Зинаида Рябинина: Путин ваньмызлы уз тырмы…

Удмурт Дунне
By Удмурт Дунне Июнь 29, 2017 10:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Зинаида Рябинина, валтӥсь редактор

Мон нош ик Настя сярысь. Куке малпалляз шат со, одӥг гинэ юан сётоз но — сое ачиз Президент ӟыгыртоз,  сяська, зарезь, квартира кузьмалоз?

Туннэ солы туж тросэз вожъясько. Удалтӥз нылмуртлы — 2 миллион юанъёс пӧлысь ӵапак солэсь юанзэ кельшытӥзы. Конечно, та учыр бере шаерысьтымы кивалтӥсьёслы пӧсь йӧтоз — угось али тросэз бугырскемын: малы одӥгезлы вань, мукетызлы ӧвӧл? Юрттоно ке — висъятэк. Ми но озьы лыдъяськом.

Но мукет ласянь, Настяез вань ма понна ушъяны — малы ке мукетъёс ӟургето, но юан сётыны уг дӥсьто, нош со видеовазиськон ыстэм. Озьы-а, тазьы-а, но солы луыса табере трос мукет адямиослэн но осконзы кылдӥз.

Юа, ымад уз чабке, шуо вал милемлы пичи дыръямы мӧйыос, мултэс дӥсьтӥсьтэм сяммес валаса, вылды. Шонер верало вылэм — шара юанлэн кужымез бадӟым. Кремльлэн сайтысьтыз шумпотыса лыдӟи Владимир Путинлэн Александр Бречаловен пумиськонысьтызы Удмурт культурая центр сярысь иворез но. Удмуртилэн Тӧроезлэсь ужзэ быдэсъясь Президентлы вера, «Удмурт Кенеш» огазеяськонлэн вазиськемезъя Ижкарын сыӵе юрт усьтыны малпаськом шуыса.

— Этногурт? — выжыятэ Президент.

— Ӧвӧл, удмурт лулчеберетъя нимысьтыз юрт! Удмуртиын уло туж ӟеч калыкъёс, удмуртъёслэн туж узыр культуразы…

Ку, кудӥз асьме кивалтӥсь удмуртъёсты данъяса Россилэн Президентэзлы вералляз? Нош «Удмурт Кенеш» ӧй юасал ке?

Зэм, юанэз кылӥсь луыны кулэ на. Ӵапак солы оскиськом ми ваньмы. Но Путин нуналлы быдэ телефонын уг пукы, ваньмес соин уз но герӟалэ (солы но шуд луыны кулэ, верам ни). Но асьмелэн вань матысьгес кивалтӥсьёсмы. Вань нуналмысь шугъяськытӥсь бадӟым яке пичи сюлмаськонъёсмы. Соин ик ми ӵектӥськом лыд-ӟисьёсмылы асьсэлэн юанъёсынызы вазиськыны Удмуртилэн Тӧроезлэсь ужзэ быдэсъясьлы Александр Владимирович Бречаловлы. Оло нош, пыр-почгес тодэмды потэ ачиз сярысь? Ойдолэ валче лэсьтом «Калык интервью»! Юанъёстэс ыстэ редакцие (огшоры гожтэтэн яке электрон адресамы), смс-эн яке телефон пыр, одно пусъёно нимтулдэс но телефондэс. Ваньзэ соосты ми кивалтӥсьлы сётом. Кутским!

Удмурт Дунне
By Удмурт Дунне Июнь 29, 2017 10:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<