Камбарка: Поездэз воштэ… автобус

Удмурт Дунне
By Удмурт Дунне 9 июня, 2017 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмуртиысь иворчиос пресс-турен вуылӥзы Камбарка городэ. Шутэтскон вискын тодон-валан шыкыссэс узырмытӥзы. Шаерысьтымы тунсыко сэрегъёсын тодматскыны луонлык кылдытъя Удмуртиысь Журналистъёслэн огазеяськонзы.

Камбаркаысь машиностроительной завод.

Камбарка берло дыре пель сьӧрын ӵемысь чузъяське — Кам шур вамен выж кылдӥз. Отӥ машинаос ворттыло ни, но лэсьтӥськон йылаз-пумаз вуттымтэ ай. Паймытӥз выль выжлэн быдӟалаез — со туж кузь вылэм.

Город шуиськод ке, син азе трос этажъем юртъёсын, паськыт сюресъёсын инты пуксе. Нош Камбаркаын чылкак мукет суред: сюбег ульчаос, котыр огшоры гурт коркаос — ӝужыт юртъёс син азе ик уг сюро.

Городэтӥ экскурсия ортчытӥзы Камбаркаысь эшъёсмы — «Камская новь» газетысь журналистъёс. Соос тодматӥзы купец юртъёслэн архитектураенызы, Дун-чылкыт Богородицалэн черкеныз. Ёрослэн туннэ нуналыз сярысь вераз ёрос администрациын ужась Константин Дьяков. Пайдаё пӧрмиз Камбаркаысь машиностроительной заводэн тодматскон. Сое Кам шур дуре Демидов ужбергатӥсьёс 1767-тӥ арын пуктӥзы. Соку татын корт ӵыжатӥзы, нюлэс дасянэн выризы. Та вакытэ заводын тепловозъёс, вагонъёс потто. Тунсыко, Россиын, Камбаркаын сяна, сюбег чугун сюресъёслы тепловозъёс бичась мукет завод ӧвӧл ни. Соин татын поттэм вузъёс быдэс кунэ вӧлмо, тепловозъёсты ӵемгес басьто торф поттӥсь предприятиос. Татын ар ӵоже ог 30 сыӵе машинаос лэсьтӥсько, озьы ик паськыт чугун сюресъёслы тепловозъёс бичало — таоссэ ар куспын 10 пала.

Заводын та дыре ог 10 цехын 315 адями ужа. Егитъёссы ӧжыт ӧвӧл. Инженеръёсты, конструкторъёсты будэтэ татысь ик машиностроениея колледж, берло соос тодон-валанзэс паськытато Ижысь техникая университетын. Вузэз йылпумъяса, берыктӥсько вордӥськем городазы. Николай Ларинэз но яратоно городэз бордаз кыскиз, али егит мурт заводын валтӥсь технолог. Ӵапак со ик тодматӥз заводлэн ужаменыз.

Со верамъя, ог 2-3 ар талэсь азьло заводын выль удыс усьтӥськиз. Быдэс Россиын кризис кутскемен, заводын потӥсь тӥрлыкез басьтӥсьёс синӥзы. Соин татын мувӧй поттонын кутӥськись тӥрлык бичаны ӧдъязы. Озьы ик татысь конструкторъёс 2011-тӥ арысен рельсаос кузя ворттылӥсь автобус кылдытон бордын ужало. Та дырлы одӥг автобус бичамын. Эскерон вылысь со вуылӥз ни Коломнаозь, ужа умой — коть али ик сюрес вылэ потты. Журналистъёслы удалтӥз автобусэ пыраны. Пушказ вӧл-вӧл, 32 пукон интыез. Автобуслэн дуныз 32 миллион манет.  Со быдэсак импортозамещение улсын асьме дорын лэсьтэм оборудованилэсь бичамын, куд-ог электроникаез гинэ ке шат кунгож сьӧрысь. Машина чылкыт дизель топливоен ворттылэ, со инкуазез уг кырсёмыты, дунтэм. Ваньмыз умой радъяськиз ке, Камбаркаын поттэм автобусъёс матысь дыре Россиысь городъёсты ог-огенызы герӟалозы, шуиз Н. Ларин.

Экскурсия бере кыллы усточиос кибашлы луэмзэс но возьматӥзы. Шаертодонъя музейлэн кивалтӥсез Марина Бутковская соосыз ыж гонлэсь суред гындыны дышетӥз.

Шуныт мылкыд кельтӥз Комаровские пруды шутэтскон сэрег но. Отчы трос адямиос чорыганы, ял карыны вуыло. Солэн кивалтӥсез Собед Шайсутдинов журналистъёсыз чорыг лымен но ческыт чаен куноятӥз.

Ангелина Снигирёва

 

Удмурт Дунне
By Удмурт Дунне 9 июня, 2017 17:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<