Улон бездыт. Но… Мар сярысь верало Павел Эльлэн крезьгурез но киноосыз?

Удмурт Дунне
By Удмурт Дунне 29 июня, 2017 14:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арняе Ижын возьматӥзы «Эшшо одӥг нунал» кино. Со фильм ваче вераськонъёс вылын возиське, шудэ мӧзмонэн пачылась крезьгур. Кыӵе жанрен со лэсьтэмын но маиныз бордаз кыске? Вераськиськом Шаркан ёросысь крезьгурчиен, режиссёрен, видеоблогерен, «Эшшо одӥг нунал» кинолэн автореныз Павел Элен (Перевозчиковен).

Павел Эль лэсьтӥз мамблкор жанрен кино.

— Тон кемалась гуръёс гожъяськод ни, кусып возиськод Россиысь тодмо крезьгурчиосын. Но малы со, шуом,  «эктоникаослэн» кадь, калыклы тодмо ӧвӧл?

— Тодмо луон понна тодмо луэмед мед потоз. Мынам сыӵе мылкыды ӧвӧл. Ма, крезьгур ӧръёс но, кудъёсаз мон асме эскерисько, экспериментъёс лэсьтылӥсько, тросэзлы сюлмазы уг лякисько. Медаз. Мыным яра.

Но мынэсьтым выль трекъёсме витись адямиос вань ик. Со мынам пичи фанбазае. Мон трос аръёссэ ӵош ужасько ни Россилэн пӧртэм сэрегъёсысьтыз крезьгурчиосын. Та пумысен вотэслэн бадӟымлэсь но бадӟым плюсэз. Со юрттэ шедьтыны ачид кадь малпаськись адямиосты.

Крезьгуред тыныд коньдон вае ке, валамон, со умой, но ужед пумен тонэ гуаз кыскоз, шокчыны маза уз сёты ни, дыр ортчыса, шумпотон ваемысь дугдоз. Мон понна крезьгур гожъян — со уж но, хобби но ӧвӧл.

— Крезьгурысьтыд кылӥсько зарезьлэсь тулкымъяськемзэ, тӧллэсь чингылиосын шудэмзэ, нюлэслэсь ӵаштыртэмзэ. Крезьгур гожъяны мылкыд инкуазь-а сётэ?

— Юанэдлы валэктон сётыны капчи ӧвӧл. Ӵем озьы луэ: мон ӝыны аръёсын крезьгур гожтыны уг быгатӥськы, со вакытэ трос мукет гуръёсты кылзӥськисько. Нош кыӵе ке вакытэ йырам шуак малпан шукке: малы бен уд лэсьты трек, кудӥз кельшоз та крезьгурчилэн ужъёсызлы? Тани пукиськод ни, утчаськод куараосты, соосты ог-огзы борды лякылыса эскериськод. Собере воксё мукет трек пӧрме.

Зэмзэ ке, гожъяськон мылкыдме трос мар лӧпкытэ: зоро куазь, шапыкъёслэн липет борды шуккиськемзы, сӥзьыл, солэн кулонэн пыӵам тусыз, пумтэм инсьӧр дунне, фантастической малпанъёс. Кин ке но, крезьгур гожтыны курыса, вазиське ке — со но лӧпкытэ. Но кемалы уг.

— Нош кино лэсьтыкуд? Кыӵе режиссёръёсты синйылтӥськод?

— Мон кадь адямиослэн вань льӧль малпанзы: лэсьтыны ӟеч кино, сыӵе, кыӵеен сое калык адӟыны дышемын. Но тодмотэм режиссёрлы озьы лэсьтыны али уз пӧрмы: техника, актёръёс ӧвӧл, нош снимать карем кӧшкемыт зол потэ. Соин ми эскериськом, утчаськиськом. Озьы кинематографиын выль ӧръёс кылдо, кылсярысь, mumblecore (мамблкор — геройёслэн вераськемзы вылын лэсьтэм кино). Вань ук огшоры улон, котырамы ветло адямиос, котькуд нунал соосын, милемын маке но луэ. Кыӵе ке вакытэ мон валай: мынам ӵапак та сярысь кино снимать кареме потэ. Та ик монэ гочатӥз. Таӵе амалэн лэсьтэм киноосты сокем трос ик ӧй учкы, но шордӥньзэ валай. Та дырлы ӵапак сыӵе формат мыным тупа.

Уж борды кутскон азьын мон тодам вайисько Ричард Линклейтерлэсь «Перед рассветом», «Перед закатом», «Отрочество», «Каждому своё» кинооссэ, Макото Синкайлэсь анимезэ, Джо Сванберглэсь но мукет режиссёръёслэсь мамблкор фильмъёссэс. Яра учкыны Америкаын лэсьтӥськись независимой киноосты.

— Тон улӥськод Шарканын. Гурт суредъёс, адямиослэн огыр-бугыр улонзы тынэсьтыд стильдэ вӧло?

— Шарканын, Россиысь мукет интыосын кадь ик, кино лэсьтыны луонлыкъёс ӧвӧл, уз но луэ. Адямиос дышемын Западын лэсьтӥськись киноослы, мынамез но сыӵе ик луыны кулэ шуыса малпало: чебер, чылкыт, йыр поромымон.

Соослэн йыразы ӧвӧл, кунгож сьӧрын киноез сюрс адямиос аръёсын-аръёсын лэсьто, отчы дасо миллион долларъёс куштӥсько шуыса. Нош тынадэз ӵемысь документалкалы кельше, соин адямиос шуо: малы киноын кадь ӧвӧл? Ма, малы ке шуоно мынам «киное» уг лэсьтӥськы павильонъёсын, со бордын уг ужало художникъёс, суредэз чебермась адямиос, отын уг шудо зэмос актёръёс, отын ӧвӧл дышем суредъёс, сюжетъёс.

Мон будӥ Шарканын, милям инкуазьмы, гуртъёсмы сокем чебересь, коть вань киноосты татын лэсьты. Сюлмы куре: инкуазь киноын фон интыын гинэ медаз, со ачиз герой мед луоз.

«Эшшо одӥг нунал» киноын шудӥзы кырӟась А. Иванова но дышетӥсь В. Вахрушев.

— «Эшшо одӥг нунал» киноысь адӟиськом: тонэ бордаз кыско огшоры улонысь учыръёс, адямиослэн вераськемзы. Шӧдӥське, геройёс, ог-огзэс валатэк, ас пушказы ватӥськыса уло шуыса…

— Котькуд нуналмы милям огшоры ортче. Инопланетянинъёс дорамы уг лыкто, батыръёс дунне быронлэсь уг утё… Улон мӧзмыт но бездыт. Но…

Котырамы бергало адямиос. Мыным тунсыко соос шоры учкыны, выросъёссэс чакланы, кылзыны, ма сярысь верасько. Озьы люкам материалме, киноосысь геройёсылы образ кылдытыкум, кутӥсько.

Мон, зэмзэ верано ке, сценарий гожъяны уг быгатӥськы, ма, снимать карыны но. Соин ик утчасько кескич амал. Троссэ, мае возьмато мамблкор киноосын, учкыны секыт. Таӵе киноосын действие ӧвӧл — геройёслэн вераськемзы сяна, номыр уг воштӥськы. Соин ик Западын та ӧр сярысь тазьы верало: шоро-куспо арлыдъем адямиослэн улонзы, соослэн асьсэды шедьтыны выремзы. Таӵе кино дуннелэсь урод палзэ, улон пыдсы усем адямиосты уг возьматы, татын романтикалы но инты вань, но со сокем льӧль ӧвӧл, кызьы со пушъе ромкомъёсын (романтической комедиосын — авт.). Огшоры улонын кадь.

Мынам потэ возьматэме адямиослэсь малпанъёссэс, соослэсь улэм-вылэмзэс, огшоры нуналзэс, соослэсь дуннезэс, бадӟым но пичи шуг-секытъёссэс.

Мария Векшина

Туспуктӥз Игорь Гуменников

 

 

 

Удмурт Дунне
By Удмурт Дунне 29 июня, 2017 14:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<