Тылобурдо пыэдэн валче Пичи Пурга ёросын ялэмын карантин

Удмурт Дунне
By Удмурт Дунне Июнь 8, 2017 14:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга черкогуртысь Набережной ульчаысь 2 хозяйствоысь 15 курегъёс тылобурдо гриппен черласа быремен, 25-тӥ мае быдэс ёросын карантин ялэмын.

Пичи Пургалась Набережной ульчае нуись 2 пролкаос кенерамын.

Та вакытэ Набережной ульчае пырыны луэ одӥг пролкаетӥ гинэ. Отчы нимысьтыз пост пуктэмын, уй-нунал дежурить каро пудо эмъян службаын, ёрос администрациын но полициын ужасьёс. Ми вуыку, постын сыло вал Пичи Пурга черкогуртысь Пудо эмъянъя службаын ужась водитель Владимир Баймурзин но та службалэн Эдэйгуртысь ёзэныз кивалтӥсь Надежда Юдина.

— Та ульчае пырись-потӥсьёсты нимаз журналэ гожъяськомы, пусйиськомы кытчы мынэмзэс, — шуэ Надежда Павловна. — Нуназеозь гинэ 35 машина но 27 адями Набережной ульчаысь потӥзы. Машина питранъёсты пазяськомы хлорка суретэн, адямиос но та сурет вылтӥ ик вамышъяны кулэ.

Гурт калык дышемын ни таӵе пост пыр пыраны-потаны, черкогуртын кылдэм югдурез умой валало: пудо эмъянъя службаын ужасьёслэсь куронъёссэс тӥясьёс асьсэлы гинэ ӧвӧл, быдэс ёроссылы кышкытлык вайыны быгато.

Пырись-потӥсь машинаосты хлоркаен пазяло.

— Куд-огезлэн лушкем выремез потэ ик, — вераськонэ итӥськиз Пичи Пургаысь Ветеринарияя службаын ужась Фаина Ильина. — Ульчае одӥг интыетӥ гинэ пырыны луэ, нош мукет 2 пролкаосмы профнастилэн кенерамын. Сое усьтыны вырисьёс шедьылӥзы ке но, гурт калык дыраз синйылтӥз.

Тылобурдо грипп шуыса тодэмзы бере ик Удмуртиысь Ветеринарияя управлениын ужасьёс но ёросэ вуизы. быдэс черкогуртын но ёросын улӥсьёслэсь тылобурдооссэс гожъяса ортчизы.

— Набережной ульчаысь 12 коркась 128 курегъёс быдтэмын. Озьы 19-тӥ корка бордысен кутскыса 59-тӥ коркаозь вань гидъёсты, азбаръёсты, быдэс ульчаез дезинфицировать каримы, — веранзэ азьланьтэ Фаина Леонидовна. — Курег гидъёсысь пузан кудыосты сутӥмы. Со сяна, калыклэсь бичамы на курегпуз, курег сӥль. Учыр сярысь соку ик ивортӥмы артысь Можга, Ува, Кияса, Сарапул, Дэри ёросъёсысь но Татарстанысь Агрыз ёросысь ветстанциосын ужасьёслы. Ӝегатскытэк люкамын вал ёросысьтымы вань муниципал кылдытэтъёсын кивалтӥсьёс, соослы но кылдэм югдур сярысь ивортӥмы.

Та дыре ёросын но карантин ялэмын.

Пудо эмъянъя службаын ужасьёс уг вато: гуртоос карантинлэсь жадизы ни. Машина кузёос кырыж учко хлорка вуэн пазям шоры, мукет ульчаосын улӥсьёслэн ӝожтӥськемзы потэ, таӵе шулдыр, курег пузан вакытэ тылобурдооссэс пытсаса возёно луэ шуыса.

— Тылобурдо грипплэсь ум курдаське кадь, — шуэ пумитамы шедем кышномурт, артысь ульчаын улӥсь Светлана Моромова. — Курегпуз вузаса, коньдон поттыны быгатӥськомы вал, табере ваньзэ асьмелы кельтоно луэ. Малпаськомы, ваньмыз радъяськоз, ӝоген карантин шуонзэс но куштозы.

— Ачим мон Миндэр гуртын улӥсько, тылобурдо грипплэсь палэнынгес ке но, ми но ветеринаръёслэсь вань куронъёссэс быдэсъяськомы, — шуэ Людмила Дмитриева. — Милесьтым но курег-ӟазегъёсмес лыдъязы, вань бурдоосмес липет улын возиськомы, ураме потаны ум лэзиське.

Та дыре ёросын но карантин ялэмын. Озьы Набережной ульчалэсь 5 иськеме интыяськем гуртъёс (Абдульменево, Миндэр, Бӧдья, Миндэрвуко, Баграш-Бигра, Орлой но Курчум) кышкыт зонае шедемын лыдъясько, нош 10 иськеме интыяськемъёсыз (Пугачёво, Кӧтшур, Столярово, Эгра, Яган, Гожня, Куреггурт, Курчумпочинка, Ыбдэс, Юсьпиян, Юськи) — эскерыса возён зонае.

Туннэ нуналлы Пичи Пурга черкогуртысь тылобурдо грипп пачкатэмын, шуыны луоз. Ветеринарияя управлениен кивалтћсь Н. Котельников оскытӥз, сутэм курегъёслэн дунзы берыктэмын луоз.

Эмъясьёс тылобурдо висёнлэсь потэм мугзэ шараяны выро. Азьвылгес шуизы вал, кыр тылобурдоос бордысь вӧлмемын, али валэкто: пыэд шедиз Ростов улосысь «Евродон» огазеяськонлэн курка фаршез бордысь. Курка фаршлэсь бинялтэтсэ адямиос пунызылы куштӥллям, сое курегъёс кокчаны шедьтӥллям. Озьы гурт тылобурдоос черлаллям.

Карантин 21 нунал кыстӥське ке но, пудо эмъянъя станциын ужасьёс верамъя, та интыын 3 толэзь ӵоже нокыӵе тылобурдоосты возьыны уг яра.

 

* * *

Тылобурдо грипп — паласькись висён. Тылобурдо пушкын вирус 1-7 нунал ӵоже лушкем возиськыны быгатэ. Черлам бурдоос кизьныло, ӟускизы лызэктэ, синвузы вия, шоканзы уродме, кӧтсы вия, пыдъёссы пумо. Тылобурдоосты йӧнатыны уг луы, соосты сутоно. Адями борды та чер уг дэмӟы.

     Валентина Емельянова

 

Удмурт Дунне
By Удмурт Дунне Июнь 8, 2017 14:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<