Калыклэсь юалозы

Удмурт Дунне
By Удмурт Дунне 1 июня, 2017 13:26

Бюджет пумысен малпанъёссэ вера калык

Кызьы кутӥськиз 2016-тӥ арын бюджетысь коньдон? Кыӵе тырмымтэос шараямын, кызьы соосты лыдэ басьтоно, выль бюджетэз кутыку? Та пумысен Кун Кенешын нырысьсэ радъяськизы калык кылзонъёс.

Залысен сяна, адямиос быгатӥзы министръёслы юанъёсын вазиськыны Интернет пыр — кылзонъёс онлайн амалэн ортчизы. Кун Кенешлэн Тӧроез Владимир Невоструев верамъя, калыклэн мылкыдыз, югдур шоры учконэз ужаны туж юртто. Кыӵе ке удыслы, оло, саклык уггес тырмы, ӵапак адямиос со тырмымтэос сярысь вераны быгато.
Валтӥсь министерствоос ужамзы сярысь веразы. Коньдон ужпумъёсъя министрлэсь ужзэ быдэсъясь Станислав Евдокимов пусъемъя, 2016-тӥ арын республикалэн казнаяз 63 миллиард 90 миллион манет доход вуиз, 2015-тӥ арен ӵошатыса, со 13 процентлы уногес. Бадӟым предприятиосысь выт уногес лыктӥз. Огъя расход люкетэз 70 миллиард 241 миллион манет вал. Та пӧлысь 60 процентэз кошкиз социальной гарантиосты быдэстонлы, калыклы улон-вылонын юрттэт сётон, тазалыкез эмъян но мукет удысъёслы. Кылсярысь, дышетон удыслы висъяськиз 20 миллиард манет. Бюджет удысын тыршисьёслы вань расходъёс пӧлысь 38 процентэз кошкиз уждун тыронлы.
Экономикая министрлэсь ужзэ быдэсъясь Михаил Зайцев верамъя, 2016-тӥ арын тужгес бадӟым барыш поттӥзы промышленность но гурт удыс. Санкциосын сэрен шуг-секытъёс адӟимы ке но, уноез предприятиос выль сямен ужаны дышизы. Бюджет оглом умой быдэстэмын, шуиз Кун Кенешлэн Тӧроезлэн воштӥсез Софья Широбокова.
Зэм, кылзонъёсы пыриськисьёс 2016-тӥ арлэн бюджетэз пумысен гинэ ӧз юалляське. Туннэ нунал сярысь но ужпумъёсты ӝутӥзы. Кылсярысь, музейёсын ужез радъянлы бадӟымгес саклык висъяны куризы. Ижысь Иван Пастуховлэн музей-коркаез куашкан калэ вуэмын. Сое тупатъян-выльдон понна ог 4 миллион манет кулэ.
Гуртоосты сюлмаськытэ хозяйствоосын кадръёслэн тырмымтэзы. Югдурысь потон вылысь зоотехнике но агрономе дышетскисьёслы ватсаса стипендия тыриське, гурт удысъя академиез быдтэм но гуртэ ужаны лыктэм специалистъёслы 200 сюрс манет подъёмной сётӥське. Но та тырмыт ӧвӧл. Гурт удысъя но сиён-юонъя министрлэсь ужзэ быдэсъясь Александр Прохоров ӵектэ та лыдпусэз 500 сюрс манетозь вуттыны.
Миым шаерамы 26 фельдшер-акушер пункт пуктӥзы ке но, вань ёросъёсын соос ӧвӧл на. Кылсярысь, Дэбес ёросэ 1 ФАП но ӧз вуы. Туэ но со чакламтэ. Кивалтӥсьёс кылзонъёс дыръя оскытӥзы: 2018-тӥ арын ёросэ 2 ФАП пуктозы.
2018-тӥ арлы бюджетэз чаклаку но, кылзонъёс дыръя калыклэсь мылкыдзэ юалозы — озьы куре закон.

Елена Сараматова

Удмурт Дунне
By Удмурт Дунне 1 июня, 2017 13:26