Кукмор ёросысь Нырья черк сӥземын Василий Пуцек-Григоровичлы

Удмурт Дунне
By Удмурт Дунне Июнь 9, 2017 12:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Василий Пуцек-Григорович поръёслы но, чувашъёслы но нырысетӥ грамматика кылдытӥз.

1775-тӥ арын  печатламын нырысетӥез удмурт грамматика, авторез — Василий Пуцек-Григорович. Татарстанысь Кукмор ёросысь Нырья удмурт гуртын алигес радъязы солы сӥзем конференция.

Василий Пуцек-Григорович поръёслы но, чувашъёслы но нырысетӥ грамматика кылдытӥз на. Пуцек-Григорович Казанской но Свияжской митрополит вал, тодмо луэ Вениамин нимын. Медаз вуны шуыса, Кукмор ёросысь Нырья черкысь Леонид Прокопьев батюшка Василий Григорьевич сярысь книга гожтӥз. Со ачиз но молитваосты удмурт кылэ берыкъянэн выре, службаосты удмурт кылын нуэ бере, туж сюлмаське, югдытӥсьмы сярысь уногес калык мед тодоз шуыса. Леонид Прокопьевлы луыса но ёросазы но солэн палэназ Пуцек-Григоровичез тодӥсь йылэ но йылэ. Батюшкалэн бадӟым малпанэз — Пуцек-Григоровичез святойёс пӧлы пыртоно. Та ужпумен валче но конференция люкамын вал.

Отец Леонид верамъя, Вениамин митрополит ватэмын вал Казаньысь Седмиезерной Вознесенской пустыньысь храмлэн борддораз. Храмез тупатыкузы, сое шедьтӥзы, мугорыз воксё сӧриськымтэ. Сое утялтыкузы, висись адямиос бурмизы шуыса, кылӥськыны кутскиз. Калык со доры кыстӥськыны кутскиз. Но 1929-тӥ арын черк пуштытэмын вал.

Кык ар талэсь азьло Пуцек-Григоровичлы сӥзем конференция дыръя Леонид батюшка черк бервылэ кирос пуктӥз, служба ортчытӥз. Леонид батюшка верамъя, митрополитэз святойёс пӧлы пыртон понна вань документъёс бичамын ни.

—  Гуртамы вӧсяськон корка вань ке но, выль черк ӝутӥмы, со Пуцек-Григоровичлы сӥземын, — шуэ Леонид Прокопьев. — Соин но митрополитэз святойёс радэ пыртон ужен вырисько. Со ас вакытаз калык понна туж трос лэсьтэм, олокӧня черк усьтэм. Сое малпаса но, удмурт службаос нуэм потэ. Гуртмы берло дыре будэ. 1 нылпи садмы вань ни, эшшо 1-зэ казыр (али) ӝуто, 1-тӥ сентябрьлы усьтыны малпаськомы, чакламын 50 пиналлы. Колхозмы но республикаын огез кужмоез.

«Удмурт Кенеш» огазеяськонлэн Кукмор ёросысь ёзэныз кивалтӥсь, Ошторма-Юмья шор ёзо школалэн директорез Виталий Семёнов верамъя, Татарстанысь котькуд адями, бигер кылэз сяна, аслэсьтыз анай кылзэ но тодыны кулэ. Соин но удмурт кылэз  предмет чотын дышетон вань удмурт гуртъёсын рос-прос радъямын.

— Зэм, куд-ог ёросъёсысь нылпиос ӟучомогес ни, — шуэ Виталий Геннадьевич. — Анай-атайёс пӧлын уго сюро малы кулэ удмурт кыл шуисьёс. Соослэн мылкыдзыя кариськид ке, удмурт кылэз воксё но вунэтыны луэ. Но ужпум пуктэмын: воспитательёс вань нылпиосын удмурт кылын вераськыны кулэ, уг верасько ке, куриськон гожтыса, мукет уже мед кошкозы. Кызьы бигерзэ дышетом, нош удмуртсэ — ум? Казыр 9-тӥ классын бигер кылын экзамен сётыто. 2-3 ар талэсь азьло удмурт кылъя но нимысьтыз контрольной гожъятӥзы — со ЕГЭ сётонлы аспӧртэм допуск вал. Зэм, азьвыл аръёсы удмурт кылэз, кылсярысь, 7-тӥ классын 4 час арняяз нуиськомы вал ке, бератаз программае солы 2 час висъяны кутскизы. Но татысь но потон амал шедьтӥмы: урокъёс борды национальной компонентъя ватсаса эшшо 2 час сётӥмы. Озьы выльысь люкаськыны кутскиз 4 час. Тазьы ӧм ужалэ ке, нырысетӥ удмурт грамматикаез кылдытӥсь сярысь но, асьме культурамы сярысь но нылпиосмы уз тодэ ни.

Елена Сараматова

Удмурт Дунне
By Удмурт Дунне Июнь 9, 2017 12:03 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<