Пӧськыосты эскерон

Удмурт Дунне
By Удмурт Дунне 1 июня, 2017 16:52

Можга ёрос администрациын пумиськон

Кылем арня вискын Удмуртилэн Тӧроезлэсь ужзэ быдэсъясь Александр Бречалов котырскиз Можга палъёстӥ. Татын дэмен эскеризы, мар кароно ёросысь улон-вылонэз умоятон понна. Матысь аръёслы ужанъя аспӧртэм карта кылдытэмын.

 

Курка будэтон гуньдэмын

Кылем арын февраль толэзе Можга ёросысь Пычас черкогуртысь гурт калык ганяк шокчиз: татын сӥё-дано усьтӥзы курка (немыч) вордонъя, сӥлезлэсь сиён лэсьтонъя «Аскор» комплекс. Озьы куке-соку парсь вордонъя 13 бушам корпусъёс выльысь улӟизы. Ог 200 адямилы уж шедиз. Комплекс усьтонлы ик нуналъем 35 сюрс немыч вуттӥзы. Россиын со быдӟа комплексъёс ӧвӧлэн но калыклэн сюлэмаз ӟечезлы оскон кылдӥз. Гуртын пуктӥськон ик кутскиз. Специалистъёслы татын нимысьтыз общежитие лэсьтӥзы. Сӥль шаерамы вӧлмыны кутскиз. 2017-тӥ арлы татын чаклало вал 6 сюрс тонна курка сӥль поттыны. Но туннэ комплекс шуг-секытъёсын пумиськиз.

Россиын куркапиосты уг потто бере, Пычасэ соку гинэ ӵогиськем тылобурдоосты самолётэн меӵак Германиысь вуттылӥзы. Но табере отчы сюрес пытсамын. Россиын уго тылобурдо пыэд висён вӧлмыны кутскиз. Артысь Пичи Пурга ёросын карантин ялэмын ни. Озьы куркапиосты басьтыны луонлык быриз. Можга ёрослэн йырыз Аркадий Вершинин верамъя, 140 мурт ужтэк кыльыны быгатоз. Та пумысен ёросысь уже интыянъя центре но ивортэмын ни. Гуртоослэн алигес гинэ ужаны мылкыдзы ӝутӥськиз вал, умой уждун басьтыны кутскизы. Ёрос понна та бадӟым шуккет, шуэ Аркадий Вершинин.

Югдурысь потыны амал вань: Пычасын инкубатор лэсьтон пумысен вераськонъёс нуисько.  Соку куркапи вуттонэн курадӟонъёс бырозы, пуззэ гинэ на вайыломы,  шуэ Аркадий Вершинин.

Александр Бречалов верамъя, котькуд ужбергатӥсь понна нюръяськоно. Солы ужаны луонлык кылдытоно. Соин ик туннэ «Аскор» комплекслы юрттон пумысен ужпум пуктэмын. Валтӥсез — калыкез ужысь кулэстыны уг яра, шуиз Александр Бречалов.

2 ар талэсь азьло ворсаськиз федерал трасса котырысь тюрьма. Туннэ 30 гектар вылэ интыяськем объектъёс буш сыло. Нош отчы ву но, шуныт но кыскемын. Аркадий Вершинин верамъя, татчы инвесторъёсты возьмало, оло, соос выль улон шокчытозы шуыса. Ёросысь Бадӟым Уча гуртэз, кылсярысь, юнматӥсь сюриз ук. Туннэ гуртысь аналтэм  спортзалэз тупатъяло, отчы вуз каронэн но переработкаен герӟаськем объект лэсьто.  Инвестор огкутскемен котырысьтыз нылпи площадкаез но выльдэ ни. Ёрос бюджетысь талы одӥг копейка но висъямтэ.

 

Шуг-секытъёсты висъян

Можгалась огез бадӟым предприятие — пияла посуда лэсьтонъя «Свет» завод.  Россиысь рынокын та предприятилэн вузэз 5 процентсэ басьтэ. Завод посудазэ Германие, Казахстанэ но мукет интыосы келя. Озьы араз 600 миллион посуда поттэ. Пичи духи посуда но, бадӟым графинъёс но ӵыжато. Та бордын сюрслэсь трос адями тырше. «Светэн» кивалтӥсь Владимир Кусков верамъя, заводлэн эшшо но азинскыны луонлыкъёсыз но, площадкаосыз но, выль проектъёсын вырыны мылкыдъёсыз но вань. Бадӟым инвестпроектлы миллиард манет поныны завод дась. Александр Бречалов заводлэсь мылкыдъёссэ умоен лыдъяз, быгатэммыя юрттомы, шуиз. Таин валче заводэтӥ котырскиз, ужасьёсын кенешиз. Матысь дыре проект сярысь пыр-почгес тодыны луоз.

Нялтас вераса, Можга городын туннэ трос быдэстоно ужпумъёссы. Александр Бречалов верамъя, югдурез котыр ласянь эскерон вылысь матысь дыре татын ужалоз нимысьтыз группа, отчы пыро юристъёс, экономистъёс, аналитикъёс. Можга городлэн йырыз Алексей Шишов верамъя, сэрттоно-пертчоно шуг-секытъёс куиньлы люкемын. Нырысь ик басьтӥськоно вуэз но канализациез сузянъя сооружениос лэсьтон борды. Можгалан вань кырсь ву сузятэк кошке. Та инкуазьлы бадӟым изъян вае, шуэ Алексей Шишов. Отӥяз басьтӥськыны медо сюресъёсты тупатъян борды. Пыдын ветлон сюресъёс татын 1976-тӥ арысен выльдымтэ. Туннэ городын 8 школа ужа. 9-тӥзэ али ӝуто. Со чакламын 825 интылы. 1-тӥ сентябрьлы вуттыны чаклало. Но таин гинэ тырмыт ӧвӧл. Алексей Шишов верамъя, тросэз нылпиос 2-тӥ сменаын дышетско. Соин ик вуоно арын эшшо одӥг школа лэсьтон борды басьтӥськытэк ӧвӧл.

 

Саклык — дышетӥсьёслы но эмчиослы

Александр Бречалов котырскиз Можга педколледжетӥ но. Татчы сое вуттӥз «Удмурт Кенеш» огазеяськонлэн ёросысь ёзэныз кивалтӥсьлэн Эдуард Петровлэн вазиськонэз. 20-тӥ мае А. Бречалов «Удмурт Кенешлэн» азьветлӥсьёсыныз пумиськылыкуз Эдуард Степанович сюлэмшугзэ вераз дышетонъя юртлэн вужмемез ласянь. Юртлы уго 90 ар ни, нош рос-прос выльдонэз-тупатъямез со кемалась ӧз адӟылы.  Вылтусыз палэнысен чебер адӟиське, но фундаментэз лябӟемын.

Александр Бречалов верамъя, таиз шуг-секыт туннэ ик лэсьтоноосыз пӧлысь ӧвӧл. Юрт ярамон на. Озьы ке но быдэстоно ужпумъёс пӧлы сое пыртӥмы, шуиз Тӧролэсь ужзэ быдэсъясь. 2020-тӥ арын Удмуртилэн кунлык басьтэмез дырысен 100 ар тырме. Нош Можга педколледж национальной кадръёсты дасянъя огез кебит луэ. Соин ик сое тупатъян-выльдон объектъёс пӧлы пыртыны быгатозы. Огез тодмо: педколледж ас понназ уз кыльы. Книга-тетрадьысен кутскыса аппаратура басьтонозь юрттомы, шуиз Александр Бречалов. Шаерамы нырысь ик саклык висъяськоз дышетӥсьёсты но эмчиосты дасянъя заведениослы.

Нялтас вераса, Можгалан спортлы но бадӟым инты висъялозы. Кылсярысь, городысь хоккеен шудонъя «Луч» команда ёрме умой йӧ катоклы, ӟеч площадкалы. Инты шедьтэмын ни. Объектэз одно ик пуктомы, тыршомы сое вуоно сезонлы усьтыны, шуиз Александр Бречалов.

Елена Сараматова

Удмурт Дунне
By Удмурт Дунне 1 июня, 2017 16:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<