Иж тыметэ вуэм шормуӵез пыргытозы

Удмурт Дунне
By Удмурт Дунне 5 июня, 2017 15:55

Кылем арня вискын Ижын улӥсьёсты паймытъяз Иж тыметын кылдэм музъем кесэг. Табере специалистъёс сое ог 2 арня ӵоже пыргытыны вырозы.

Музъем кесэг плотина пала мынӥз ке, ву кошкон пасез ӵоктаны быгатоз.

Нырысь ик калыклэн юанэз кылдӥз: кытысь тымет шоры вуиз ог 1 гектар быдӟа музъем кесэг?  Писпуосын, вучайыосын… Инкуазез утёнъя но инкуазь узырлыкъёсъя министерствоысь специалистъёс оскыто: со ишкалскем тыметлэн Ленин ёросысь Романовской мыс палась ярдурысьтыз. Тӧлъёс зол пельтылэмен, тыметын ву ӝутӥськылэмен, луоз.

— Таӵе уясь музъем кесэгъёс пумиськыло тросаз тыметъёсын но шуръёсын, кылсярысь, Камаын ик, — гожтэмын министерстволэн сайтаз. — Иж тыметын уясь островъёс дырын-дырын вазен но кылдылӥзы, но соос пичиесьгес вал. 1889-тӥ арын Ижысь тодмо купеч Иван Бодалёв со музъем кесэгъёсты кырмылэм но ярдур борды коръёсын юнматылэм, озьы сур поттон заводэзлэсь интызэ паськытгес карем.

Малы та рад музъем кесэгез пыргытыны чаклазы? Иж город администрациын кышкыт югдуръёсъя комиссия 2 пол люкаськылӥз та ужпумъя, шуиз: музъем кесэг плотина пала мынӥз ке, ву кошкон пасез ӵоктаны быгатоз. Соин ик сое пыргытыны  кенешемын вал. Нырысь интыяз ик шори пильыны турттӥзы — ӧз пӧрмы. Собере мырдэм-мырдэм 2 катеръёсын донгыса нуизы Ленин ёрос пала. Отысь ярдур кемысь ог 150 метре юнматӥзы, медаз интыысьтыз вырӟы шуыса, тыметысь вуэз ог 10 сантиметрлы  лэзизы. Табере сое пыргытыны выро.

Иж город администрациысь гражданской защитая управленилэн кивалтӥсез Сергей Шастин верамъя, нырысь ик музъем кесэг вылысь писпуоссэс коразы, собере гинэ пичиен-пичиен сое пыргытыны кутскизы. Талы ог 2 арня кулэ луоз.

Кышкыт учыръёсъя комиссиын ик огкылэ вуэмын: Иж тыметлэсь ярдуръёссэ матысь дыре юнматъяно.

Нош таяз арняе вискын кин но со нош ик тымет вылысь уясь музъем кесэгез адӟем ни — таиз пичи гинэ, «ВКонтакте» вотэсбамысь «Подслушано в ИГГС» группае солэсь туспуктэмзэ но сётӥллям. Пусйиллям на: со остров вылэ султылыны кышкыт.

Элина Кумачёва

Туспуктӥз А. Горбунов

Удмурт Дунне
By Удмурт Дунне 5 июня, 2017 15:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<