Мон вамышъяй Горд карлудэтӥ!

Удмурт Дунне
By Удмурт Дунне Июнь 14, 2017 15:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Парадэ пыриськеме понна монэ данъязы кык медален. Табере мон эшшо но зол шумпотӥсько: службае туж умой ортче.

Кылем арын 9-тӥ Мае мон нырысьсэ, рос-прос телевизор азе пуксьыса, кутсконысеныз пумозяз учки Вормонлы сӥзем парадэз. Тодыса, лэся: гужем армие мыноно луоз.

Соку мыным туж яразы ВДВ-ос, малы ке шуоно соос шоры ваньзы данъяськыса учко, десантникъёс армиын котьку вал «элита». Но эшшо но золгес мон синмаськи морской пехотинецъёслы. Мыным соку туж кельшиз соослэн сьӧд дӥсьсы, китель улын — тельняшка, сьӧд беретлэн урдэсказ — якорен горд флажок. Армие морской пехотае сюрыны мылкыды кылдӥз, эшшо тодӥ: соос зарезьысь но, инбамысь но десантироваться карисько.

Но, малпай мон, элитае сюрыны туж ик капчи ӧвӧл. Соин ик та «льӧль малпанъёсме» вунэтоно — служить кароно ини отын ик, кытчы келялозы.
Нош келязы монэ — марлы мон туж пайми но шумпотӥ — Новосибирскысь ГРУ-лэн спецназэзлэн дышетон центраз. Татын ик вылӥ военной училище вань, отын офицеръёсты дасяло. Ӝыны ар дышетскыны туж секыт вал, но мон кызьы ке чидай. Дыр вуиз мукет часте выжыны.

«Учебкаын» дасямзы бере милемыз келяны кулэ вал спецназ бригадаосы, нош кинлы ӧз удалты — огшоры батальонъёсы но бригадаосы. Мон пумозяз тодытэк улӥ: кытчы монэ келялозы. Тани ротаысь кылимы 6 адями, малпай вал ни, Новосибирске ик кельтозы шуыса. Но келязы милемыз, ротаысь 3 адямиез, Балтийскысь морской пехоталэн 336-тӥ бригадаяз! Мон туж шумпотӥ, службае туж тунсыко пӧрме шуыса. Татчы вуэме бере тодӥ на, ӵапак та бригада 9-тӥ Мае Вормонлы сӥзем парадэ пыриське шуыса, сое ик мон телевизор пыр 2016-тӥ арын 9-тӥ Мае адӟиськем вылэм. Нош 2017-тӥ арын 9-тӥ Мае мыным аслым кылдӥз ортчыны Горд площадетӥ.

Тулыспалэ быдэс бригадаысь 440 адями люказы — таос Москвае парадэ мынозы. Озьыен, дасямын вал 2 строй, котькудаз 200 адями, вӧзаз — 20 запасной. Южтолэзе уйин ми лобӟим Звенигородэ. Мукет нуналысен ик кутскиз парадлы дасяськон. Нырысь вал туж секыт, висьыны уси, температурае ялан ӝутске.

Каллен йӧнатӥськи, тренировкаослы дыши. Арняяз 3 пол люкаськылӥмы  «Алабино» полигонэ. Отын ми адӟылӥм ни мукет  войскоосты, техникаез, авиациез. Котькуд матрослэн вал одӥг мылкыдыз — тренировкаосты келлятэк, висьытэк, вань кужмысь тыршоно. «Ожмаськон» вал туж зол, нокинлэн но уг поты запасное кылемез. Нош таослы эшшо но  секытгес йӧтӥз, малы ке шуоно Горд площаде, оло, уд но ортчы, нош дасяськоно ваньмыз кадь ик. Троссэ адямиосты воштӥзы — кин висьыны усиз, кинлэн кужмыз ӧз тырмы. Мон чидай, озьы ик кыли 1-тӥ стройысь 6-тӥ шеренгась 9-тӥ колоннаын.

Вуиз кема возьмам 9-тӥ куартолэзь. Зэмзэ верано ке, парад ортчиз огшоры репетиция кадь. Куазь вал туж кезьыт: Россилэн Президентэз вераськыны кутскыку, ми ваньмы дырекъяса сылӥськом вал ини. Вӧзам сылӥсь эшелэн куалекъянъяз медальёсыз ик жингыртылӥзы. Дыр вуиз трибуна азьтӥ ортчыны. Мыныкум мон кема ӧй малпаськы ни, кызьы дышетӥзы, озьы ик ортчи: бур палась ньылетӥ гадь шоры учконо, ангесэз ӝутоно, пиньёсты адӟытыса, мыняно. Ваньзэ тае чакланъям Президент но, ветеранъёс шоры но учкыны вунэтӥськем.

Озьы ке но мылкыд верантэм пачыла, куке тынэсьтыд бригададэ быдэс площадь тыр верало, тон данъяськыса ортчиськод трибунаос вӧзтӥ, тодӥськод: тонэ адӟе быдэс дунне но гуртын телевизор пыр учко анай но атай.

Ортчим, тау Инмарлы, туж умой. Россилэн Президентэз но обороная министр бригадамылэсь командирзэ пумиськыса ик ӟечкылаллям, ушъяллям.

Эшшо паймытӥз на — вань ульчаосын, выжъёс вылын кузьыли мында адямиос милемыз пумитазы, киосынызы шонаса. Ми но соослы ваньзылы тӧдьы перчаткаосынымы шонамы, оркестренымы ӵош кырӟаса вӧзтӥзы ортчимы. Калык милемыз пумитаз но келяз ожысь бертэм адямиосты яке тодмо артистъёсты кадь.

Парадэ пыриськеме понна монэ данъязы кык медален. Табере мон эшшо но зол шумпотӥсько: службае туж умой ортче. Толэзь ортчыса, капчи мылкыдын берытско ни Удмуртие, вордӥськем палъёсам.

Алексей Пикулев

Удмурт Дунне
By Удмурт Дунне Июнь 14, 2017 15:51 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<