Сьӧлта ёросэз тодмо кароз тетера

Удмурт Дунне
By Удмурт Дунне 6 июня, 2017 16:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

2-тӥ инвожое Сьӧлта ёросысь Зямай гуртэ люкаськылӥзы бускель Ува но Сюмси ёросъёсысь удмурт культураез гажасьёс. Сьӧлта музъем вылын нырысьсэ ортчиз тетералы сӥзем фестиваль.

Туэ «Гурт адями» конкурсын «Устоез кивалтӥсь» номинациын вормиз Сьӧлта ёросысь Кильмезь муниципал кылдытэтлэн йырыз Олег Пчельников. «Удмурт дуннелэн» валтӥсь редакторез Зинаида Рябинина та нуналэ сое удмурт дэремен но таукаронэн пусйиз.

Таӵе ужрадэз ортчытыны кичӧлтонэн потӥз ёросысь «Удмурт Кенешлэн» одӥгез ёзчиез Галина Иванова.

— Ёросысь коллективъёсынымы шаерамы ортчылӥсь пӧртэм удмурт ужрадъёсы вуылӥськом, — вераз нылкышно. — Люкаськемъёсты асьме палась пӧрам удмурт сиён-юонэн утялтӥськом. Милемлы паймымон потӥз, тетераез шаерамы уг тодо шуыса. Нош али тросэз ёросъёс пӧртэм сиён-юонъёслы сӥзем ужрадъёс ортчытъяло: эграос — пельняньлы, кезъёс — пешниклы, малы милемлы но сыӵе фестиваль радъянтэм кадь. Тетера сярысь мед тодозы быдэс Удмуртиын, та сиён асьме ёрослэн брендэз выллем мед луоз.

Тетераен куноятон.

Тросэз юалозы, мар со сыӵе тетера? Со туж огшоры лэсьтӥське — тари, рис, чабей яке мукет ӝуке курегпуз шукконо. Кизер ке, пызь ватсано. Оладиез сямен, ӟырдам табае тыроно но ӝуась гур азьын, ӵыжыт луытозязы, пыжоно, вӧйын зырано. Таӵе ческыт сиёнэн но удмурт кырӟанъёсын пумитазы кунооссэс сьӧлтаос. Тетера вашкала дырысь сиён шуыса сценка возьматӥзы Выль Мӧнья гуртысь кырӟась-верасьёс. Светлана Хлебова София нылыныз тетера сярысь кырӟан быдэстӥзы, сое Светлана Петровна ачиз ик гожтэм. Гуртысь нылпиослэн «Дарали» ансамбльзы удмурт эктонъёсын шулдыртӥз. Озьы ик асьсэ коллективъёсынызы но тетераез лэсьтон амалъёсынызы тодматӥзы Гопгуртысь, Толошурысь, Сюромошурысь, Югдонысь, Кӧпкалась но мукет гуртъёсысь ансамбльёс. Шулдыр гуръёсын, ческыт пыжиськемъёсын фестивале вуизы Сюмси но Ува ёросъёсысь коллективъёс. Ува ёросысь Выль Мултанысь «Вумульы» ансамбль асьсэ палазы удмурт культураез вӧлмытэ ини 13 ар пала. Кивалтӥсьсы Нина Хамитова верамъя, тетера соослы но матын, гуртазы ӵемысь сое пӧрало.

Тетера туж огшоры лэсьтӥське — тари, рис, чабей яке мукет ӝуке курегпуз шукконо. Ӟырдам табае тыроно но ӝуась гур азьын пыжоно.

Адямиос ӧз бырылэ Зямайысь кызьпу арама котырын пуктэм гур азьысь. Отын радъямын вал тетера пӧранъя мастер-класс. Пӧсь пыжиськемъёс оп! шуытозь син куспын сииськизы.

Куноос чотын фестивале ӧтемын вал «Удмурт дунне» газет но. Ужрадэ сяна, газетчиослэн та палъёсы вуылыны  мукет мугзы вал на. Туэ «Гурт адями» конкурсын «Устоез кивалтӥсь» номинациын вормиз Сьӧлта ёросысь Кильмезь муниципал кылдытэтлэн йырыз Олег Пчельников. «Удмурт дуннелэн» валтӥсь редакторез Зинаида Рябинина та нуналэ сое удмурт дэремен но  таукаронэн пусйиз. Ӵапак Олег Викторович ӵектэмъя фестиваль солэн вордӥськем гуртаз — Зямайын — ортчиз. Сьӧлтаос шуо, та кичӧлтонзэс азинтозы но доразы ӧтёзы шаерысьтымы ваньзэ ёросъёсты.

Ангелина Снигирёва

Туспуктэмъёс: selty.udmurt.ru

Удмурт Дунне
By Удмурт Дунне 6 июня, 2017 16:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<