Можга ёросысь Бадӟым Учаын ужало пӧртэм лагерьёс

Удмурт Дунне
By Удмурт Дунне 14 июня, 2017 10:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Можга ёросысь Бадӟым Уча гуртын трос нылпиё, начар улӥсь семьяосысь нылпиос понна усьтӥськиз ужан лагерь.

Школа бордын туэ, ужан лагерь сяна, мукет лагерьёс но ортчытыны чакламын. Кылсярысь, ёросысь тужгес усто дышетскись 40 пинал понна компьютерен ужаны дышетсконъя, программаос лэсьтонъя смена радъяськоз. 50 пиналлэсь тазалыксэ юнматозы на.

— Быдэс гужемзэ мар карыса коркан пукод? — шуэ 8-тӥ классэз йылпумъям Эдуард Ульянов, кияз тӥр но молот кутыса. Ас киыныд быдэс гурт понна маке лэсьтэм весяклы кылёз. Лагере ветлӥсь эшъёсыным школа азе быдэс класс тэрымон беседка ӝутыны кутскимы. Пӧсь шунды но уз суты, зор-кот но уз йӧты, тӧл но уз шуккы. Эсьма, школа азбармы но чеберскоз. Ужаммы понна эшшо ке уждун тыром, шуо на, 3 сюрс манет котыр. Но лагерь бырем бере гуртысьтымы «Россия» хозяйствое но курисько на. Озьы гужем ӵоже люкам уксёеным спортинвентарь басьтыны быгато. Мон волейболэн но капчи атлетикаен вырисько. Капчи атлетикая нимысьтыз команда но кылдытӥмы ни. Ёросын ортчем «Шиповка юных» ӵошатсконын 3-тӥ интые потӥмы. Вормонъёс вань дыръя спортэн эшшо но золгес вырем потэ.

Ужан лагере 9 пияш но 1 нылаш ветло. Нырысь-валысь лагере гожтӥськисьёс трос ӧй вал. Но проектэз адӟемзы бере отчы сюрон понна пиналъёс куспын вожвылъяськон пуромиз.

— Луонлык кылдысал ке, ваньзэсты но кутысалмы, — шуэ Бадӟым Уча шор ёзо школалэн директорезлэн воштӥсез Ольга Ульянова. — Но проект 10 нылпилэсь улон-вылонзэ капчиятон вылысь чакламын. Татын уждун но басьтозы, нуналаз 2 пол кӧттыро сиськозы но шуыса малпамы. Собере, пиналлы одно ик 14 арес тырмемын луыны кулэ вал. Покчиосыз уж шедьтыны шугъясько бере, соослы ик бадӟымгес саклык висъяно кариськимы.

Школае вуылӥз Удмуртилэн Тӧроезлэсь ужзэ быдэсъясь Александр Бречалов.

Малы дугдӥзы беседка лэсьтон вылэ? Ольга Станиславовна верамъя, нылпиослэн технология дышетӥсенызы Аркадий Ларионовен кемалась ни школа понна маке лэсьтэмзы потэ вал. Азьвыл ужан лагерьёсын сад-бакчаязы емыш, сад мерттылӥзы. Таяз радэ пуэн ужано кариськизы. Эсьма, тулыс — сӥзьыл беседкаын урокъёс но ортчытъялозы — шуныт вакытэ классын пукем уггес поты уго. Зэм, материалэн шуг-секытъёс кылдыло на. Дуныз 12 сюрс тыр усе бере, школалэн тамында коньдонэз ӧвӧл. Но спонсоръёс сюро. 9-тӥ классын дышетскись пиналъёслэн анай-атайёссы ик пуэн юрттон вылысь уксё бичазы. Та соослэн школалы кузьымзы луиз.

Туннэ нылпиос беседка улысь музъемзэ дасязы, школалэн вуж гаражезлэсь кирпичсэ тазатӥзы но сое фундаментлы нуллӥзы. Каркассэ кортлэсь ӵыжатӥзы атайёссы ик. Озьы дэмен шулдыр ужало. 18 нунал ӵоже йылаз-пумаз вуттыны чаклало.

— Нылпиосмы 8 час 30 минутысен ужаны вуо ни, — веранзэ азинтэ Ольга Станиславовна. — Но весь ужало шуыса, эн малпалэ. Нуназеямзы бере соос понна хозяйствоетӥ экскурсиос радъяськомы, ӵошатсконъёс ортчытъяськомы.

Школа бордын туэ, ужан лагерь сяна, мукет лагерьёс но ортчытыны чакламын. Кылсярысь, ёросысь тужгес усто дышетскись 40 пинал понна компьютерен ужаны дышетсконъя, программаос лэсьтонъя смена радъяськоз. 50 пиналлэсь тазалыксэ юнматозы на. Озьы Бадӟым Учаын оглом 100 пинал шутэтскоз.

Елена Сараматова

Туспуктӥз Э. Карипов

 

 

 

 

 

 

Удмурт Дунне
By Удмурт Дунне 14 июня, 2017 10:41