«Выль даурлэн эскерисьёсыз» конференция люка пинал тодосчиосты

Кылем толэзе Ижкарысь Тодосчиослэн юртазы пинал визь погъёс люкаськылӥзы. Соос эскерон ужъёссылы йылпумъянъёс лэсьтӥзы.

«Выль даурлэн эскерисьёсыз» конференция — пиналъёслэн берпуметӥ тубат лёгетсы.

Пиналъёс озьы арлы одӥг пол тулыс люкаськыло. Нош ваньмыз кутске «Лето наших открытий» гужем лагерь бордысен.

Арысь аре лагерез Удмуртиысь пӧртэм ёросъёсын радъялляло. Валля арын, пӧсьтолэзе, со Кияса ёросысь Уддяди гуртын вал, миым — Можга ёросысь Горняк гуртын. Гужем лагерь 8-9 нунал кыстӥське. Со дыр ӵоже нылпиос  инкуазез эскеро (будосъёсты, нымы-кибыосты, куазез но мукет), шаертодонъя материалъёс люкало, матысь гуртъёсы экскурсиосы потало. Лагере лыкто егитъёс но, тэшкылиос но, арлыдо адямиос но. Берпуметӥосыз пӧлын пӧртэм школаосысь дышетӥсьёс, УдГУ-ысь тодосчиос луо.

Лагерьлэн берпуметӥ нуналъёсаз пинал тодосчиос лэсьтэм ужъёссы сярысь  конференциын верало. Уж азьланьтӥське сӥзьыл но толалтэ: пиналъёс проектъёс лэсьтыны, докладъёс гожъяны но калык азьын вераськыны дышетско. «Выль даурлэн эскерисьёсыз» конференция — пиналъёслэн берпуметӥ тубат лёгетсы. Тодосчиослэн юртазы соос ортчем арлы йылпумъянъёс лэсьто.

Вань та ужрадъёсты радъя Ижкарысь Устинов ёросысь нылпи творчествоя центр. Лагере пыриськемды потэ ке, юалляськоно таӵе электрон адресъя: is-ttm@mail.ru.

Роман Соловьёв

Туспуктэм: snioo.ru