Партия тодӥз мылкыдъёсты

Удмурт Дунне
By Удмурт Дунне Июнь 1, 2017 12:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Огъя Россия» праймерзаз Удмуртиын пыриськизы 6,6 процентэз бырйисьёс

Кылем арнянуналэ «Огъя Россия» партилэн праймеризэз радъяськиз, татын вормем кандидатъёс 10-тӥ сентябре Кун Кенеше быръёнъёсъя списокъёсы пыриськыны быгатозы. Озьы 265 кандидат кужымзэ мертано кариськиз.

Пӧлазы Кун Кенешын туннэ ужась 43 депутат вал. Таосты калык тодэ, законъёс кылдытъянын опытсы вань, но калык 25-езлы сяна оскемзэ ӧз возьматы. Кун Кенешысь Президиуме пырись депутатъёс, ялан ужась комиссиосын кивалтӥсьёс пӧлысь но 2-ез гинэ асьсэ округъёсазы тужгес трос куара люказы — со Кун Кенешлэн Тӧроез Владимир Невоструев но солэн воштӥсез Светлана Кривилёва.  Праймериз дыръя  6,6 процентэз бырйисьёс куаразэс сётӥзы. Быръён рейтинг амалъя ортчиз, калык аслыз кельшись кӧня ке депутатэз бюллетеньысь пусйыны быгатӥз.

Праймеризэ трос калык лыктӥз Вотка но Юкаменск ёросъёсын, ичи — Ижын. Куд-ог участокъёсын бюллетеньёс ӧз тырме. Соос уго 359 сюрс экземпляр печатламын вал, калык 15 процентлэсь трос уз люкаськы шуыса, но куд-ог азьын чакламлэсь уногес лыктӥзы. Соослэсь мылкыдъёссэс анкетае гожтыса кельтћзы. Но йылпумъянъёс лэсьтон понна бюллетеньёсысь гинэ куараосты лыдъязы. Озьы туннэ тодмо: вормисьёс пӧлын удмурт кандидатъёс но вань. Кылсярысь, одӥг мандатъем округъя вормиз Пичи Пурга ёросысь «Надежда» хозяйствоен кивалтӥсь Бронислав Ясонов, со аслаз ёросаз ик бырйиськиз. Можга ёрос округын вормиз «Газпром» огазеяськонлэн Ижысь ёзэныз кивалтӥсь Алексей Вершинин, Вотка ёросын потӥз чорыг вордонъя «Пихтовка» хозяйствоен кивалтӥсь Георгий Крылов. Кизнерын ортчиз Удмурт театрен кивалтӥсь Андрей Ураськин. Якшур-Бӧдья округын потӥз гурт удысъя но сиён-юонъя министрлэсь ужзэ быдэсъясь Александр Прохоров но мукетъёсыз. Партилэн списокъёсызъя вормем кандидатъёс пӧлын но асьме выжыысь адямиос вань. Кылсярысь, «Удмурт Кенеш» огазеяськонлэн тӧроез Татьяна Ишматова, Шаркан ёросысь «Восход» хозяйствоен кивалтӥсь Анатолий Хохряков, «Удмурт Кенеш» огазеяськонлэн Можга ёросысь ёзэныз кивалтӥсь, «ЭнергосбыТ Плюс» огазеяськонлэн Можга ёросысь ёзэныз кивалтӥсь Эдуард Петров. Быдэс списокез учкыны луэ партилэн udmurt.er.ru сайтысьтыз. Зэм, Владимир Невоструев верамъя, список быръёнъёс дорозь воштӥськыны быгатоз на. Сое юнматозы июль толэзь кутсконын политсоветын. Отчыозь куд-огез вормем кандидатъёс, оло, Кун Кенешын ужаны мылкыдзылэсь куштӥськозы но.

Вормем кандидатъёс пӧлын трос 35 аресозь егитъёс. Калык соослы дурбасьтӥз, выльдӥськонъёсты возьмаса. Куд-огез Егитъёслэн парламентазы но ужамын ни, ассэ возьматыса вуттӥз ёросъёсын радъям пумиськонъёс дыръя но.

— Кун Кенеш ас ужзэ быдэстэ. Но солы выль шокчон кулэ. Выль омырез егитъёс гинэ вайыны быгатозы. Туннэ радъяно егитъёсын ужан политикаез, соя законъёс кылдытоно, — шуэ Нырысетӥ элькун больницаысь егит врач Алексей Бессонов. — Мон ачим 18 арес тырмеме дырысен быръёнъёсы ветлӥсько. Туэ но огсыр улон понна куараме сётӥ. Оскисько: сюресъёс гинэ уз выльдӥське, тазалыкез эмъян ӧре но воштӥськонъёс вуозы. Котькуд ёросын спортъя комплексъёс кылдысалзы ке, туж шумпотысал егитъёс понна. Милям Ленин ёросамы сыӵе объектъёс ӧвӧлгес.

Праймериз дыръя Алексей Бессонов Индустриальной ёросысь огаз участокын ужаз. Тазалыксэс эскерыны мед быгатозы шуыса, ёросысь 5 участокын Нырысетӥ элькун больницаысь врачъёс котькуд лыктӥсьлы дунтэк экспресс-диагностика лэсьтӥзы, направлениос сётъязы. Татысь калык аслэсьтыз депутатсэ — валтӥсь врачез Надежда Михайловаез — ӟеч тодэ, гажа. Соин ик уноез со понна куаразэ сётӥз.

Кун Думаысь депутат Валерий Бузилов  шуэ: устоосыз вормизы, табере асьмелэн ужпуммы — соосты быръёнъёслы дасяны. Кун Думаысь мукетыз депутат, Андрей Исаев, верамъя, праймериз юрттэ сыӵе адямиосты шараяны, кин зэмен ик калыклы кулэ. Мон ачим кылем арын Удмуртиын праймеризэ пыриськи, со дыр куспын шаерен но, калыкен но, татысь шуг-секытъёсын но матэгес тодматски, таин валче аслэсьтым ужан программаме тупатъяй, шуэ со. Зэмен ик, праймериз йылпумъяськиз ке но, депутатэ мыныны мылкыд карисьёслы та рос-прос ужаны кутскон гинэ.

Елена Сараматова

Туспуктэм басьтэмын Кун Кенешлэн сайтысьтыз

Удмурт Дунне
By Удмурт Дунне Июнь 1, 2017 12:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<