэ Смолин сайкатэ вылэм. Мон, конечно, шумпотыса дӥсяськи, уго милемыз, рядовой солдатъёсыз, городэ потаны чик уг лэзё вал.

Городэ потыса, со монэ, одӥг урамысь мукет ураме поттаса, кыдёкегес ик нуиз но одӥг бадӟым юртлэн бадӟым капкаетӥз гидкуазе пыртӥз. Озьы ми вуим двухэтажной корка доры но солэн улӥ этажаз пырим. Ми пырыку, со коркан калык трос вал ини, ми бере но трос лыктӥз ай. Отын вал военнойёс но гражданской дӥськутэн адямиос, и нылкышноос но. Собере собраниез усьтэмен ялӥзы. Огез бӧрсьы мукетыз выступать каре: «Долой царя! Долой войну!» шуо. Кыӵе ке газет лыдӟо, страна дасяське революция ӝутыны, шуо. Мон пукисько, йырсие ик меӵ луэ кадь. Ваньмызлы отын пукисьёслы вазиськизы: каллен, пе, военнойёс пӧлы революцилэсь значенизэ валэктоно, собере валэктыны косӥзы, кин со буржуазия но кин со пролетариат. Война, пе, милемлы кулэ ӧвӧл, со, пе, кулэ буржуазиялы, эксэйлы.

Собраниез ворсам беразы милемыз помещениысь ӵош потыны ӧз лэзе. Кыкен-куинен потыса кошкизы. Ми но Смолинэн потӥм ини ураме. Смолин мынэсьтым юа: валад-а, пе, мар ке вераськемзэс? Ну, шуэ, только нокинлы ни гу-гу. Конечно, мон туннэ ке но уг тодӥськы, кыӵе партилэн собраниез вал со. Сое мыным Смолин ӧз валэкты, ачим но ӧй юа. Мон уго соку чик уг тодӥськы вал али, олокыӵе пумо партиос вань шуыса.

Февраль толэзьлэн пумаз, числоен вераны  уг ни тодӥськы, одӥг нуналэ ӵукна султӥм, сиським, табере занятие потоно вал ини (каждой ӵукна 7 часын потӥськом вал занятие). Нош туннэ косӥсь и номыр верась ӧвӧл. Номыр ум тодӥське, куспамы казармаын вераськыса пукиськом, мар та таӵе шуыса. Ведь туннэ арнянунал ӧвӧл. Арнянуналэ но маза уг сёто вал, черке вӧсяськыны строен нулло вал.

Нуназе бере 1 часын милемыз дӥсяськыны косӥзы но винтовкаостэк гинэ строе султытӥзы. Люказы ваньзэ запасной батальонэз. Собере буш вал вылын лыктӥз полковник но, азьло сямен ик, «Здорово, товарищи!» шуыса, вазиз. Собере вераз, толон Россиын, пе, туж бадӟым событие, кема возьмам революция, луиз. Эксэез престолысь уллязы, и со отречение гожтӥз аслыз но, Алексей пиезлы но. Власть сётэмын рабочийёслы но крестьянъёслы, шуиз. Уно вераськем бераз милемыз поттӥзы городэ демонстрацие. Балконъёсысь ми вылэ сяськаос куяло. Вань главной урамъёс калыкен тырмемын. Киязы «Мир», «Долой войну!» плакатъёс нуо.

Соку туж шулдыр вал, лымы Ростовын быремын вал ини. Собере милемыз занятие ӧз ни потталэ, городэз патрулировать карыны кутӥзы. Котькытын «Долой войну!» ке но шуо вал,  войнаез ӧз дугдытэ, милемыз нош ик фронтэ келязы — Румыние, Карпат гурезе. Отын опасной бойёс ӧй вал ке но, милемыз возизы окопын. Октябрь революция сярысь ми номыр ӧм тодэ. Доре гожтэт гожъяськом вал, нош дорысь гожтэт ум басьтӥське. Берло гинэ тодӥм, Россиен связез ворсаллям шуыса. 1918-тӥ арын январь толэзьлэн пумаз гинэ Россие потыны лэзизы, нош пыӵал тӥрлыкмес ваньзэ кельтытӥзы. Тужгес кӧт ӝож вал, куке талазы обозъёсын валъёсмес, вань продовольствимес.

Октябрь революция сярысь тодӥмы Россие вуэммы бере гинэ. Румыниысен лэзем гожтэтъёсмы доре чик вуиллямтэ. Дорамы милемыз быремын шуыса уло вылэм ини…

* * *

Нырысетӥ дунневыл ож дыръя. Пётр Гущин шоретӥез.

Дорын пиналъёс кылдытӥллям культурно-просветительской кружок, мон бертэм берам ик отчы пыри. Со кружокен кивалтӥзы кык визьмо, дышетскем алнаш воргоронъёс: М. А. Абрамов (Казаньысь учительской семинариез быдтэм) но Н. М. Рябов (ожысь бертэм офицер). Селоын Молчанов урядниклэн коркаез сылэ вал. Ачиз со кемалась олокытын ини. Со коркаез синъязы 2 бертэм солдатъёс. Кытӥзэ но отӥзэ тупатъязы, борддоре газетъёс лякизы. Кытысь ке но семилинейной лампа вайизы. Шулдыр луиз. Ӝытъёсы татчы уногес калык ветлыны кутскиз. Мӧйыос сое «шайтан корка» нимазы, нылпиоссэс отчы ветлэмысь алӥзы, нош пайдаез ӧйлась ни.

Абрамов одӥг ӝытэ шуэ, асьмелы, пе, дыр вуиз спектакль борды кутскыны. Нош мар со сыӵе спектакль? — юало адямиос. Дышетӥсь лад-лад валэктӥз. Спектакльёс пуктылоно, нош удмурт кылын пьесаос ӧвӧл, соку грамотной калык туж ӧжыт вал. Мон ик кутски пьесаосыз ӟуч кылысь удмурт кылэ берыктон борды. Тӥни озьы куським удмурт кылын спектакль пуктыны, виль гурен удмурт кырӟанъёс дышетъяны.

Огпол Абрамов мыным шуэ: «Кылзы ай, Петыр, мынам тыныд бадӟым дэмланэ вань. Тодӥськод, луоз, Елабуга городын «Гудыри» газет потэ. Отын ужасьёс уг тырмо. Мын отчы. Рекомендация гожто». Озьы мон Елабугае вуи. Алнаш пи

А. С. Байков редакциын ужа вал ини. Сое адӟыса, мон воксё лӧптӥ. Солы бумагаме мычи. «Ой, самой дыраз вуид, — шуэ Байков. — Ойдо али ик редактор доры пыром». Борисов доры пыреме бере сюлмы нёрк тэтча. Рекомендациез лыдӟыса ортчемез бере Трофим Кузьмич мон шоры шунытак учкиз но шуиз: «Милемлы таӵе мурт туж кулэ, ӵуказе ик ужаны пот. Переводчик луод». Кемалась тодмо адямиос сямен вераським. Кыӵе капчи мылкыдо вылэм со Трофим Кузьмич. Ужын жадёнэз валасьтэм. Со вӧзын мукет ужасьёсмылы озьы ик секытэз но капчиен сётӥськиз кадь. Аналъяськонэз, ӝожтӥськонэз валась ӧй вал. Озьы монэ зачислить каризы «Гудыри» газетэ переводчике.

Ответственной секретарьмы М. Н. Шахмаев, муш кадь тыршись адями, удмуртъёсыз мушъёсын ӵошатыса, кылбур но гожтӥз. Весь валэктылӥз мыным, тупатъяз янгышъёсме. Собере дыши. Трос вуылӥзы телеграммаос, соосыз тассовой материал шуо вал. Газет бамъёсы но трос сётъямы соосыз.

Милемлы удмурт калыкез  тодматоно вал дуннеын но егит странаямы луись югдурен, фронтысь иворъёсын. Пӧсь йӧтылӥз. Ваньзэ дыраз берыктыса вуыны кулэ. Ӵем дыръя сиськылӥм но кӧламы редакциын ик. Секыт сярысь ӧм ӟуре. Нош шуг-секытъёс туж уно вал. Бумага туж шакырес. Шрифт уг тырмы. Наборщикъёсмылэн дышетскемзы одӥг-кык ар сяна ӧвӧл. Бичам текстэз лыдӟыны кутскиськод но — янгыш вылын янгыш. Огпол тупатъяськом, кык пол… Уйёсы пукылӥськиз. Ӵем дыръя ӟардон вуэмез но ӧм шӧдылэ.

Газет ичиен потылӥз: гожъясьёс ӧжыт. Асьмеос утчаськом ваньзэ: информациос, заметкаос. Но пумен калыкен кусыпмы юнман кутскиз. Газет сюрес шедьтӥз кыдёкысь гуртъёсы, калыкез тодматылӥз выль властьмылэн ужъёсыныз, партимылэн политикаеныз.

Тодӥсько на, Выль Алнаш гуртын газет басьтэ вал Кузьма Васильевич Посадов. Газет вуэ ке, сое воргоронъёс пӧлын лыдӟе, соку пӧртэм вераськонъёс потто. Кенеш ортче, кожалод. Даллашон но ӝутскылэ. Со дыре угось олокызьы но малпасьёс, улонэз валасьтэмъёс вал на. Сыӵеослы ик юрттылӥз «Гудыри» синзэс усьтыны.

Газет бамъёсын вис карытэк печатламы советской власть сярысь материалъёс. Удмурт калыклы валэктылӥм, мар со сыӵе власть, мар со сётоз ужаса улӥсьёслы. Гуртын выль улонэз мыдланьтыны турттӥсьёс но вал. Заводын ужасьёслы, фронтын ожмаськисьёслы нянь кулэ. Нош бай выжыос крестьянъёсты узато: «Ватэ няньдэс, эн сётэ». «Гудыри» жалятэк шараялляз сыӵе муртъёсыз. Лэчытэсь заметкаосын нимын-тулын поттылӥм соосыз, калыклы валэктылӥм: эн кылзэ узыръёслэсь, тӥляд кужыменыды поттэм ваньбурдэс соос ватыны туртто. Соос уго шӧдо пум вуонзэс, адӟо: уз луы ни начаръёсыз курадӟытыса воземзы, асьсэ вылэ ужатэмзы. Музъемлы табере кузё луоз ачиз крестьян калык. Юн утёме  егит странамес, революцилэсь вормонъёссэ!

Ӟырдыт чуръёсыныз «Гудыри» калыкез ӝутылӥз бадӟым ужъёсы. Ми уго гожъямы гуртын культураез ӝутон ужпумъёсъя. Мон гожъяй Алнашысь культурно-просветительской кружоклэн, народной домлэн ужамзы сярысь. Со выллем кружокъёс кылдӥзы мукет интыосын но. Гожтэтлы дышетскон понна нюръяськон вӧлмиз. Озьы поттылӥм газет.

Соку Колчак наступать каре вал. Со Мензелинскез басьтэм, шуизы но, ми эвакуироваться кариськоно луим. Редакцилэсь документъёссэ ящике запаковать кариськом, подвод хлопотать карыса, бызьылӥськом. Кӧт урод, нош вылаз ик телефон-телеграф езъёс жингырто, кион вузэм кадь каро. Милям сюлэм уката позыра. Елабуга сьӧры потэм бере бермес учкиськом. Ваньмы ӝожомемын, гуньдэмын…

Вятской Поляна дорысен вань эшъёсмес мобилизовать каризы фронтэ. Монэ комиссия кызьы ке но браковать кариз, собере мон бертӥ. Бертэм берам 2-тӥ нуналаз Алнаше тӧдьыос пыризы но первой монэ талазы. Асме вал кыткыны косӥзы но подводэ нуизы. Колчакъёс кема ик наступать карыса ӧз вуэ, кутскизы отступать карыны. Соку, монэ но подводэ басьтыса, Сарапул доры нуизы. Сарапулэ вуэм берам мон, валме кельтыса, ачим пегӟыса бертӥ.

Бертэм берам мон тифен висьыны кутски, 4 толэзь кылли. Со дыре кышкыт висён тиф вӧлмемын вал. Висьыса дорам кылльыкум, ми доры тӧдьыос пыразы, пӧлазы офицер но вал. Соос бугыръясько, утчасько, ӟеч тӥрлыкмес поттало. Но тӧдьыос ӧз тодэ, мон «Гудыри» газетын ужась шуыса. Кин ке пал кыл поттась луысал ке та пумысен, мон соку ик ыбемын луысал.

Йӧнам берам мон нош мынӥ Елабугае. «Гудыри» газетлэн редакциез соку кошкемын вал Сарапулэ. Елабугае кылем Вотской подотдел монэ командировать кариз Сарапулэ. Отысен Борисов Трофим Кузьмич косӥз партшколае дышетскыны мыныны. Сарапулын партшколалэн соку первой сборез вал. Куинь толэзь дышетскыса, куинь толэзь практикаын ужано вал. 1920-тӥ арын партшколаез быдтэм берам милемыз куиньнамес лэзизы Башкириысь Бирск городэ. Со город тӧдьы Кам дурын. Со толэз ми Бирск городын ортчытӥм. Соку Сарапулысь Вотской Центральной Комиссариатысь  косӥзы милемыз Уфа городэ удмурт издательство кылдытыны. Тулыс первой пароходэн монэ лэзизы доре, Алнаш районысь ужасьёс утчано шуыса. Соку ваньмыз воргоронъёс Граждан ожын, нылъёс гожтэт уг тодо вал, тӥни озьы мон ужась ӧй шедьты.

Собере монэ нош ик Елабугае лэзё. Мыным шуо: Елабугаын «Сюрло» газет потыны кутскиз. «Сюрло»-ын  арлэсь кема ужай корректор луыса. 1921-тӥ арын монэ басьтӥзы Горд Армие но келязы Вяткае. Доре бертӥ 1923-тӥ арын.

 

Орфографиез туала каремын.

Удмурт Дунне
By Удмурт Дунне Июль 26, 2017 15:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<