Ожо-вожо: Алнаш ёросысь Чем-Куюк школаысь пиналъёслэн ужъёссы

Удмурт Дунне
By Удмурт Дунне Июнь 13, 2017 15:19

Малпаськомы вал арама будэтыны…

Одӥгаз шулдыр тулыс нуналэ ми быдэс классэнымы но биологиен дышетӥсенымы шур дурамы писпу мерттӥмы. Но кинлэн ке киосыз лыдо вылэм, лэся, — вань будосъёсмес ишкам.

Ми Славик эшеным азьлапал бадӟым тыпылэн выжыысьтыз пушъетъёссэ дасямы вал, соосты мерттомы шуыса. Тыпы арама будэтэммы потӥз. Басьтӥськимы уж борды: Славик гоп лэсьтылӥз, мон писпу выжыез сюен согылӥ. Вань эшъёсынымы ӵош шулдыр ужамы. Удъёсмы медаз шуялэ шуыса, выжы котыръёссэс лымыен шобыртӥм. Вуоно нуналаз чакланы лыктӥмы: будосъёсмы чорк-чорк сыло, куасьмиллямтэ. Славикен син азямы пуктӥмы ни вал: аръёс ортчыса, татын чебер но ӝужыт тыпыос ӝужалозы. Арня ортчыса, будосъёсмес эскерыны нош вуимы. Нош отын…

Эшеным йыркурен дышетӥсьмы доры бызимы, ӝожомеменымы вераммы но уг луы ни. «Одӥг мерттэм писпумы но ӧвӧл ни!» — паймиз дышетӥсьмы но, шур дуре вуыса.

Кинлэн киыз пырем пичи тыпыосты ишкалляны? Быдтыны-тарканы каньылгес, мар ке ӟечсэ лэсьтон сярысь! Малпаськомы вал, со батыр тыпыос шур дурез шулдыртозы, отын тылобурдоос каръяськозы, пи поттозы… Векчи уд йӧн-йӧн писпу луытозь, кӧня дыр ортчыны кулэ! Адямилэн инкуазьлэсь басьтэмез гинэ потэ, солы номыр сётытэк. Котькудмы улытозямы одӥг писпу ке но мерттысалмы ке, кӧня пайдазэ лэсьтысалмы!

 Коля Соснов

 

Лӥялъёсты улӟытӥмы

Кылем гужем школаямы шутэтскон лагерь ужаз. Отын дышетӥсьёсмылэн Елена Смирновалэн но Наталья Бикбашевалэн ӵектэмзыя «Куасьмем писпуослы выль улон» вожвылъяськон ортчытӥмы.

Школа котырысьтымы 7-8 кызьпуосты погыртӥзы вал. Бервылазы кылем лӥялъёсты «улӟытоно», шуим.

Со понна кин мар но ӧз вайы: вуж тюльёс, майонез ведраос, пӧртэм буёло пытсэтъёс, чыры-пыры арбериос трос гинэ люкаськизы. Ми кӧня ке эшъёсыным лӥял вылэ шляпа юнматӥм, бордаз тюльлэсь йырси тэчим, пластик ӟенелик нырлы яраз, басмалэсь мыйыкъёс но ым лэсьтӥм. Ужмы туж тумошо пӧрмиз, солы «Грузин» ним понӥм. Эшъёсмылэн но киужъёссы тунсыкоесь луиллям.

Лӥялъёсты «улӟытэммы» бере милемыз нылпи садэ ветлӥсь пичиос котыртӥзы. (нылпи садмы но школа одӥг юртын интыяськемын). Соос туж шумпотӥзы, азбарез тазьы улӟытыны быгатӥмы шуыса. Быдэс гужемзэ отын шудӥзы, одӥгзэ но ужез ӧз тӥялэ. Нош милям, котырмес чебергес каримы, мукетъёсызлы ӟеч уж лэсьтӥмы шуыса, мылкыдмы ӝутӥськиз.

Лиза Афанасьева

 

Ӟеч лэсьтыса жадёно ӧвӧл

Одӥг нуналэ лавка бордысьтымы ялонэз адӟи. Отын вань гурт калыклы вазиськемын вал, утялтӥськон ужрадэ потыны курыса.

Мынам но эшъёсыным котырмес чылкытатыны мылкыдмы ӝутӥськиз. Верам нуналэ, мажесъёс кутыса, ульчае потӥм. Трос ик калык ӧз люкаськы, котькудӥз аслаз урамаз утялтӥськиз. Одӥгъёсыз жуг-жаг бичазы, мукетъёсыз сое мешоке тыризы. Ми эшъёсыным Байканюк котырын мажсаським. Вань люкам жагмес гуртын улӥсь воргоронлэн, Толя агайлэн, уробояз тыримы. Ужаса чик ӧм жаде.  Утялтӥськеммы берегес ик зор усиз. Ӵуказеяз ульчае потӥ но шумпотӥ: турын-куар вожектэм, шунды пиштэ, нош нылпиос куаныса шудо. Табере милям гурт котырмы чылкыт но чебер луиз.

Жанна Драгомирова

 

5 тыпы мерттӥм

 

Гуртамы ӵыпетмы вань. Соин ми туж данъяськиськом. Атаеным кенешимы котыраз писпуос мерттыны.

Бакчаямы тыпы кидысъёс кизимы вал, соос ӵогыр гинэ потӥзы. Атае шуиз, татын соослы ӟоскыт потоз, тыпылы вӧл-вӧл инты кулэ. Соин пушъетъёсты ӵыпет дуре вайимы. Атае гоп лэсьтылӥз, мон тыпы удэз сюен согылӥ, ву кисьтай. Озьы ӵыпет котырамы табере 5 тыпы будэ. Кыӵе шумпотӥсько, мон но инкуазьмы понна пичи ке но ӟечсэ лэсьтыны быгатӥ шуыса. Писпуэз погыртыны кема ӧвӧл ук, нош солы будыны кӧня ар кулэ!

Настя Титова

 

Пужымъёслэн мадьзы

Ми дас пужымъёс-вынъёс, будӥськомы Котэгъясь нюкын вашкала вӧсяськон интыын. Иземысь вазенгес сайкамы ни. Турын-куар кӧлэмысь бергес султӥз, угось та нюкын лымы кема возиське. Вӧзамы вӧл-вӧл гырем бусы. Палэнынгес, возь вылын, мӧйы беризь будэ. Татын куке но вашкала дыръёсы Бусы вӧсь ортчылэм. Ю-нянь мед удалтоз шуыса, тылоос чуньы вӧсяло вылэм. Но ми трос вераны ум тодӥське. Угось татчы выжы лэземмылы 4 ар гинэ ай.

Нош будӥмы ми палэнын, Ӟатча сюрес дурын. Анай-атайёсынымы валче сюрес кузя радэн-радэн ӝужаськомы вал. Но дырын-дырын тыл кыскисьёс эшъёсмес кораллязы, тыл езъёслы люкетӥськом шуыса, пичи пушъетъёсты пудоос лёгаллязы.

Одӥг нуналэ ми доры мӧйы кышномурт нылашен вуизы. Милемыз выжыетӥмы ик поризы но уробоязы тыризы. Гурт сьӧртӥ ортчыса, ог 3 иськеме палэнэ мерттӥзы.

Табере ми будӥськомы ошмес вӧзын. Гуртоослэсь кылӥськом, вуэз юзмыт, ческыт шуыса. Ошмес котырын писпуос азьвыл ӧй вал. Соин пӧсь гужемъёсы ошмес син куасьмон калэ вуылэ, пе. Татысь тросэз ошмесъёс таин валче быриллям ни. Соин Настя нылаш песянаеныз, милемыз татчы мерттыса, ошмессэс утьыны малпазы. Азьвыл татчы кызъёс мерттылӥллям вылэм ни, но соос улӟиллямтэ. Соин милемыз ӵем эскерыло, котырысьтымы жагез калто.

Улон интымес воштэммы пумысен ум куректӥське ни. Вӧзамы ик  бадьпуос ӝужало, палэнынгес — улмопуос. Одӥг-ог нюлэскысь ми дӥне койык поталля. Бадьпу пушъетъёсын кӧтсэ тыре, ошмес вуэн сюзэ юзматэ. Боры кисьман вакытэ ми доры трос пиналъёс лыкто.

Настя Смирнова

 

 

 

 

 

 

Удмурт Дунне
By Удмурт Дунне Июнь 13, 2017 15:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<