Бигер удмуртъёслэн Гыронбыдтонзы уйинозь кыстӥськиз

Удмурт Дунне
By Удмурт Дунне 30 июня, 2017 09:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Инвожо толэзе инкуазь пӧртэм шулдыръяськонъёс радъясько. 24-тӥ июне Татарстанысь Менделеевск ёросысь Тэремшур гуртын Гыронбыдтон ортчиз.

Тэремшуръёс туж зол дасяськиллям 20 пала делегациосты но 30-лэсь трос коллективъёсты пумитаны.

Отчы, удмуртъёс сяна, уно мукет калыкъёс но вуылӥзы: бигеръёс, поръёс, ӟучъёс, крашинъёс… Котькудӥз тыршиз возьматыны аслэсьтыз сям-йылолъёссэ, кырӟан-эктонъёссэ, киужъёссэ. Соин тросэз усьязы кунокуаоссэс.

— Татарстанын тупаса 173 калыкъёс уло, — шуиз Татарстанысь Кун Кенешлэн Тӧроез, Татарстанысь калыкъёслэн ассамблеязылэн кенешезлэн тӧроез Фарид Мухаметшин. — Котькудӥз соос пӧлысь гажа аслэсьтыз кылзэ но культуразэ, нош кун тырше соослы юрттыны.

Фарид Хайруллович пусйиз, Татарстанын удмуртъёслэн огазеяськонъёссы туж тыршисесь, котькытчы пыриськисесь шуыса. Солы сокем паймонэз но ӧвӧл, дыр: бускель улосын удмуртъёс лыдзыя 4-тӥ интыын сыло ӟучъёс, бигеръёс но чувашъёс бере.

Тэремшуръёс туж зол дасяськиллям 20 пала делегациосты но 30-лэсь трос коллективъёсты пумитаны. Ужрад кутскемлэсь азьвыл быдэс гурт но, оло, ӝыны Менделеевск ёрос возьматӥзы яркыт концерт. Гуртоос данъязы ужез, семьяез но калыкъёс куспын тупаса улонэз. Нырысьсэ чузъяськиз Гыронбыдтон праздниклэн гимнэз.

— Мон бигер кылэз уг тодӥськы, но анай-атае чылкыт верасько вал, — бигер сямен ӟечъяськемез бере шуиз Удмуртиысь культурая но туризмъя министрлэсь ужзэ быдэсъясь Владимир Соловьёв. — Гыронбыдтон кадь праздникъёс милемды эшшо но огазеяло.

Та малпанэз ик азинтӥз «Удмурт Кенеш» ассоциацилэн дано президентэз Валентин Тубылов. Со пусйиз, Удмуртиысь но Татарстанысь кивалтӥсьёс котьку, ог-огзэс валало шуыса.

Бадӟым сцена вылын шулдыр концерт пуктӥз Удмуртиысь «Италмас» ансамбль, нош собере быгатонлыкъёссэс возьматӥзы ини Татарстанысь, Удмуртиысь но Киров улосысь лыктэм кырӟась-эктӥсь коллективъёс. Тужгес зол паймытӥз Алнаш ёросысь Варали гуртысь «Царамис» пор ансамбль. Эктӥсьёс сцена вылэ потӥзы гинэ — возьвыллэн пӧртэм палъёсысьтыз куноос сцена пала дыртӥзы. Ог-огзылэсь юасько: ӵапак таос сярысь веразы вал-а? Самой та коллектив-а со? Учкы ай, кыӵе задор экто!

Вераны кулэ: та ансамбльлы ар но ӧвӧл ай, но со трос учкисьёслэсь сюлэмъёссэс берыктӥз ини. Соослэн репертуаразы, пор эктонъёс сяна, вань бигеръёсыз но, удмуртъёсыз но.

Удмурт коллективъёс но туж быгатӥсесь.

— Таӵе ужрадъёсы вуылыса, эшшо но зол данъяськыны кутскисько удмурт калыкеным, — шуэ Агрыз ёросысь Сарсак-Омга гуртысь «Зарни сӥзьыл» ансамбльын кырӟась Надежда Ефимова. — Быгатӥськом ужаны но, шулдыръяськыны но!

Пичи сцена вылын вожвылъяськизы батыръёс но чеберайёс. Соос возьматӥзы азьвыл ик дасям визиткаоссэс, кырӟаны-эктыны быгатэмзэс. Нылъёс пӧрамъёсынызы куноятӥзы, нош пиос кужымзэс возьматӥзы — гира ӝутказы. 100-лэсь трос пол ӝуткасьёсыз но вал, ява! Вань эскеронъёсты пырпотыса, «Чеберина-2017» нимез басьтӥз Алнашысь Надежда Самсонова, нош «Удмурт батыр-2017» луиз Менделеевск ёросысь Алексей Степанов. Вожвылъяськонэ пыриськем 9-сэ ик нылъёсыз но 5-сэ ик пиосыз дуно кузьымъёсын пусйизы.

Та вакытэ ик мылкыд карисьёс туп ӵыжазы, пиналъёс киынызы чорыг кутылӥзы (куд-огез — бассейнэ пырыса ик, куазь сокем пӧсь ӧй вал ке но), «Этноквестэ» пыриськизы.

Асьме Герберын ортчылӥсьтэм шудон но вал — парсьпиез шудытон. Вань мылкыд карисьёс потӥзы сцена бордысь возь вылэ но круге султӥзы. Котыртэм шоры мешокысь парсьпиез лэзизы. Кин сое ӝоггес кутӥз — со ик вормиз. Тэремшурысь парсьпи кошкиз Кукмор ёросысь Шуньыл гуртысь Елена Сергеева доры.

Калык нунал ӵоже одӥг площадкаысь мукетаз ветлӥз, праздниклы шумпотӥз, азьвыл шъёсыныз пумиськиз, выльёссэ шедьтӥз.  Тросэз веръязы вӧсям ӝукез — со пӧзьтэмын вал кӧня ке пуртыосын но ваньмызлы тырмиз.

Гыронбыдтон азьланьтӥськиз Тэремшур клуб азьын. Отын удмурт артистъёс Николай Анисимов, Алёна Тимерханова но Иван Котельников ортчытӥзы шулдыр дискотека.

Елена Рябина

Туспуктӥз Пётр Тургенев

Удмурт Дунне
By Удмурт Дунне 30 июня, 2017 09:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<