Александр Бречалов: Сьӧлта ёросын пуктоно школа, азинтоно ужбергатонэз

Удмурт Дунне
By Удмурт Дунне Июль 27, 2017 11:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Сьӧлта ёросэ вуылэмез бере Удмуртилэн Тӧроезлэсь ужзэ быдэсъясь А. Бречалов шуиз: татын гурт удысэз, туризмез, бизнесэз азинтон понна луонлыкъёс трос, вань йӧн-йӧн ужбергатӥсьёс. Бадӟым сюлмаськонъёссы — покчиослы школа пуктон но пудо шайвылэз чылкытатон.

Парсьгуртысь Л. Столбовлэн бугро ӵупонъя предприятияз 15 адями ужа.

 

Нюлэс вань, кораны уг луы

А. Бречалов тодматскиз Парсьгуртысь Леонид Столбовлэн предприятиеныз. Воргорон нюлэс поттонэн выре, мунчо, корка бугроос ӵупе. Вузъёсыз быдэс Россие вӧлмо, ялан басья Венгрия но. А. Бречаловен пумиськон азьын Калининградысь жингыртӥзы, бугро ӵупыны курыса. Леонид Алексеевич шуэ, нимысьтыз реклама асьмелы ум лэсьтӥське, ми сярысь бугроосмес басьясьёс, огзылы огзы вераса, тодо-кыло.

Предприятие 2000-тӥ арын кылдытэмын, али пыд йылаз йыг-йыг сылэ ни. Туэ ужбергатӥсьлэн луонлыкез кылдӥз гостиница усьтыны. Умой  соиз: предприятиез федерал сюрес дурын интыяськемын. Л. Столбов дорын Парсьгуртысь но Сьӧлталась 15 мурт тырше. Ужбергатӥсьлэн вань мылкыдыз производствозэ эшшо но паськытатыны, ужан интыос тросгес кылдытыны. Но та вакытэ тэлен шугъяськонъёс кылдэмын. Ёросын тэльёс трос ке но, Л. Столбовлы пу ворттоно луэ бускель Эгра ёросысь. Сьӧлталась нюлэсъёс мукет ёросысь ужбергатӥсьёслы арендае сётэмын. Палэнысь пу ворттон понна сюрес вылэ трос дыр но коньдон быре, со бугроослэсь асдунзэс будэтэ. Удмуртиын та нуналлы умой-умой радъямын ӧвӧл нюлэсэз коран, поттон, мерттон, шуиз Л. Столбов. Тэльёсын кылдэм югдурез тупатон понна ужъёс мытэмын луозы, вераз А. Бречалов.

Со сяна, Леонид Алексеевич гуртысь депутат луэ, сюлмаське гуртэ чагыр эстӥськон пыртон понна. Та нуналлы гуртоослэсь коньдон люкамын ни, документъёс экспертиза ортчо. Л. Столбов юаз, гуртэ газ пыртыны ӧй луысал-а софинансирование чотын. Озьы ик Л. Столбов кичӧлтонэн потӥз, пуктысалмы, пе, ужасьёслы коркаос. Адями коркалэсь ӝыны дунзэ суменак тырысал, нош мукет ӝыныез уждунысьтыз пичиен-пичиен кошкысал. Но пуктӥськон понна музъемез одӥг категориысь мукетаз выжтоно, укыр трос дыр быре, ӧй луысал-а, пе, со ужез ӝоггес радъяны.

А. Бречалов  Л. Столбовез сак кылзӥз но юрттэт сётыны оскытӥз.

Сьӧлталась покчиослы туж кулэ школа.

Школа, пудо шай, спорт

Озьы ик Тӧролэсь ужзэ быдэсъясь Сьӧлта черкогуртысь покчи нылпиослы школаен тодматскиз. Солэн директорез Галина Морозова вераз: та юрт кидыс эскеронъя инспекцилэсь школалы выжиз 1992-тӥ арын. Соин татын столовоез но, спортзалэз но ӧвӧл. Пиналъёс сиськыны 800 метр кеме, Сьӧлта шор ёзо школае, ветло. Физкультурая урокъёссэс ортчытъяло ёросысь спортъя школалэн спортзалаз. Со сяна, школа пиналъёслы ӟоскыт луиз ини.

— Классъёсмы пичиесь, 12 пинал интые отын 20-лэсь тросгес нылпиос дышетско, — сюлмаськонзэ вера Г. Морозова. — Туэ тани 1-тӥ классэ 117 пинал лыктоз, кылем арын сярысь, быдэс класслы тросгес, соин валче 2 сменаен дышетскыны кутскомы.

Дышетонъя но наукая министрлэн воштӥсез Зоя Суворова шуиз: выль школалэн проектэз дась, со эскеронъёс пыр ортчемын ни, сюриз ке пуктоно школаослэн реестразы, черкогуртысь нылпиослы выль школа вуоно арын ӝутӥськыны кутскоз ни.

Ёросын эшшо одӥгез сюлмаськон — черкогурт шорын ик пудо шай интыяськемын. Татчы 1940-тӥ аръёсы сибирской язваен висись пудоез ватылӥллям. Котыраз 1 иськемын нокыӵе лэсьтӥськон ужъёс ортчытъяны уг яра. Нош ӵапак ёрос центр ик тужгес кулэяське выль объектъёслы. Администрацие трос вазиськонъёс вуо выль коркаос лэсьтон, газ, ву пыртон сярысь. Мар лэсьтӥськоз та югдурез тупатон понна, вераз инкуазез утёнъя но инкуазь узырлыкъёсъя министрлэсь ужзэ быдэсъясь Александр Нестеров:

— Кенешемын пудо шаез чылкытатыны но сюбегатыны. Талы ог 2 миллион манет кулэ луоз.

Ужбергатӥсьёсын, колхозъёслэн, огазеяськонъёслэн кивалтӥсьёсынызы пумиськон дыръя трос юанъёс чузъяськизы ужбергатӥсьёслы юрттэт сётон пумысен. Орловскойысь мушкась Сергей Эшмаков вераз, муш вордонъя закон кутыны кулэ шуыса. Али чечы гурт удысысь вузэн уг лыдъяськы, соин валче чечы вузасьёс ваньмыз сямен поттэм табышысьтызы выт 20 процент тыроно луо, нош гурт удысын ужасьёс 2 поллы ӧжытгес — 10 процент тыро.

С. Эшмаков чечылэсь выль вуз поттыны кутскиз — крем. Со понна нимысьтыз оборудование басьтӥз. Мушкась шуэ: кыскем чечы, кӧня ке толэзь ортчыса, кынме, нош крем быдэс ар возиське.

Аслэсьтыз сюлмаськонзэ вераз Узиысь «Звезда»  колхозлэн кивалтӥсез Владимир Блинов но. Гурт удысын уг тырмо ужасьёс. Егитъёс уг мыно механизаторе но скал кыскисе. Оло, гурт удысын ужасьёслы кыӵе ке льготаос луысалзы ке, югдур воштӥськысал. Но А. Бречалов шуиз: матысь дыре сыӵе воштӥськонъёсты витёно ӧвӧл, но гурт удыслэсь сюлмаськонъёссэ одно ик син азьын возёзы, юрттыны тыршозы, пе.

Сьӧлталась спортъя нылпи школалэн директорез Олег Русских ёросын спортэз азинтон сярысь сюлмаське. Нылпиос спортэ кыстӥсько, но тросэз начар улӥсь семьяосысь, кылсярысь, хоккейной форма басьтыны уг быгато. Та пумысен Александр Владимирович оскытӥз: август толэзе «Ижсталь» командаен огкыл гожтэмын луоз, программа кутӥськоз, со луонлык сётоз ёросъёсын но хоккеез азинтыны. Со улсын ик котькуд ёросын хоккеен шудыны липет улын площадкаос ӝутӥськозы.

Сюрес

Кӧпка черкогуртысь калык сюлмаськонзэ вераз сюрессы пумысен. 30 иськем сюрессы ӝыныез асфальт, ӝыныез горд сюй — зор-кот дыръя напралы пӧрме, соин гуртоос ёрос центре потыны курадӟо. Но А. Бречалов шуиз: Удмуртиын али эшшо но секытгес югдуре шедем гуртъёс вань. Шаерамы 87 сюрес ӝегатскытэк тупатонэз возьма. Нырысь ик отын ужъёс мытэмын луозы.

А. Бречалов тодматскиз Кӧпкалась западно-сибирской лайкаосты будэтонъя предприятиен но. Таӵе питомник Россиын одӥг гинэ. Али татын 50 пала лайкаос будо, кучапиоссэс быдэс Россиысь пӧйшурасьёс басьто.

Предприятиен кивалтӥсь Владимир Рябов шуиз: Кӧпкала пӧйшураны вуыло, Россиысь сяна, кунгож сьӧрысь но адямиос. Пуныослэн улэм-вылэменызы тодматскыны ярато нылпиос, но сюрес уродэн татчы сюрыны шуг. Гуртын туризмез азинтыны луысал, со понна сюресъёс лэсьтоно.

Ангелина Снигирёва

Туспуктэм: udmurt.ru

 

Удмурт Дунне
By Удмурт Дунне Июль 27, 2017 11:52 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<