Егитъёслэн iВолга форумазы — улонэз выльдыны 75 амал  

Удмурт Дунне
By Удмурт Дунне 30 июня, 2017 12:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Егитъёслэн iВолга форумазы кемалась мынэме потэ вал ни. Туэ шуд усиз ёрос библиотекамылы луыса. Отысь ужасьёс мыным асьсэ проектсэс утьыны оскизы.

Н. Фролова проект гожъяны но утьыны дышетскиз.

Форум туэ 5-тӥзэ ортчиз ни. Таяз арын Самарае асьсэ проектъёсынызы вуизы 13 странаосысь, Россиысь 22 улосвылъёсысь 1 сюрс 663 мыло-кыдо егитъёс. Тужгес усто проектъёс одӥгезлэсь тодмо фондлэсь коньдонзэ утӥзы, табере соос улонэ пыӵалозы. Форуме пыриськизы Удмуртиысь 75 егитъёс, соослэн 75 проектъёссы, улонэз тунсыкогес карись 75 выль амалъёссы. Соос пӧлын этнопарк кылдытон, Даун висёнэн курадӟись пиналъёслы юрттон, туризмез вӧлмытон, техника кылдытон… Озьы ик егитъёс асьсэ проектъёсынызы шутэтскон интыос, нылпиослы дышетскыны, азинскыны, быгатонлыкъёссэс шараяны юрттӥсь студиос кылдытыны дэмлало на.

Форумлэн 9 ӧрезъя кылдытэм комиссиос 4 нунал ӵоже 1 сюрс 100-лэсь уно проектъёсты учкизы. Со ик вал форумлэн нырысетӥ люкетэз. Проектъёс пӧлысь 411-ез кыкетӥ — федерал — люкетэ потӥзы. Пӧлазы 28-эз — Удмуртиысь. Соос ӧз ворме ке но, доразы гожтэтэн бертозы, интыосысь кивалтӥсьёс проектъёсты улонэ пыӵатыны мед юрттозы шуыса. Проектъёс пӧлысь устооссэ быръён 7 нунал ӵоже кыстӥськиз. Со форумлэн тужгес кысык вакытыз вал.

Со дыре ик егитъёс, 9 ӧръя — «МедиаВолна», «Культурный БУМ», «Поколение добра», «Ты — предприниматель», «Патриоты», «Малая родина — большие возможности», «Политика», «iВолга Global», «Инновации и экология» — люкиськыса, дышетскизы. Россиысь дано адямиосын тодматскизы. Кылсярысь, «МедиаВолна» сменаын пинал журналистъёс «Самара» ГТРК-ысь редакторен, телеведущиен Данил Рыбалкоен пумиськизы, спортсменъёслэсь интервью басьтыны дышетскизы. Ужез сярысь вераз Esquire журналлэн редакторезлэн воштӥсез Сергей Минаев. Озьы ик форуме вуылӥзы дано спортсменъёс, парашютистъёс, космонавт но мукет тунсыко адямиос. Форумез радъясьёс ӧз вунэтэ шутэтскон сярысь но. Егитъёс ГТО-лэсь куронъёссэ быдэстӥзы, эктӥзы, кырӟазы, экофестэ пыриськизы.

Кызьы верай ни, форумын мыным Пичи Пурга ёрос библиотекамы проектсэ утьыны оскиз. Вакчияк ке, соя ёрос центрамы этнопарк кылдытыны малпамын дорамы туристъёсты кыскон но шутэтскон инты кылдытон вылысь. Ваньмыз умой пӧрмиз ке, куноосмы но гуртоосмы отын ёросысьтымы воршудъёсын, соослэн кылдэменызы, удмуртъёслэн улэм-вылэменызы тодматскыны быгатозы. Озьы ик отын луозы нылпиослы шудон инты, кузпалъяськисьёслы удмурт шӧмо синпелет, воргоронъёслы Батыр сюрес но трос мукет тунсыкоез.

Озьыен, та форум монэ проект гожъяны но сое утьыны дышетӥз, со сяна, туж тунсыко адямиосын тодматӥз. Проект туала вакытэ туж кулэ, пайдаё уж вылэм. Со бордын егитъёслы одно ик ужаны кулэ. Мукет сямен али малпанъёсты улонэ пыӵатыны шуг. Та амал озьы ик коньдон поттыны но юрттэ. Нош коньдон туннэ улонын валтӥсез ӧвӧл ке но, шуо, сотэк одӥг вамыш но лэсьтыны уг луы. Проектэз одӥг нуналскын уд гожты. Со бордын нимысьтыз пуконо. Тодоно, кызьы сое гожтоно. Со понна асьме элькунамы ФАСТ, «Достояние Удмуртии» но мукет форумъёс вань. Одно ик пыриське отчы, возьматэ асьтэды. Вакытлэн куронъёсыныз валче вамышъяно.

Наталья Фролова, Пичи Пурга ёросысь «Маяк» газетысь журналист

Удмурт Дунне
By Удмурт Дунне 30 июня, 2017 12:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<