Элькун Гербер ортчоз 17-тӥ инвожое Можга ёросысь Пичи Сюга гурт котырын

Удмурт Дунне
By Удмурт Дунне Июнь 14, 2017 13:42

 Вань азбаръёс юнматэмын, ӟусъёс шуккемын, пуртыос дасямын. Куноосты гинэ на возьмало.

Герберез ортчытон вылысь «Колос» хозяйствоен кивалтӥсь Пётр Соколов 33,4 гектар бусызэ висъяз. Отын туннэ трос аръем турын ӝужа. Сое турна вал, но туннэ косилка улэ уг сюры — куазь кезьытэн ӧз буды. Ялан зор кисьтэмен, ву пуке, техника пырыны шугъяське. Можга ёрослэн йырыз Аркадий Вершинин верамъя, та гинэ сюлмаськонзы кылемын. Турын вылын уго пыдъёс котмыны быгатозы. Зэм, туннэ котькуд делегацилы ивортэмын, сьӧразы воштон пыдкутчан мед кутозы шуыса. Озьы ик вузаськозы пыдэ понон кылёнка.

— Арлы быдэ ёросамы ортчись Гербер шулдыръяськонъёс дыръя валэн гыронъя ӵошатскон радъяськомы, — вера Аркадий Вершинин. — Туэ сое элькун Гербере но пыӵатыны малпаськомы вал. 1 сотык музъемез дискаторен но небӟытӥмы ни, киязы геры кутӥсь кивалтӥсьёс капчиен куспазы вожвылъяськыны мед быгатозы шуыса. Ачим но геры сьӧры султо шуисько вал. Но тазьы ик зорыса улӥз ке, валлэн бусые пыремез уз луы, вылды.

Нялтас вераса, Валошур дурын ортчоно Гербер валлы сӥземын луоз. Таин валче ужрадэ 12 вал вайыны малпало. 2-ез гыронъя ӵошатсконэ пыриськоз, 4-ез конкур амалъя вожвылъяськоз, 4-ез сцена котырын быгатонлыкъёссэ возьматоз, 2-ез нылпиосты ворттылытоз. Тужгес трос валъёссэ висъяз ёросысьтызы ик фермер Галина Белозёрова. Ужрад синмаськымон мед пӧрмоз шуыса, быдэс ёросэн висиськомы, шуэ со.

Со сяна, корт валъёсын адӟытон но радъяны чакламын. Туала куронъёслы тупась техникаез ёросысьтызы азьмынӥсь хозяйствоосысь кыскозы.

Гербере возьмало 8 сюрс куноосты. Пичиезлы но, бадӟымезлы но кельшымон ужрадъёс ортчозы.

Ужрадэ сюрон понна Можгаысен гуртозь радъямын луоз автобус рейс. Можгинскя ульчаысь 72 номеро юрт вадьсысь «Центр» остановкаысен автобус калыкез нуллоз  10 часыен. Рейсъёслэн виссы 30 минут.

Герберлэн радлыкез

9 час 30 минутысен 10 час 30 минутозь — куноосты но делегациосты пумитан.

10-ен 16 часозь азбаръёсын аспӧртэм адӟытонъёс:

— «Усточикар» — шаерысьтымы усточиослэн киужъёсынызы адӟытон но вуз карон;

— «Вало-вало» —  пӧртэм ӵошатсконъёсын вормисе потэм валъёсын адӟытон.

— «Андан валъёс» — гурт удысын уже кутӥськись техникаен адӟытон.

11-ен 12 часозь

— Валтӥсь сцена вылысен Герберез сӥё-дано усьтон.

— Ӝукез вӧсян.

12-ен 12 час 30 минутозь — «Азвесь геры» — муниципал кылдытэтъёслэн, гурт удысъя управлениослэн кивалтӥсьёссы, вань мылкыд карисьёс, геры кутыса, куспазы устогес луон понна вожвылъяськозы.

12 час 30 минутысен 13 часозь — «Кунокуа» азбаръёсын нуназеян.

12 час 30 минутысен 16 часозь

— «Сергейёслэн азбарзы» — азбаръёс азьын ӝутэм пичи сцена вылысен калыкез шулдыртоз «Вить Сергейёс» ансамбль.

— «Жингрес возьвыл» — Удмуртиысь но солэн палэнысьтыз удмурт коллективъёс азбаръёсын калыкез шулдыртозы.

«Шудон азбар»  — нылпиослы но семьяослы чаклам ужрадъёс.

«Батыр Шудонъёс» — удмурт шудонъёс-вожвылъяськонъёс.

16 часын — делегациосты келян.

18 часысен 22 часозь — «Шундэктон» — егитъёслы удмурт коллективъёсын ӵош шулдыръяськон.

Елена Сараматова

Туспуктэмъёс: А. Горбунов, М. Векшина

Удмурт Дунне
By Удмурт Дунне Июнь 14, 2017 13:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<