Профессор Галина Никитина яркыт но оскымон вал…

Удмурт Дунне
By Удмурт Дунне 6 июня, 2017 14:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Со сярысь ортчем дырын вераны кыл уг берытскы… Улонысь кошкиз «Удмурт Кенеш» огазеяськонлэн одӥгез яркыт азьветлӥсез, история наукаосъя доктор, профессор Галина Никитина. Кыӵе со вал?

Галина Никитиналы 65 арес вал…

Мылкыдыз — пыдэстэм

Тодэ лыктэ 2002-тӥ ар, ноябрь. Кырын кӧшкемыт зол тӧлаське, Удмурт театрын  сыӵе шуныт но сайкыт. Татын ортче «Удмурт нылкышно кенешлэн» конференциез. Элькунысьтымы визьмо, шаплы удмурт нылкышноос зал тыр люкаськемын.  Соку Нылкышноослэн кенешенызы кивалтӥсь Галина Никитина рос-прос доклад лэсьтӥз, вань удмурт нылкышно азьветлӥсьёслы ужамзы понна тау кариз но куриз ассэ та интыысь мозмытыны. Тросгес дырме, пе, сётэме потэ наукалы, удмурт гуртлы сӥзем бадӟым уж, пе, дасяны малпасько, но ваньмаз уг вутскиськы. Но нылкышноослэн кивалтӥсьсэс воштэмзы ӧз поты, «тӥ ваньзэ вуттоды», «ми тӥледлы оскиськом» шуизы. Озьы куаразэс огкылысь сётыса, делегатъёс «Удмурт нылкышно кенешез» валтыны нош ик оскизы Галина Никитиналы.

Али малпаса паймоно, кызьы но ку Галина Аркадьевна ваньзэ вуттылӥз? Со огшоры тодосчи гинэ ӧй вал ук, Историяя, кылъя но литературая Удмурт институтлэн директорезлэн воштӥсез луыса ужаз. Огдыре ик выль тодосчиосты визьмаз-будэтӥз, наукая ужъёс гожъяз, экспедициосы потаз, книгаос дасяз, кунгож сьӧрысь но Россиысь конференциосын докладъёс лыдӟылӥз, элькунамы конференциос радъялляз. Ныпъетэз зэмзэ но туж секыт вал. 2004-тӥ арын ортчытэм «Диаспоры Поволжья и Урала» бадӟым калыккуспо конференциез гинэ но тодэ ваёно ке. Наукая 100-лэсь трос статьяос, 3 монография — со кӧлымтэ уйёслэн емышсы но, вылды. Нош кӧня кужымез басьтылӥз общественной уж! Котькуд удыссэ со рос-прос нуэ вал. Доклад ке со, вань калыкез вырӟытӥсь-ӝутӥсь, книга ке — уноез понна ӝӧк выл книга, общественной уж ке — вань мылкыдзэ сётыса. Нош солэн аслаз но семьяез вал ук. Кызьы дыр шедьтылӥз нылъёсызлы?

Галина Аркадьевналэн данэзлы луыса, дыр, «Удмурт нылкышно кенеш» котыре но кыстӥськизы тужгес адӟем карымон удмурт нылкышноос, тодосчиос, политикаен вырисьёс, дышетӥсьёс. Ӵапак Галина Аркадьевна нырысьсэ ӝутӥз удмурт элита сярысь ужпумез. Вань-а асьмелэн удмурт элитамы, кыӵе шугъяськонъёс сыло со азьын? Со быгатэ вал удмурт азьветлӥсьёсты малпаськонэ уськытыны, толлозэ но туннэзэ чакласа, вамышъяны. Но ачиз тодосчи дан поттӥсь ӧй вал. Яратӥз чылкытлыкез, кабинетэз чебер но удмурт шӧмо вал. Зэмос удмурт нылкышно сямен со вутскылӥз киужен но вырыны.

Ог 2 ар талэсь азьло пумиськыкумы, Галина Аркадьевна чилясь синъёсын ик мадиз дораз дышетскись аспирантъёс сярысь.

— Тодӥськоды-а, сыӵе тунсыко, визьмо удмурт егитъёс вань. Соос вӧзын мон но асме егитэн шӧдӥсько. Сомында выльзэ лэсьтыны луоз на…

Валентина Ившина но Галина Никитина пусъемын Кузебай Герд нимо премиен.

Кужмысь шудо   уд луы

Вить ар талэсь азьло «Удмурт Кенеш» огазеяськон пусйиз Галина Никитинаез К. Герд нимо премиен. Тодосчи «Удмурт Кенешлы» тау карыса, мылкыдзэ гожтэтэн шараяз.  Туннэ нырысьсэ сётӥськом отысь оглюкетсэ.

«…Удмурт движениын мон кема аръёс ӵоже ни. Котькыӵе вакытъёс вал, шумпотонэз но, секытэз но, бӧрдон калэ вуонэз но. Уг поты ватэме, «Удмурт Кенешысь» кошкон, солэсь палэнтӥськон мылкыдъёсы но бугырскылӥзы. Туж вӧсь луылӥз,  вань тырмымтэосты, ыштонъёсты «кенешчиос» вылэ погыльтыкузы. Али но куд-огез удмурт движение пырисьёсты  пыкылэ гинэ: тазэ ӧд лэсьтэ, созэ ӧд быгатэ, мыным ӧд юрттэ, солы ӧд сётэ…Сыӵе адямиослэсь куддыр юам потэ, мар меда соос лэсьтӥзы удмурт калыксы понна, асьсэ семьяязы ке но удмурт кылэз утизы-а? Кыӵе ке пичи ӟеч уж лэсьтӥзы-а, сюлэмзы косыса, коньдон но дан сярысь, шутэтскон сярысь вунэтыса?

Мукет ласянь ке учкисько, «Кенешын» ужам аръёсме малпаса, сюлмы шуныт мылкыдын тырме. Мон, та движение пыриськыса, удмурт кыллэсь чеберзэ, зумытсэ валаны кутски… Удмурт калык пӧлын ужаны, улыны, соин ӵош шоканы дыши. Ато ведь мон удмурт калык шоры, тросэз тодосчиос кадь ик, палэнысен сое эскерыса, чакласа кадь гинэ учкисько вал. Гуртын улӥсь анай-атайёсын, огшоры музъем ужасьёсын, дышетӥсьёсын пумиськылыса, мон мургес валаны кутски калыкмылэсь ляб но зол сямъёссэ, солэсь аспӧртэмлыксэ, висёнъёссэ но сюлэмшугъяськонъёссэ…

Ноку но уг вунэты, кызьы ми Милитина Васильевнаен (Гаврилова-Решитько) Пичи Пурга ёросэ потамы, милемыз Федосья Тубылова пичи удмурт гуртэ пумиськонэ ӧтьылӥз. Ӝытазе берлань городэ бертыкумы, Милитина Васильевна мыным шуэ: «Вот, Галина Аркадьевна, пумиськонэ мыныкумы, малпасько вал: ваньмыз уж бере гуртазы берто, нош милемды олокин-олома гуртысь ӝытлы пумит палэнэ нуэ. А али малпаськонэ чутрак мукет: ортчем пумиськон гурт калыклы гинэ ӧвӧл, мыным но кулэ вылэм. Тани кыӵе мылкыд ӝутӥськемын, сюлэм шуныт омырен тырмемын».

Туннэ калыкмылэн трос висёнъёсыз, сюлэмшугъяськонъёсыз: тазалыкмес ум утиське, юыны чӧлскиськом, мылкыд кареммыя улонысь кошкиськом… Лыдмы кулэсме, кужыммы лябӟе… Егитъёс гуртысь пегӟо, удмурт кылзылэсь, удмуртлыксылэсь куштӥсько, солэсь пайдалыксэ адӟемысь дугдо. Ма, егитъёс гинэ ке луысалзы, тросэз анай-атайёс удмурт кыллы чутрак пумит султо… Таин валче мыным кинлэн ке но визьмо верамез йырам лыктэ: «Кужмысь нокинэ но шудо уд кар…» Озьыен, куд-огзэ удмуртэз но кужмысь удмурт уд кар, шудо луыны но солы уд юртты, малы ке шуоно солэн аслаз сыӵе мылкыдыз ӧвӧл. Мон туж синмаськыса учкисько УдГУ-ын дышетскись удмурт пиналъёс шоры: чебересь, визьмоесь, котьмаин тунсыкъясько, удмурт кылын но, ӟучен но, кыӵе ке мукет кылын но вераськыны быгато, туж быгатыса, эсэпсэ валаса, пӧртэм ужрадъёсы пырисько… Соос мукетъёсыныз одӥг радын сыло, нош пуш дуннезы эшшо но, оло, узыргес. Вот сыӵе удмуртъёсыз будэтон бордын ужано кадь мыным потэ».

Сюлэмын кезьыт луиз

Игорь Поздеев — Историяя, кылъя но литературая Удмурт институтысь наукая валтӥсь ужась, история наукаосъя кандидат:

— Со вал 2001-тӥ арын. Монэ, Глазов пединститутысь историяя факультетэз йылпумъям муртэ, Галина Никитиналэн кабинетаз пыртӥз Историяя, кылъя но литературая институтлэн соку директорез Кузьма Куликов но шуиз:

— Галина Аркадьевна, тани тӥляд аспирантты.

Озьы мон Галина Аркадьевналэн нырысетӥ аспирантэз луи, паймымон чылкыт сюлэмо, зэмлыко адямиен тодматски. Галина Аркадьевна со вакытэ институтлэн директорезлэн наукая воштӥсез вал. Соин ӵош сомында экспедициосы, командировкаосы потаны кылдӥз! Кыӵе со шумпотӥз, кандидат диссертациме ути шуыса, макем данъяськиз! Со юн куронъёс пуктыны быгатылӥз. Удмурт этнографиез академической тубатэ ӝутӥз.  Котькуд дышетэм адямиезлы тодон-валан гинэ ӧвӧл, лул-сюлэмзэ сётылӥз. Зэмос дышетӥсь. Туж ӟеч адями. Кошкиз но — сюлэмын сыӵе буш, мӧзмыт но кезьыт луиз…

Надежда Степанова — «Удмурт нылкышно кенешлэн» кивалтӥсез:

— Галина Аркадьевна мыным нырысь кыџе ке сузёнтэм нылкышно кадь потэ вал. Удмурт радиоын корреспондент луыса ужакум, шуд усиз со сярысь очерк лэсьтыны. Соку пайми: вань секыт ужъёсты сюлмысь лэсьтыны быгатэ вылэм — скал но кыскыны, турын но дасяны…

Шумпотӥсько, мыным кылдӥз со вӧзын «Удмурт нылкышно кенешлэн» правленияз ужаны. Солэсь мон дышетски калыкен кусып тупатыны. Али но паймисько, кызьы со мыным, егит адямилы, со быдӟа нылкышно движениез нуыны оскиз. Тодам лыктэ фин-угор конгрессэ ветлэммы.  Мон, «Удмурт Кенешлэн» кивалтӥсез Татьяна Ишматова но Галина Аркадьевна одӥг купеын мынӥськом, вераськиськом. Галина Аркадьевна шуэ: «Ойдолэ, нылъёс, кырӟалом!» «На тебе сошелся клином белый свет» яратоно кырӟанзэ, оло, 10 пол кырӟам — сыӵе кельшиз. Нокытын но, ноку но сыӵе кӧттырымон ӧм кырӟалэ ни кадь потэ… Улон кырӟанэз та паймымон нылкышнолэн туж вакчи вылэм.

Елена Миннигараева

Туспуктӥз А. Горбунов

Удмурт Дунне
By Удмурт Дунне 6 июня, 2017 14:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<