Валтӥсь эмчи, депутат Надежда Михайлова вормыны дышемын

Удмурт Дунне
By Удмурт Дунне 14 июня, 2017 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Нырысетӥ элькун больницаен 2006-тӥ арысен кивалтэ Надежда Михайлова.

Нырысетӥ элькун больницаен 2006-тӥ арысен кивалтэ Надежда Михайлова. Со эмъяськон юртлы выль шокчон сётӥз. Больницаез, выль тӥрлыкен сяна, кадръёсын но юнматӥз. Надежда Александровна валтӥсь врач гинэ ӧвӧл — со Кун Кенешысь депутат но. Тазалыкез утён удысын уноез воштӥськонъёс, выль проектъёс со сюлмаськемен но кылдэмын.

— Надежда Александровна, пичи дыръяды филолог луэмды потэ вал, шуо.

— Анае бухгалтер, атае леспромхозын огшоры ужась гинэ вал ке но, совето вакытысь вань газет-журналъёслы гожтӥськылӥзы. Вордӥськем нуналлы но бадӟымез кузьым книга вал. Со бордысен ик кенжиз литератураез яратон мылкыды. Со сяна, синмаськемын вал Вавож школаысь литератураен дышетӥселы Валентина Бакеевалы. Котькуд материалзэ со туж тунсыко сётэ вал нылпиослы. Программаез быдэстэм сяна, мукет произведениосты но валэктылӥз, соосты лыдӟыны но класс азьын вераны курылӥз вал. Огпол Иван Тургеневлэсь «Накануне» произведенизэ эскерон вылам усиз. Класс азьын верай, мар сярысь со, кыӵе мынам учконэ со шоры. Урок бере дышетӥсе шуэ: Надя, тон кадь умой верасез мон ӧй кылылы на. Мынам филолог луэме потэ, шуи пумитаз. Со вазиз: эн но малпа, семьяед уз луы — быдэс нуналъёсын школаын, эшшо ке дорысь ужъёсты эскероно. Но мылкыдме воштӥз воксё мукетыз учыр.

Огпол, зол черласа, больницаын кылли. Соку нырысьсэ адӟи, макем врачъёс сюлмасько висисьёссы понна, макем чылкытэсь соос. Мынам но вылам тӧдьы халат дӥсяме потыны кутскиз. Ӵужапае Фаина Кузьмина но быдэс даурзэ Нырысетӥ элькун больницаын акушер-гинеколог луыса ужамын. Со котьку шуэ вал: асьмеос врачъёс луыны кулэ.

— Ижысь мединститутэ пырыны уд быгатэ шуыса кышканды вал-а?

— Туж курдай. Анай-атае шуизы: ми огшоры ужасьёс бере, тон кулэ вылӥ образование басьтыны. Соин но пушкам кыӵе ке комплекс кылдӥз: пырыны ӧй быгаты ке, мон понна дунне быроз кадь. Зэм, котьку отличница вал. Озьы ке но вузэ пыронлы азьвыл ик рос-прос дасяськыны кутски. Вавож шор ёзо школаын дышетскыкум ик, йылпумъяй Москваысь физико-технической институт бордысь заочной амалэн школаез. Со вакытэ уго мединститутэ пырон понна физикаен экзамен сётоно вал. Ботаникаез университетысь учебникъёсъя дышетылӥ. Соин ик экзаменъёс мон понна туж капчиесь вал. Мединститутысь физикая кафедраен кивалтӥсь соку туж паймиз тодон-валанэлы. Соку ик «вить» пуктӥз.

— Дышетскытозяды одӥг ке но «куинь» басьтэмды вань-а?

— Мон «ньыль» понна но бќрдӥсько вал. Но книгаос вылын пукемме уг жаляськы. Собере, мон котькытчы вутскылӥ, урамлы но дыр шедьтылӥ. Ӟырт кезьыт куазен школаын урокъёсты дугдытыкузы но, коркан пукемме уг тодӥськы — ялан эшъёсын урамын я куас вылын.

Возьдаськись мон ноку ӧй вал. Пичи дырысеным кельшылӥз асме возьматыны, кытын ке кырӟаны-вераны, кылбур лыдӟыны. Мон котьку вал огыр-бугыр улонлэн шораз. 9-тӥ Май, пионеръёслэн ужрадъёссы — котьку азьпалан. Соин но, лэся, монэ ялан бырйылӥзы класслы комсорге. Жаг люкан, корт бичан — кытчы но эшъёсме ӧй пыриськыты! Огпол кыӵе ке ужрадлы  бадӟым плакат вылэ лозунг гожтыны кулэ вал: «Даёшь Усть-Илим!» Соку уго Иркутскын гидроэлектростанция ӝуто вал. Чебер суредаськыны уг пӧрмытӥськы. Со понна рисованиея урокъёсты но ӧй яратылы. Чебер гожъяськыны но ӧй дышылы. Ӵапак со вакытэ дорамы ӵыжы-выжымы вуиз. Со туж чебер суредаське. Ӝыт сое ёртӥ лозунг гожтыны. Жадем адямилэсь кызьы гожтэмзэ ӧй чакла — выдӥ. Ӵукна классэ шумпотыса ик вамыштӥ, плакатэз сэрттӥ но — отын Усть-Илим ӵош гожтэмын. Коть му пыр вия!

— Собере асьтэлы гинэ на оскыны кутскиды?

— Озьы. Со мон понна весяклы визь-кенеш луиз. Кыӵе ке документ вылэ кинюртэмме пуктэмелэсь азьвыл ваньзэ лыдӟисько.

Зэм, мукет но ваменэс сямы вань: вормонтэмзэ вормеме потэ. Та мылкыд ик монэ акушер-гинекологе валтӥз. Нырысь-валысь хирурге мыныны малпасько вал. Учкисько но — акушер-гинекологе маке быдӟа конкурс. Отчы сюрон понна, ӟеч дышетскем сяна, наукаен но вырыны кулэ вал. Неужто мон конкурсэз уг ортчы? Ортчо, шуи. Вормись луыны дышемын.

Коллективын 1 сюрс 500 мурт ужа.

— Сыӵе мылкыдын ик Сарапулысь нылпи ваён юртэ но ужаны лыктӥды-а?

— Отчыозь Сарапулэ огпол но вуылэме ӧй вал. Но кытчы пырод? Со вакытэ куронъёс чурытэсь вал: косо — мынӥськод, ужаськод 3 ар, собере котьмар кар. Но ми картэным Сарапулын 17 ар ужамы. Виктор Николаевиче но врач, ми соин одӥг курсын дышетским.

Ноку уг вунэтӥськы ни ужаны кутскон вакытме. 1980-тӥ аръёсы ужан амалъёс воксё мукетэсь вал. Анестезиолог, неонатолог уйлы ӧз кыльылэ — ужан графиксы сыӵе. Ваньмыз понна кыл кутылӥз уйлы дежурствое кылем акушер-гинеколог. Выль ар уй. Симониха каргуртысь кышномуртэ вайизы, берпуметӥ арняосаз гестоз кутскем. Россиын нылпи вайыны дасяськись кышномуртъёс пӧлын туннэ но, со висёнлэсь вир кошкыса, кышноос ӵемысь куло. Котькуд секунд дуно, операция лэсьтоно. Нош анестезиологез уг шедьтӥськы — телефонзэ ик уг куты. Жингыртӥ ёрос больницае — со милям ужмы ӧвӧл, шуо. Бӧрдыса ик кури специалистсэс ыстыны. Соку нылкышноез но, пиналзэ но утимы. Но валай: тазьы врачъёстэк ужаны уг яра, системаез воштоно. Азьло врач луон — со дан вал ке, туннэ егитъёсты тазалыкез утён удысэ кыскон понна условиос кылдытоно, ми кадь нокин уз ужа. Соин ик нылпи ваён юртэн кивалтыны оскемзы бере нырысь ик ужан амалъёсты воштон борды басьтӥськи. Ужан мылкыд но ӝутӥськиз. Татын уго выль роддом усьтӥськиз. Вить этажъем бадӟым чебер юрт. Но врачъёс уг тырмо. 1 эмъясь — быдэс этажлы. Но огпол но ӧй чигиськы. Ми сокем егитэсь, мылкыд уртче, ог-огенымы эшъяськиськом но юрттӥськиськом. Нылпи ваёно нылкышноослэсь но мылкыдзэс ялан ӝутыны тыршылӥмы. Кылсярысь, Выль арлы ваньзылэн бертэмзы потэ, доразы курисько. Серекъятон вылысь 6 часын ӝыт врачъёсын люкаськиськом, огзэ Тол бабай дӥсяськом, чиедзэгес — Лымы ныл. Нылкышноосты ӟечкыласьком, собере гинэ дорамы бертӥськом вал.

Толэзяз 14 пол но уй дежурствое кылёно луэ вал. Ачид интые кельтыны нокинэ, нош дорад пичи нылыд. Сюлэм кыклы вандӥськылӥз. Картэ врач ӧй луысал ке, монэ нокызьы но ӧй валасал, семьяысь кошкысал, дыр. Дежурствоосты валаны быгатоз врач гинэ. Зэм, котькыӵе семьяын пӧртэм вакытъёс вань. Но лыдъясько: вань керетонъёс герӟаськемын ог-огдэ вормыны турттонэн яке кыӵе ке янгышъёсын. Картэ нылмылы анай интыын но вал. Со ик лыдӟиськыны но дышетӥз, урокъёс но дэмен лэсьтылӥзы. Нылмылэн нырысетӥ кылъёсыз: «Надя мама дежурствоын». Дыдымы туннэ ке но ӝожомыса пичи дырзэ тодаз вайылэ, анай весь ужын вал шуыса. Но нылпиез будэтон — со кылъёс ӧвӧл. Со — анай-атайлэн улон манерез, пинал ӵапак выросъёсты адӟе но соосты ас вылаз мерта. Нылмы ми кадь ик кыл кутӥсь но оскымон будӥз: школаез зарни медален, вузэз горд дипломен йылпумъяз. Врач луон сярысь ӧз малпаськылы, ми но ӧм куре. Солэн уго сямыз эмчилы тупась ӧвӧл — юрдӥсь. Нош тазалыкез утёнын кырсез туж трос.

Депутат уж.

— Кырсез сяна, кышкытэз но. Котькуд врачлэн аслаз шайгуэз вань, шуо…

— Инмарлы тау, янгышатэк ужаны быгатӥ. Сарапулын оборудование вуж ке но вал, отын 10 ар ужатозям, одӥгез но нылпи вайись анай ӧз кулы. Зэм, кулыса вордӥськись нылпиос вал. Анайлы, шумпотон ивор интые, курытсэ вераны туж секыт. Эн оске, акушер-гинеколог сюлэмтэм шуизы ке. Со котькуд анаен ӵош куректэ но, шумпотэ но. Сое чидатэк, куд-огез ужысь но кошке.

Кык мурт понна кыл кутон — со капчи ӧвӧл. Отпускын но йӧнала уд шутэтскиськы, ялан сюлмаськиськод, телефонэд шоры учкылӥськод. Мон гороскопъёслы но, Инмарлы но уг оскиськы. Гомер шуиз: кизилиос кивалто дуннеен, нош визьмо адямиос — кизилиосын. Мон аслам киосылы но йырылы гинэ оскисько. Зэм, куддыр луэ: адями кулоз ни, вирзэ туж трос ыштӥз, нош со улӟе. Но со врачъёслэн юрттэменызы.

Огезлы тау карисько: абортъёс лэсьтонлэсь мон мозмытэмын вал. Тазэ мон ӧй вормысал. Нялтас вераса, вань акушеръёс абортлы пумит: лулэз быдтон со. Но нылпиез куштэмлэсь воксё алыны уг яра. Совето Союз сыӵе алон пыр потӥз ни. Соку, нылпизэс лушкем куштыса, туж трос нылкышноос быризы. Туннэ улон капчи ӧвӧл. Соин ик калыклэсь нылпи вайыны мылкыдзэ ӝутоно. Семья кылдытон бордын гинэ ужпум  ӧвӧл. Адямилы ӟеч улонлы оскон, юрттэт кулэ. Та сярысь сюлмаськоно, программаос дасяно. Калык умойгес улыны кутске ке, со одно ик тросгес нылпи вае.

— Сарапулын сокема ужаса, малы Иже кошкиды?

— 1998-тӥ арын монэ ас дораз ужаны басьтӥз Нырысетӥ элькун больницаысь валтӥсь врач Наталья Харина, 7 номеро нылпи ваён юртэн кивалтыны оскиз. Мыным татын ужаны тунсыко йӧтӥз соиз ласянь но: татчы быдэс шаерысьтымы тужгес секыт нылкышноосты вутто. Татын тросгес адямилы юрттыны быгато, шуи. Пӧрмиз, лэся. Отӥяз валтӥсь врачлы воштӥсе юнматӥзы.

—  2006-тӥ арын тӥледлы ӵектӥзы Нырысетӥ элькун больницалы валтӥсь врач луыны. Кема мал-паськиды-а?

— Уг алда: ӧй. Но бась-тӥськеме бере толэзь ортчыса, азьло интыям берыктӥськеме потыны кутскиз. Нырысь-валысь уд тодӥськы уго, мар тонэ возьма. Больницаын тӥрлык вуж, туала оборудование ӧвӧл. Берло 30 арзэ отын огпол но ремонт лэсьтэмын ӧвӧл. Синъёс ик курдазы. Но тужгес секытэз: куд-ог специалистъёсын аслам ужаме уг поты, нош соослы та сярысь вераны секыт. Собере малпай: мон кошко, но тазалыкез утён удысын кылдэм шуг-секытъёс уз шупче. Кинлы ке но соосты интыысьтызы вырӟытоно.

Нырысь ик команда кылдытон бордысен кутски. Мон котьку учкисько адямилэн ужаны быгатонэз шоры. Ачим кадь оскымонъёссэ котырам люканы тырши. Огназ уго адями номыр лэсьтыны уз быгаты. Отӥяз кутски больницаез выльдон вылысь уксё курыны. Нош кураськон туж секыт вылэм. Котькуд копейкаез туж секытэн поттӥськиз — дурыныз ноку ӧз зоры. Туж юрттӥз модернизацияя федерал программа. Соку ик луонлык кылдӥз кӧня ке отделениосты выльдыны, туала куронъёслы тупась техника басьтыны. Ужаны кутскыкум, больницаын одӥг но томограф ӧй вал. Нош инсультлэсь макем зол шуккемзэ со гинэ рос-прос возьматэ. Ультразвуковой оборудование но йӧнала ӧй вал. Туннэ суред воксё мукет.

Со сяна, быгатӥмы перинатальной центр усьтыны. Ужало ЭКО лэсьтонъя, сюрес вылын шуккиськемъёслы юрттэт сётонъя, эндокринологияя но мукет центръёс.

— Коллективады 1 сюрс 500 мурт ужа. Сомында адямиен кивалтыны кызьы вуттӥськиськоды?

— Кивалтон монэ чурытгес кариз. Котьку котькинлы шуисько: врач йӧнатонын янгышаз ке, сое простить карыны луэ ай — адями робот ӧвӧл. Но висисьёслэсь уксё портон но висисьёсын лек вераськонэз ноку уг чида. Та понна одӥг гинэ врачез ӧй улля ни. Сое ваньзы больницаын тодо. Уж шоры чиньы пыртӥ учкисьёс но татын кема уг ӝегало. Зэм, кытын ке небытгес но луи. Котькуд адямилэн аслаз улон-вылонэз, шуг-секытъёсыз, уката ик — уждун тырмымтэ дыръя. Соин ик маин быгатӥсько, соин юрттӥсько. Кин ке йӧнатыны, кин ке уксёен юрттыны куре. Специалистъёсы сяна, Ижысь «Буммаш» котырысь адямиос но ялан мыным вазиськыло. Кун Кенеше быръёнъёс дыръя соос ас вакытаз мыным оскизы. Зэм, политикае монэ Наталья Харина кыскиз. Кун Кенеше депутатэ мыныкуз, солэн штабаз ужай, калыкен пумиськылонъёсын вералляй: Харина кадь адямиос понна куараез сётоно, тӥяськись тӥрлыкен медам ужалэ, адямиосты йӧнатыны мед быгатомы шуыса. Та бордысен ик кутскиз политикае кыстӥськонэ. Но соку огпол но ӧй малпа, ачим куке-соку депутат луо шуыса. Удмуртилэн соку Президентэз Александр Волков ӵектӥз. Кун Кенешын луыны кулэ котькуд удысысь адямиос, уката ик асьсэ удысазы профессионалъёс, шуиз. Мон кема малпаськыны уг яратӥськы бере, соку  ик соглаш кариськи. Калыкен ужаны но туж яратӥсько. Бырйисьёс но оскемзэс веразы, озьы Кун Кенеше сюри, Тазалыкез утёнъя, демография но семья политикая ялан ужась комиссие пырисько.

— Семьяды таӵе малпандылы дурбасьтӥз-а?

— Валтӥсь врач луэме бере акушер-гинеколог сямен ужамысь, дежурствоосы кыльылэмысь дугдӥ. Мыным соку 48 арес вал ни. Но али ке но кӧто кышноосты адӟисько ке, соосты ӟыгыртэме потэ. Аслам тросгес нылпи вайыны дыры ӧй вал.

Нош картэлы депутатэ мыныны дасяськисько шуи но, со вазиз: тон мар, уд вормы. Мыным озьы шуыны уг яра, мон пушкын олокинэз сайка. Вормем потыны кутске. Адямиос малпало: депутат луыны капчи ӧвӧл, пуконъёс кемалась люкылэмын ни. Но со озьы ӧвӧл. Котькин тон мед луод, аслад округад умой ужаны тыршоно, соку калык но тыныд оскоз.

Депутатъёс пӧлын врачъёс ӧй луысалзы ке, кин тодэ, кыӵе югдурын луысал тазалыкез утён удыс. Туэ республикалэн бюджетысьтыз эмъяськонлы ватсаса 500 миллион манет йылтыны луиз. Бырйисьёсмылэсь куронъёссэс санэ басьтыны тыршиськомы. 2 бадӟым курон ми азе пуктэмын. Ижын Столичной микрорайон кылдэмен, 7-тӥ больницаын калык трос луиз. Югдурез капчиятон бордын ужаськомы. Микрорайонын ар пумозь эшшо одӥг больница усьтыны чакласькомы. Оскисько: пӧрмоз. 7-тӥ городской больницалэн бурд улаз ужась нылпи больницаез паськытатыны, артысь юртэз басьтыны, выльдыны быгатӥмы ук. Таӵе вормонъёслы луыса но туэ быръёнъёс дыръя нош ик дасяськисько депутатэ мыныны.

Зэм, куд-ог дыръя мон вылэ олокыӵе но йыркуръяськон мылкыдын учкисьёс луыло, чагиськон гожтэтъёс но пӧралляло. Кылме чурыт вераны быгатӥсько уго. Нырысь-валысь сыӵе учыръёсы сюлэм ик чепыльскылӥз. Но аслым шуисько: уждэ тод но ул. Одӥг эскерон но янгышме ӧз шедьты на.

Ваньзэ, мар малпай вал, ӧй быдэсты на. Кылсярысь, тазалыкез утён технологиос дуннеын туж ӝог воштӥсько. Соосты ваньзэ асьме доры вуттэме потэ. Зэм, солы туж бадӟым уксё кулэ. Ас вакытаз быгатӥмы вал Россиын нырысьсэ туж аспӧртэм операция лэсьтыны. Пери шуккем адямилы тромбен ӵакмем вирсэрзэ мугорысьтыз ик басьтэм мукет вирсэрен воштӥмы. Со понна Удмуртилэн Кун премиезлэн лауреатэз луим. Табере сыӵе операциос Россиын но лэсьто ни. Но азьланяз сыӵе ик азьмынӥсьёс радын луон понна кадръёсты юнматоно. Со бордын тыршо.

— Тӥ уж сярысь вунэтылӥськоды-а?

— Уж монэ одӥг секундлы но уг лэзьылы. Дорын сюлэм уката шуг луэ. Но шур дурын чорыг зыгатон вакытэ котырысь быдэс дуннеез адӟемысь дугдӥсько. Тау картэлы сыӵе минутъёс понна — со монэ чорыганы дышетӥз. Нырысь-валысь сое пыкылӥсько вал, чорыганы ветлэ шуыса. Огпол сьӧраз кутӥз но, табере ваньмыкум котьку сьӧраз куриськисько. Кышноослы шуисько: карттэс чорыганлэсь куштӥськыны эн куре. Кышноос бӧрдозы, вань курытсэ сюлэмысьтызы лэзёзы, инсультлы но инфарктлы профилактика луэ со. Нош пиос бӧрдыны уг быгато. Соослы чорыган но пӧйшуран — шутэтскон.

.Книга лыдӟытэк, умме усеме уг луы. Ваньмон дыръям но ки улам котьку книга.

Пичи дыръям мыным ялан оскылӥзы бакча урыны, ву кисьтаны. Али дачамы вань ке но, отын гуждор гинэ киземын. Арлыд люкай ке, оло, музъем борды кыстӥсько на.

Елена Сараматова

 

 

Удмурт Дунне
By Удмурт Дунне 14 июня, 2017 17:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<