Элькунысьтымы устоез механизатор — Ува ёросысь Евгений Пушин

Удмурт Дунне
By Удмурт Дунне 28 июня, 2017 10:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

 

Та нуналъёсы Уваын вожвылъяськизы шаерысьтымы устоосыз механизаторъёс. Уно аръёс ӵоже тракторен ужамъёс пӧлын кужымзэс мертазы егитъёс но.

Ува ёросысь 26 аресъем Евгений Пушин.

Шаерысьтымы устоез механизатор луон понна вожвылъяськонэ пыриськиз 18 мурт. Трактористъёссы понна сюлмаськыса, хозяйствоосын кивалтӥсьёс но татчы вуэмын вал. Зор-кот шоры учкытэк, нюръяськон зэмен ик пӧсь вал.

Ярам, механизаторъёс тракторез вить чиньыез кадь ӟеч тодо, сюрес вылын ворттылон правилоосты быдэсъяло, прицепен ужаны быгато. Но вожвылъяськонын вормон понна агрономлэсь но, инженерлэсь но тодон-валанъёссэс возьматоно вал на. Кылсярысь, валэктон сётоно вал, кыӵе культураез ку кизёно но ку утялтоно, кыӵе мурдалае созэ я тазэ кидысэз кизёно, кыӵе культураез утялтэм бере мае мерттыны яра но трос мукет юанъёслы. Механизаторлэсь озьы котыр ласянь тодон-валанзэ эскеризы. Бусые потыса но, ганяк шокчыны маза ӧз сётэ. Котькуд гырем чурзэс лупаен кадь эскеризы: макем шонер чуръёсыз, валаса-а басьтэмын мурдалаез. Трактор борды прицеп шедьытыкузы, перчатки дӥсяны ӧз вунэтэ-а шуыса гинэ но чаклазы. Сыӵе чаклам улсын амалтэк куалектод но.

Котьма ке но, дунъясьёс пусъемъя, бадӟым янгышъёс ӧй вал, соин ик устозэ механизаторез быръён но секытэн сётӥськиз. Озьы устоез луиз тужгес егитэз — Ува ёросысь 26 аресъем Евгений Пушин. Ленин нимо хозяйствое со армиысь бертэмез бере, 6 ар талэсь азьло, кылиз. Пичи дырысеныз ик атаез сьӧрысь бусыысь ӧз кыльылы. Таин сэрен но ассэ мукет удысысь ӧз адӟы. Ма, туала техника но иномарка машина кадь усто лэсьтэмын бере, ужамъя ужам потэ, шуэ. Хозяйство но ёросын огез кужмоез луэ. Татын котьку саклык висъяськылӥз спортлы. Соин но татчы кылись егитъёс трос.

— Ёрос ӵошатсконын золгес куалекъяй. Ёросысь уго устооссэ гырись-кизисьёсты мон тодӥсько, соос мынэсьтым но трос ужамын ни. Соин но кепырай. Нош шаерысьтымы механизаторъёсты уг тодмаськы, кыӵе ужамзэс уг тодӥськы бере, аслым ачим осконэ бадӟымгес вал, — шуиз Евгений Пушин.

Егит механизатор табере шаермылэсь данзэ утёз 7-тӥ сентябре Тамбов улосысь Кирсанов городын.

Ӵошатсконын 2-тӥ инты басьтӥз Яр ёросысь Алексей Каркин. 3-тӥ луиз Красногорск ёросысь Александр Фефилов. Соосты дипломен но коньдон премиен данъялозы Гурт удысын ужасьёслэсь нуналзэс сӥё-дано пусъён ужрадын.

Елена Сараматова

Туспуктӥз Пётр Люкин

Удмурт Дунне
By Удмурт Дунне 28 июня, 2017 10:22 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<