Камбаркаын нылпиос быризы, Вуж Юбераын книгаен тодматскизы, Алнашын валэн ворттылӥзы

Удмурт Дунне
By Удмурт Дунне Июнь 16, 2017 16:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Алнаш

Валэн ворттылӥзы

Ёросысь Гыронбыдтон шулдыръяськон дыръя валэн ворттылонъя ӵошатскон ортче.

Таяз учыре вожвылъяськонэ 30 мурт пыриськиз. Тужгес трос спортсменъёс люкаськизы суро выжыысь валъёсын ворттылонэ. Вормисе потӥз Грак ёросысь Алексей Леонтьев. Отӥяз старт сётӥзы ӟеч выжыысь валъёсын ворттылӥсьёслы, вормиз Можгаысь Марат Гарифуллин. Араб выжыысь валъёсын ӵошатсконын котькинлэсь сэзь луэмзэ возьматӥз Пичи Пурга ёросысь Леонид Трофимов. Отӥяз кужымзэс эскеризы ужась валъёс. Таяз учыре кужмогес луиз Алнаш ёросысь Андрей Поляков.

Кез

Паспорт басьтӥзы

Россилэн нуналаз Кез каргуртысь адӟем карымон пиналъёслы паспорт сётӥзы.

Дано нуналэ 14 аресъем нылпиослы паспорт сётон сярысь ӵектонэн потӥз ёрос администрациысь егитъёсын ужанъя ёз. Ӟеч дышетскись 4 пиналлы (Софья Антоновалы, Егор Агафоновлы, Станислав Патраковлы но Ян Юферевлы) паспорт сётӥз Югдурез утёнъя министерствоысь миграцияя службалэн Кез ёросысь ёзэныз кивалтӥсь Александр Попов.

Пичи Пурга

Нылпиос сӧсырмизы

Елабуга-Пермь сюреслэн 112-тӥ иськемаз, Эдэйгурт вадьсын, кылем арнянуналэ шуккиськон учыр вал.

2 мурт быриз, эшшо 3-ез сӧсырмизы. «Лада Гранта» машиналэн кудӟем кузёез, мынон-ветлон куронъёсты тӥяса, пумит лыктӥсь машинаослэн сюрес вылазы потэм но микроавтобусъёсын шуккиськем. «Ладаын» пукисьёс быризы, нош микроавтобусъёсысь адямиос пӧлысь 3-ез сӧсырмизы. Кызьы вераз ГИБДД-я управлениысь ёзэн кивалтӥсь Вениамин Вычужанин, автобусын вылӥллям Пермьысь картинг-клубе ветлӥсь нылпиос, соос берто вылэм Набережные Челны городын ортчем ӵошатсконысь.

Грак

Сюрес выльдӥське

Грак ёросын кема возьмам сюресэз лэсьтыны кутскизы. Со нуоз Пуклёысен Ӟанка гуртысь ӵыпет дорозь.

Чакламъя сюреслэн кузьдалаез 3 иськем 340 метр, пасьталаез 10 метр. Дураз ву кошкись интыос кылдыны кулэ. Лэсьтӥськон ужъёс борды нырысь ик басьтӥськиз бадӟым техника. Матысь дыре 56 сюрс кубометр музъем поттоно луоз. Сюрес лэсьтонъя управленилэн Грак ёзэныз кивалтӥсь Сергей Шустов верамъя, сюресэз шобыртозы луоен сурам щебенен. Ужъёсты йылпумъяны чакламын 20-тӥ сентябрёзь, сюрес лэсьтон 34 миллион манет тыр усёз.

Кияса

Диктант гожтӥзы

6-тӥ инвожое, Ӟуч кыллэн нуналаз, Киясаысь ёрос библиотекаын «Тотальной диктантлэн пытьыосызъя» акция ортчиз.

— Кылем арын ми таӵе ик акция ортчытӥмы ни вал, — вера Кияса ёрос библиотекалэн директорез Елена Михайлова. — Туж паймимы, акцие 20 мурт пала вуиз шуыса: библиотекамы бадӟым ӧвӧл.

Мылкыд карисьёс вал бере, библиотекаын ужасьёс туэ диктант гожтӥзы 8-тӥ апреле быдэс странаен ӵош, но доразы ог 10 мурт гинэ вуиз.

— 6-тӥ июне диктантэ киясаос малы ке тросгес лыкто, тани туэ но 20 пала вуизы. Шумпотымон, пӧлазы котькыӵе арлыдоез вал: дышетскисьёс но, студентъёс но, мӧйыос но, — шуэ Елена Михайлова.

Сарапул

Ялэмын карантин

Городын урмон висёнъя карантин ялэмын. Отысь одӥгаз хозяйствоын шараяськиз черлам пуны.

Кызьы иворто городысь Пудоез эмъянъя станциын, со хозяйствоын дезинфекция ортчытэмын, котырысьтыз мукет  хозяйствоосысь пуны-коӵышъёслы, пудоослы дунтэк вакцина пуктылэмын. Соосты чакласа возёзы 60 нунал ӵоже. Али городын  пуны-коӵышъёсын адӟытонъёс ортчытъяны лэзьымтэ, озьы ик урамъёстӥ ас кожазы калтыртӥсь животъёсты кутыло.

Дэбес

Мушъёс кадь тыршо

Ёросысь 650 пала нылпиос школа лагерьёсын шутэтско.

Удмурт Льӧм, Бадӟым Ӟӧтым, Зар-Медло, Сюрногурт, Пыктыдур, Тольён, Аргурт, Варни, Четкер, Уйвай, Дэбес школаосысь лагерьёсын шутэтско но мугорзэс кыдато 612 нылпиос. Секыт югдуре шедем 20 пиналъёс понна ужанъя но шутэтсконъя лагерь усьтэмын егитъёслэн «Вертикаль» центразы. Кызьы ивортӥз та центрен кивалтӥсь Лилия Саламатова, пиналъёс нуналаз 1 час гинэ ужало: ульчаосты утялто, собере шудо, тазалыксэс кыдато. Со сяна, гужем ӵоже 60 нылпиос уже интыямын луозы на.

Красногорск

Ярушникен куноятӥзы

Кылем арняе Бараны гуртын ортчиз старообрядецъёслэн «Петровское заговенье» элькун фестивальзы.

Отчы вуизы Балезино, Кез, Якшур-Бӧдья ёросъёсысь, Киров, Пермь улосъёсысь кырӟась-верась коллективъёс. Ужрадэз ортчытӥсьёс куноосты ярушникен — чабей пызьлэсь нянь колдыен пумитазы, пиналъёс, ванё-буро улон сӥзьыса, ю тысен пазязы.

Тужгес устоез турнась луиз Пермь улосысь Дмитрий Трефилов. Тунсыко вожвылъяськон пуромиз воргоронъёс куспын: соос пызен мешок ӝутказы, пу пильылӥзы, кор вылын мешокъёсын жугиськизы, гозы кысказы.

Ува

Кузьым — мунё

Пу скульптурая паркын «Этно-шудон» ёроскуспо фестиваль ортчиз. Ужрадэ пыриськизы Ува, Сьӧлта но Вавож ёросъёсысь мунё лэсьтӥсь кибашлыос.

Фестивальын куролэсь, басмалэсь мунё лэсьтонъя 8 площадкаос ужазы. Вожвылъяськонэ пыриськемъёс пӧртэм номинациосын дипломъёс басьтӥзы: Сьӧлталась О. Русских, Ува ёросысь Жужгес гуртысь Р. Петрова, Вавож черкогуртысь Л. Касихина, Ува ёросысь Узей-Туклялась культура юрт, библиотека но мукетъёсыз.

Кибашлыос ужрадэ лыктэм калыкез удмурт мунё лэсьтыны дышетӥзы. Котькудӥз аслэсьтыз ужзэ кузьым чотын сьӧраз басьтыны быгатӥз.

Камбарка

Нылпиос быризы

Тылпу потыса, бырыны шедизы 3 но 5 аресъем пиналъёс. Соослэн анай-атайзы вылэ уголовной уж ӝутэмын.

Следовательёс тодӥзы ни: нылпиос асьсэ коже кельтэмын вылэм, анай-атайзы ӵукна ик кошкиллям, ӧссэс ӵогаса кельтӥллям. Со вакытэ 5 аресъем пияш но 3 аресъем нылаш тылын шудӥллям.

Туннэ нуналлы Уголовной кодексысь 109-тӥ статьяя (2 но солэсь тросгес муртэ малпатэк быдтэм понна) уголовной уж ӝутэмын. Эскеронъёс азинтӥсько, следовательёс та учыръя вань чыры-пырыосты тодыны туртто на.

Можга

Книгаен тодматскон

Вуж Юбера гуртын ортчиз «На земле первых коммунаров» книгаен тодматскон.

Книгаез кылдытон бордын тыршиз та гуртысь школаын азьвыл ужам дышетӥсь Анатолий Комаров но гуртын будэмъёс: журналистъёс Евгений Осипов (улонысь кошкемын ни) но Владимир Михайлов. Книгае пыртэмын «Трактор» но «Югдон» эштосъёслэн но татчы пырись гуртъёслэн, Александрово школалэн историоссы, та палась дано адямиос сярысь газет-журналъёсы печатламъёс но туспуктэмъёс, радиоверанъёсысь но телепередачаосысь геройёс. Ужрад йылпумъяськиз шулдыр концертэн, сое пуктӥзы асьсэос ик гуртоос.

Шаркан

Куртчид ке, кыл кут

Шарканысь Ленин ульчаын сылӥсь инспекторъёс машинаез дугдытӥзы вал…

Машинаез но водителез эскерон малпамтэ шорысь мукет пала берыктӥськиз. Руль сьӧрын пуке вылэм кудӟем воргорон. Инспектор документъёсты гожъян вакытэ водитель шуак  солэсь кизэ куртчем. Куртчылӥськись воргоронлэн табере кематэк руль сьӧры пуксемез уз луы: 1 но ӝыны арлы правотэк кылемын. 30 сюрс манет тыриськон лякем сяна, укылтэм водитель вылэ уголовной уж ӝутэмын на.

Удмурт Дунне
By Удмурт Дунне Июнь 16, 2017 16:20 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<