Уло гондыръёсын артэ

Удмурт Дунне
By Удмурт Дунне 2 июня, 2017 10:24
Шаркан ёросысь Гондырвае вуон понна трос гуртъёс вӧзтӥ ортчоно: Мочища но Пороз, Луговая но Липовка, Пипиё но Карсашур. Пермь улос вӧзы,  бадӟым гурезьёслэн выжыязы, тӧллэсь ватӥськыса кадь, пуксемын Гондырвай.

Гондырвайысь мыло-кыдо нылкышноос

 

Нылпи сад интые — магазин

Та гуртэн тодматскон понна ульчаостӥ ветлонэз ӧвӧл. Гурезь йылысен со син азьын быдэсак усьтӥське. 1 кузь урамысь — огпалзэ Вортчапал, мукет палзэ Боняпал шуо — пото вакчиосыз: Гурезьйыл, Пичи ульча, Выль ульча… Кытӥ-отӥ адско кирпичлэсь ӝутэм йӧно коркаос. Соос вӧзын ик лад-лад сыло коръёслэсь лэсьтэм вашкала юртъёс. Гуртлэн шораз шунды сиос улын ворекъя бадӟым тымет.

Гондырвай пыре Карсашур муниципал кылдытэтэ. Гондырвайын ӧвӧл нылпи садзы, школазы, библиотеказы. Но вань фермазы, культура юртсы, магазинзы, фельдшер-акушер пунктсы.

Вортчапал кузя гань-гань вамышъя Анна Николаевна. Фамилиез гуртэзлэн кадь вылэм — Гондырева. Магазинэ, шуэ, мынӥсько. Мон — сьӧраз.

— Пенсиын шутэтскисько ини, — вамышъян сяменыз маде со. — Ялан пудо котырын ужай. Ярам коть, гуртамы ферма ӧз куашка. Туннэ скалъёсын, ветылъёсын, порозъёсын 4 гидмы вань. Соос ӧй луысалзы ке, калык ужлы ёрмысал. Но мӧйыос отын тыршо ик ай, нош егитъёслэн выремзы уг поты ини — Гондырвайысь кошкыны дырто. Тани аслам но 3 кузя нылпиосы кудзы кытчы лобӟизы.

Гондырвайын улэ-вылэ ог 190 адями. Бускель Карсашурысь нылпи садэ 3, школае 13 пинал ветло. Азьло аръёсы 1-тӥ классэ вамыштӥсьёссы воксё вылӥллямтэ. Туэ 2 тэшкылизы школае дасяське, 1 вож нунызы вордӥськем.

— Тани татын азьвыл нылпи сад вал, — пулэсь 1 этажъем корка шоры возьматэ Анна Николаевна. — Но нылпиослэн лыдзы усемен, сое пытсазы но магазин каризы. Ойдолэ, пырелэ, учкелэ — ваньмыз вань.

Зэм но, магазинзы узыр вылэм. Соин но отчы калыкез тымиськем — черод ульчае потэ, ява. Гуртоос, «Удмурт дуннеысь» вуэмме тодыса, улэм-вылэмзы сярысь мадьыны ӧдъязы.

Тымет

— Мон татын фельдшер луыса 30 ар пала тырши, — вера Нина Аникина. — Но али дорам пукисько. Шумпотӥсько, ужан аръёсы мугорез юзыр-кезьыр карись учыръёстэк ортчизы. Колхозникъёсты мар шугъяськытэ? Остеохондроз. Куд-огезлэн вирзӥбетэз шудылэ на вал. Умой на соиз но: ми асьмелэсь ФАП-мес утьыны быгатӥмы, нош мукет пичи гуртъёсын соос пытсаськылӥзы.

Гуртоослы жадьыны ма-за уг сёты «Инвожо». Ансамбле ветло 8 арлыдоос. Кемалась ӧвӧл бертӥллям Вотка городысь «Гуждор» фестивальысь. Али дасясько ёросысьтызы Быгие — «Быг-быг» ужрадэ.

 

— Мӧйыосмы туж мыло-кыдоесь. Огпол гинэ жингыртӥськод но, ваньзы соку ик люкасько, — шуэ Татьяна Трефилова. Татьяна Валентиновна — ветеринар. 27 ар Гондырвайын ужам, бӧрысь Кипунэ выжем. — Мынон-ветлон ласянь шугъяськонъёсмы ӧвӧл. Рейсовой автобус арняяз 2 пол — ӵукна но ӝыт — ветлэ. Кылем арын сюресъёсмес тупатъязы. Солэсь азьвыл гуртамы нӧдэн уд но пыры, уд но поты вал. Чагыр эстӥськонмы вань. Вуэн шуг-секытъёсмы уг кылдыло.

— Нош малы гуртлы Гондырвай ним сётӥллям? — юатэк уг чидаськы.

Гуртоос ог-огзы шоры учкизы но пельпумъёсынызы выретӥзы. Гондырева гинэ лад-лад валэктыны дыртӥз:

— Та ним пумысен трос малпанъёс вань — ёрос газетмы одӥгзэ гожтӥз, мон мукетсэ тодӥсько. Кудӥз шонер — ӧйтӧд. Но Аркаш дядяе вералоз вал: та интые нырысетӥ корка пуктӥсьёс, пе, вай вылысь гондырпиез адӟиллям, озьы гуртсэс Гондырвай шуиллям.

— Ми дорын вань гинэ гондыръёс, — вераськонамы итӥське Аникина. — Кылем арын соос уката трос вал. Бускель улосъёсын уно сикъёс ӝуазы. Тыллэсь кышкаса, лэся, та пӧйшуръёс ми палъёсы вуиллям. Эмезь бичаку, пытьыоссы син шоры ӵем йӧтылӥзы. Кузпалы чорыганы кошкиз вал. Гондырез адӟыса, кызьы бертэмзэ ӧз вала…

Пудо вань, ужась ӧвӧл

Гуртоосын вераськыса, малпан кылдӥз, Гондырваез шуг-секытъёс палэнтӥ ортчо шуыса.

— Милям колхозмылэн кивалтӥсез Анатолий Толшаков ӟеч уга, — вера колхоз администрациысь бухгалтер Надежда Вахрушева. — Со бордын гинэ гуртмы возиське на. Фермаямы 550 сюро таза пудомы. Та пӧлысь 209 йырез — скалъёс, отӥосыз — порозъёс но ветылъёс. Ужасьёсмы 58 кузя. Егитъёслэн дорамы тыршемзы уг поты но, гондырвайёслы карсашуръёс юрттӥськыны ветло ини.

Гурт ульча

Гондырвайын ву башнязы вужмемын. Ку сое выльдон борды басьтӥськозы — колхозын вераны уг тодо. Угось та ужъёслы миллион манетлэсь ятыр, пе, кулэ.  Нырысь, шуо, Починка ульчамы борды басьтӥськомы. Ог 25 ар талэсь азьло гуртэ ву кыскыку, та урамлэн ӝыныезлы гинэ гумыос окмиллямтэ. Озьы со дырысен туннэ нуналозь отын улӥсьёс вутэк уло.

Ольга Корепанова

Удмурт Дунне
By Удмурт Дунне 2 июня, 2017 10:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<