Дэбес ёросын 200 скалъёсты кыскытэк возизы

Удмурт Дунне
By Удмурт Дунне Июнь 9, 2017 14:25

Дэбес ёросысь «Варни» хозяйствоын 30-тӥ-31-тӥ мае  200 скалъёссэс кыскытэк возизы. Таӵе учыр нырысьсэ ӧвӧл ни, шуо.

Адямиос керето — пудоос курадӟо.

Малая Чепца гуртысь калык шумпотэмын вал ай: «Варни» хозяйство вордӥськемен, гуртазы уж кылдӥз. Азьвылэз хозяйствозы уго 2011-тӥ арын банкрот кылиз. Соин  кивалтӥз Ижын улӥсь Владимир Ноздрин. Но со гуртэз ӝутон вылысь сюлмаськемен  хозяйство борды басьтӥськымтэ, угось хозяйствоез банкротозь вуттӥз. Но ас палаз туж визьмо, шӧдске, угось Дэбесысь мукет азе шупчемезлэсь азьвыл Ноздрин татысь фермаосты кескичак гожтыса вуттӥз кышноезлэн сузэрез Татьяна Кутергина  вылэ,  мадё гуртоос.

Выль хозяйствоен кивал-тӥсьлы — Василий Медведевлы — фермаосты арендае басьтоно луиз. Ёрос администрациысь гурт удысъя управлениысь валтӥсь зоотехник Надежда Серебренникова верамъя, нырысь-валысь аренда дун вормымон вал ке, берло 2 арзэ со маял кадь будэ: толэзьлы быдэ 85-150 сюрс манетозь вуэ.  Таӵе югдурен валче Василий Медведев фермаез ас вылаз гожтон пумысен судэ но вазиськиз ни.

— Арбитражной судлэн 19-тӥ мае кутэм решениезъя, ферма кузёлы алэмын  гидэн маке карыны 19-тӥ июнёзь, — шуэ Надежда Серебренникова. — Отӥяз нош ик суд ортчоз. Но ӵапак та решение ик визьтэммытӥз кадь гид кузёез. Фермае юлтошъёсыныз лыктэ, проводъёсты кеся, молокопроводлэсь ёзъёссэ ишка. 30-тӥ мае нош мар дауртӥз! Гидэ пырон ӧсэз ик ӵогаз. Скалъёс бӧксо. Йӧлзы вия. Доразы пырыны уг луы — дояркаосты, сильсьӧртӥзы донгаса, улляло. Таӵезэ адӟылэм ӧй вал на. Кышкыт! Скалъёссэс жаляса, дояркаос кӧня бӧрдӥзы. Нош ферма кузё шуэ: мынам гидэ, уд пыре. Полициын ужасьёсты ӧтьытэк ӧйлась. Соку гинэ гидэ пырыны быгатӥмы. Зэм, ӵуказеяз ик 39 скалмылэн мастит кутскиз. Соосты эмъяны табере ичизэ 100 сюрс манет кулэ.

Зэм, гуртоос кышкало, фермаез Медведевлы уз сётэ шуыса. Кунян гидъя уго суд кузёез пала дурбасьтӥз, сое хозяйстволы ӧз сёты. Озьы кунян гид туннэ ке но буш сылэ. Ачиз Василий Медведев шуэ: выль ферма пуктысал, но туннэ вань коньдон судлы но арендалы кошке. Эшшо ке Василий Сидоровичез Прокуратура кысканы кутскиз на пудоез курадӟытэмез понна. Нялтас вераса, Уголовной кодексысь 245-тӥ статьяя животэз курадӟытыса возем, тазалыкезлы изъян ваем я сое вием понна штраф тупатэмын. Солэн быдӟалаез 80 сюрс манетозь вуыны быгатэ яке 6 толэзь ӵоже уждунэз я мукет доходэз кельтыны быгато, озьы ик 360 час ӵоже одно ужатыны, яке исправительной ужъёсы 1 ар ӵоже пыриськытыны, яке 6 толэзьысен 1 арозь пытсэт сьӧры пуктыны быгато.

— Ужам потыса но, ужаны уг сёто, — лулӟе Василий Сидорович. — Ас вакытаз 3 банкрот кылем хозяйствоез ӝутӥ. Табере кыӵе ке кас муртъёслы луыса, кужым быре.  Городъёс гурт понна уз бӧрдэ, йӧлвылзэ маялтозы но кошкозы, нош ми тани пудоен ӵош бӧрдӥськом…

Шӧкыч уром

 

Удмурт Дунне
By Удмурт Дунне Июнь 9, 2017 14:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<